އަންނަ އަހަރު ބާއްވަން ހަމަޖެހިފައިވާ 82 ވަނަ ގޯލްޑަން ގްލޯބް އެވޯޑްސްގެ ނޮމިނޭޝަންތައް މިދިޔަ ހޯމަ ދުވަހު އިއުލާން ކޮށްފި އެވެ.

ޖުމްލަ 27 ކެޓަގަރީއަކުން އެވޯޑުދެވޭ ގޯލްޑަން ގްލޯބް އެވޯޑްސްގެ ނޮމިނޭޝަންތަކަށް ބަލާއިރު އެންމެ ގިނަ ނޮމިނޭޝަންތައް ލިބިފައިވަނީ މިއުޒިކަލް ޑްރާމާ "އެމީލިއާ ޕެރޭޒް" އަށެވެ.

ސެލީނާ ގޯމޭޒް މުހިއްމު ރޯލަކުން ފެނިގެންދާ އެ ފިލްމަށް ޖުމްލަ 10 ނޮމިނޭޝަން ލިބިފައިވާއިރު އޭގެ ތެރޭގައި ބެސްޓް ނޮން އިންގްލިޝް މޯޝަން ޕިކްޗާ، ބެސްޓް މޯޝަން ޕިކްޗާ (މިއުޒިކް/ކޮމެޑީ) އަދި ބެސްޓް ސަޕޯޓިން ފީމޭލް އެކްޓަރު ހިމެނެ އެވެ.

ބެސްޓް ސަޕޯޓިން ފީމޭލް އެކްޓަރުގެ ނޮމިނޭޝަން އެ ފިލްމުން ލިބިފައިވަނީ ސެލީނާ ގޯމޭޒް އަށެވެ. އޭނާއަށް ވަނީ އޭގެ އިތުރުން ވެސް އެއް ނޮމިނޭޝަން ލިބިފަ އެވެ.

އެމީލިއާ ޕެރޭޒްގެ އިތުރުން ގޯލްޑަން ގްލޯބް ނޮމިނޭޝަންތައް ލިބުނު ފިލްމުތަކުގެ ތެރޭގައި "ދަ ބްރޫޓަލިސްޓް"، "ކޮންކްލޭވް" އަދި "ވިކެޑް" ފާހަގަކޮށްލެވެ އެވެ.

"އެމީލިއާ ޕެރޭޒް"އަށް ބޮޑު ކާމިޔާބީއެއް މި ނޮމިނޭޝަންތަކުން ލިބިފައިވީ ނަމަވެސް އެ ފިލްމުގައި ސެލީނާ ދައްކުވައިދިން އެކްޓިންއަށް ބައެއް ފަރާތްތަކުން އަންނަނީ ފާޑުވެސް ކިޔަމުންނެވެ.