ދުނިޔޭގެ އެންމެ މަޝްހޫރު ކްރިޕްޓޯކަރަންސީ ބިޓްކޮއިންގެ އަގު މިއަދު 106،000 ޑޮލަރަށް އަރައިފި އެވެ. މިއީ ރިކޯޑް އަދަދެކެވެ.

މީގެ ކުރިން ބިޓްކޮއިންގެ މުއާމަލާތް ކުރި އަގަކީ 105،688 ޑޮލަރެވެ. ބެލެވޭ ގޮތުގައި ބިޓްކޮއިންގެ އަގު އުފުލިފައިވަނީ އެމެރިކާގެ އިންތިޚާބީ ރައީސް ޑޮނާލްޑް ޓްރަމްޕް ބިޓްކޮއިން ރިޒާވެއް އެމެރިކާއިން އުފައްދަން ވެއްޖެ ކަމަށް ވިދާޅުވުމުންނެވެ.

ޓްރަމްޕް ވަނީ ތެލުގެ އިތުރުން ކްރިޕްޓޯކަރަންސީގެ ލީޑަރަށް އެމެރިކާ ވާން ޖެހޭ ކަމަށް ވިދާޅުވެފަ އެވެ.

ބިޓްކޮއިންގެ 2.2 ޕަސެންޓް ވަނީ މިހާރު ވެސް އެކި ގައުމުތަކުގެ ސަރުކާރުތަކުން ގަނެފަ އެވެ. އެގޮތުން އެމެރިކާގެ ސަރުކާރުން އެކަނިވެސް މިހާތަނަށް ވަނީ 20 ބިލިއަން ޑޮލަރުގެ އަގުގެ 200،000 ބިޓްކޮއިން ގަނެފަ އެވެ.

ގިނަ ސަރުކާރުތަކުން ބިޓްކޮއިން އާ ދޭތެރޭ ރަނގަޅު ވިސްނުމެއް ގެންގުޅެ އެވެ. އެ ގޮތުން ރަޝިއާގެ ރައީސް ވްލަޑިމިއާ ޕުޓިން ވިދާޅުވި ގޮތުގައި މިހާރުގެ އެމެރިކާގެ ސަރުކާރުން ޑޮލަރު ސިޔާސީ ބޭނުންތަކަށް ބޭނުން ކުރަމުންދާތީ، ދުނިޔޭގެ އިގްތިސާދުގައި ޑޮލަރުގެ ދައުރު ދަނީ ކުޑަވަމުންނެވެ. އަދި މިކަމާ ގުޅިގެން ގިނަ ގައުމުތަކުން ކްރިޕްޓޯކަރަންސީ ފަދަ އެހެނިހެން އެސެޓްތަކަށް ފޯކަސް ކުރުމަށް ޕުޓިން ވަނީ ގޮވާލާފަ އެވެ.

2009 ވަނަ އަހަރު ތައާރަފުކުރި ބިޓްކޮއިންއަކީ ދުނިޔޭގެ އެންމެ ފުރަތަމަ އަދި އެންމެ މަޝްހޫރު ކްރިޕްޓޯކަރަންސީ އެވެ. ފާއިތުވި އަހަރުތަކުގެ ތެރޭގައި ދުނިޔޭގެ އިގްތިސާދީ އަދި ސިޔާސީ ހާލަތަށް އަންނަ ބަދަލުތަކާ ގުޅިގެން ބިޓްކޮއިންގެ އަގުވަނީ އުފުލިފަ އެވެ. ބިޓްކޮއިންގެ އަގަށް ބަަދަލުއައި އެންމެ ބޮޑު އެއް ސަބަބަކީ ގައުމުތަކުން ކްރިޕްޓޯކަރަންސީއާ މެދު ގެންގުޅުނު ވިސްނުންތައް ބަދަލުވުމެވެ.