ސަރުކާރުން ހިންގާ ސިއްހީ އިންޝުއަރެންސް ސްކީމް، އާސަންދައިގެ ޚިދުމަތް ދިނުމަށް ދުބާއީގެ ހޮސްޕިޓަލަކާއި، ބެންކޮކް ދެ ހޮސްޕިޓަލަކާއެކު މިއަދު ސޮއިކޮށްފި އެވެ.

އާސަންދަ ކުންފުނިން ބުނީ އަލަށް އާސަންދަ ޚިދުމަތް ދޭން ރާއްޖެއިން ބޭރުގެ ތިން ހޮސްޕިޓަލަކާއެކު މިއަދު ސޮއިކޮށްފައިވާ ކަމަށެވެ.

ސޮއިކުރި ތިން ހޮސްޕިޓަލަކީ ދުބާއީގެ ބުރްޖީލް މެޑިކަލް ސިޓީ އާއި ބެންކޮކްގެ ވޯލްޑް މެޑިކަލް ހޮސްޕިޓަލްގެ އިތުރުން ބެންކޮކްގެ ބެންކޮކް ހޮސްޕިޓަލެވެ.

އާސަންދައިން ބުނީ މި ހޮސްޕިޓަލްތަކާއެކު ސޮއިކުރި އެއްބަސްވުމުގެ ދަށުން އަންނަ އަހަރުގެ ޖެނުއަރީ 15 އިން ފެށިގެން ވަކި އޫސުލެއްގެ ދަށުން މި ހޮސްޕިޓަލްތަކަށް ފަރުވާއަށް ފޮނުވަން ފަށާނެ ކަމަށެވެ.

މި އަހަރުގެ ޖެނުއަރީ މަހުގެ 13 ގައި ރައީސް މުހައްމަދު މުއިއްޒު ވިދާޅުވީ، މިހާރު އާސަންދަ ލިބޭ ގައުމުތަކަށް ވުރެ މާ ފެންވަރު ރަނގަޅު، މާމަތީ ފަންތީގެ ގައުމުތަކުން އާސަންދަ ލިބޭގޮތް ހަމަޖައްސަން މަސައްކަތް ކުރައްވާނެ ކަމަށެވެ. އެހެންވެ އެ ސްކީމްގެ ދަށުން ޔޫއޭއީ އާއި ތައިލެންޑުން ޚިދުމަތް ދެވޭނެ އިންތިޒާމް މި އަހަރު ހަމަޖެއްސުމަކީ ރައީސް މުއިއްޒު ވެވަޑައިގެންނެވި ވައުދުފުޅެކެވެ.