ރާއްޖޭގެ ހުދު ގޮނޑުދޮށްތަކާއި ބިއްލޫރިކޮޅެެއްހާ ސާފު ނޫވިލާއި ކަނޑުއަޑީގެ ރީތި މަންޒަރުތައް ފެނުމުން ދުނިޔޭގެ ގިނަ ބަޔަކު އާޝޯޚުވެ އެވެ. މިތަނަށް އެހާ ގިނަ ޓޫރިސްޓުން އައުމުގެ މައިގަނޑު ސަބަބަކީ ވެސް އެއީ އެވެ. ރާއްޖޭގެ ގުދުރަތީ ރީތިކަން ދެކިލުމަށެވެ.

މިފަހަރު މިއޮތީ ވެސް ރާއްޖޭގެ ގުދުރަތީ ރީތިކަމަށް އަނެއްކާ ވެސް މުޅި ދުނިޔޭގެ ސަމާލުކަން ލިބުނު ފޮޓޯ އެކެވެ.

ބައިނަލްއަގްވާމީ ފޮޓޯ މުބާރާތެއް ކަމަށްވާ "ދަ ރޯޔަލް ސޮސައިޓީ ޕަބްލިޝިން ފޮޓޯގްރަފީ ކޮމްޕެޓިޝަން"ގެ ރަންވަނަ ރާއްޖޭގައި ނަގާފައިވާ ފޮޓޯއަކަށް ވަނީ ލިބިފަ އެވެ.

ފޮޓޯގްރާފަރެއް ކަމަށްވާ އެންޖެލާ އެލްބީ އޭނާގެ ޑްރޯން ޕައިލެޓް އޮގަސްޓް ޕައުލާގެ އެހީއާއެކު ނަގާފައިވާ އެ ޑްރޯން ފޮޓޯއިން ދައްކުވައިދެނީ ޅަ ހަތަރު މިޔަރެއް މަސް އައިނެއްގެ ތެރޭގައި ޝިކާރަ ކުރަން ފަތާ މަންޒަރެވެ.

މި ފޮޓޯއިން ޝިކާރަވެރިންނާއި ޝިކާރަ ކުރެވޭ އެތީގެ މެދުގައި އޮންނަ ތަފާތު ގުޅުން ދައްކުވައިދޭ ކަމަށް އެ މުބާރާތަށް އިންސާފުކުރި ފަނޑިޔާރުން ބުނެފައިވެ އެވެ.

"ފޮޓޯގްރާފަރުގެ ކެމެރާއިން ގުދުރަތުގެ ހައިރާން ކުރުވަނިވި ނިޒާމަށް ދިރުން ގެނުވައިދޭ" މުބާރާތުގެ ފަނޑިޔާރެއް ކަމަށްވާ ހަގް ޓާވީ ވިދާޅުވި އެވެ.

އެ ފޮޓޯއާއެކު އެންޖެލާ ބުނެފައިވަނީ އިރުއަރާ ގަޑީގައި ރާއްޖޭގެ ފަޅުތައް ވަރަށް ސާފުވާ ކަމަށާއި ކަނޑުއަޑީގެ ދިރުންތައް އެއްވެސް އުނދަގުލަކާ ނުލާ ފެންނަ ކަމަށެވެ.

އެންޖެލާގެ އެ ފޮޓޯއަށް މުބާރާތުގެ އެއްވަނަ ލިބިފައިވަނީ އޭނާގެ ފޮޓޯ ހުށައެޅި ކެޓަގަރީއަށް ހުށައެޅުނު އިތުރު އެތައް ހާސް ފޮޓޯއަކާ ވާދަކޮށްގެންނެވެ.