މަޝްހޫރު ލަވަކިޔުންތެރިޔާ ޓޭލާ ސްވިފްޓްގެ "އީރާސް ޓުއާ" ކޮންސެޓުތައް މިދިޔަ އާދީއްތަ ދުވަހު ނިމިފައިވާއިރު އެ ޓުއާއަށް ލިބުނު ރެކޯޑް އާމްދަނީގެ ތަފްސީލުތައް އާއްމުވެއްޖެ އެވެ.

ރިޕޯޓުތައް ބުނާ ގޮތުގައި ކޮންސެޓުތަކުގެ ޓިކެޓު ވިއްކައިގެން އެކަނި ވެސް ޓޭލާއަށް ދެ ބިލިއަން އެމެރިކާ ޑޮލަރަށް ވުރެ ބޮޑު އާމްދަނީއެއް ލިބިފައިވެ އެވެ.

މިއާއެކު ޓޭލާ ވެފައިވަނީ ތާރީހުގައި ވެސް ކޮންސެޓެއްގެ ޓިކެޓު ވިޔަފާރިން ދެ ބިލިއަން ޑޮލަރުގެ އާމްދަނީއެއް ލިބުނު ހަމައެކަނި އާޓިސްޓަށެވެ.

މީގެ ކުރިން އެންމެ ބޮޑު އާމްދަނީއެއް ހޯދި ކޮންސެޓް ޓުއާތަކުގެ ތެރޭގައި އެލްޓަން ޖޯންގެ ފެއާވެލް ޓުއާއާއި ކޯލްޑް ޕްލޭގެ މިއުޒިކް އޮފް ދަ ސްފިއާސް ޓުއާ ހިމެނެ އެވެ.

ޓޭލާގެ ޓުއާއަށް ލިބުނު ބޮޑު އާމްދަނީއާއެކު އޭނާއާއެކު ހަރަކާތްތެރިވި ކްރޫންނަށް 197 މިލިއަން ޑޮލަރު ބަހާފައިވާ ކަމަށް ހަބަރުތައް ބުނެ އެވެ. އޭގެ ތެރޭގައި ކޮންސެޓުގައި ހަރަކާތްތެރިވި 50 ޑްރައިވަރުންނަށް ދިން 100،000 އެމެރިކާ ޑޮލަރު ވެސް ހިމެނެ އެވެ.

އެ ޓުއާގެ ކާމިޔާބީ ފާހަގަ ކުރުމުގެ ގޮތުން ވެންކުއާވާގައި އޮތް ކޮންސެޓުގައި ޓޭލާ ވަނީ އޭނާގެ ސަޕޯޓަރުންށް ހިތުގެ އަޑިން ޝުކުރު އަދާކޮށްފަ އެވެ.

ސީދާ ގޮތެއްގައި އީރާސް ޓުއާއަށް ލިބުނު އާމްދަނީގެ އިތުރުން އެ ޓުއާގެ ސަބަބުން ކޮންސެޓުތައް ބޭއްވި ސިޓީތަކުގެ ފަތުރުވެރިކަން ވެސް ބޮޑުތަނުން ކުރިއަރާފައިވާ ކަމަށް ރިޕޯޓުތައް ބުނެ އެވެ.

ޓޭލާގެ ކުރިއަށް ހުރި މަސައްކަތްތަކަށް ބަލާއިރު 2025 ވަނަ އަހަރު އޭނާއަށް ހަ ގްރޭމީ އެވޯޑް ނޮމިނޭޝަން ލިބިފައިވާއިރު މަޝްހޫރު ބައެއް އާޓިސްޓުންނާއެކު ކޮލެބޮރޭޝަންތައް ވެސް ކުރިއަށް އެބަހުއްޓެވެ.