ހުޅުމާލޭގައި ހަދާފައިވާ ވިނަރެސް ފްލެޓްތަކުގައި އިތުރު ވޯޓާ ސަޕްލައި ސިސްޓަމާއި ފަޔާ ފައިޓިން ސިސްޓަމް ހަރުކުރުމަށް ހިމެނި ވޭރިއޭޝަންއަށް 7 މިލިއަން ޑޮލަރުގެ ބަދަލުގައި 9 މިލިއަނަށް ބަދަލުކޮށް އިތުރު 2 މިލިއަން ޑޮލަރު (30.84 މިލިއަން ރުފިޔާ) ހިޔާނާތުގެ ގޮތުގައި ނަގާފައިވާކަން ހާމަވެއްޖެ އެވެ.

ކުރީގެ ސަރުކާރުން ވިނަރެސް ފްލެޓްތަކުގައި މި މަސައްކަތް ކުރަން ނިންމައި އޭރުގެ އެޗްޑީސީ ބޯޑުން ވަނީ އެ މަސައްކަތުގެ ވޭރިއޭޝަނަށް 7 މިލިއަން ޑޮލަރު ހަރަދުކުރުމަށް ނިންމާފަ އެވެ. ނަމަވެސް ވެރިކަން ބަދަލުވެ ޓްރާންސިޝަން ދުވަސްވަރު، އެޗްޑީސީން އެ ފައިސާ ކޮންޓްރެކްޓަރާއި ހަވާލުކުރުން ހުއްޓާލުމަށް އިންތިހާބީ ރައީސް އެންގިވިކަމަށް މައުލޫމާތު އެނގޭ ފަރާތަކުން ވަނީ މި ނޫހަށް ކިޔައިދީފަ އެވެ.

އޭގެ ފަހުން ޕީއެންސީގެ ސަރުކާރު އައުމަށްފަހު 26 ޑިސެމްބަރު 2023 ގައި އެޗްޑީސީގެ މިހާރުގެ މެނޭޖިން ޑިރެކްޓަރު އިސްވެ ހުންނަވާ، އާ ބޯޑުން ވަނީ އެ އަދަދު 9 މިލިއަން ޑޮލަރަށް ބަދަލުކޮށްފަ އެވެ. އިތުރު ދެ މިލިއަން ޑޮލަރު ހިމަނައިގެން ކޮންޓްރެކްޓް ވޭރިއޭޝަން އިތުރުކުރުމަށްފަހު، ޗައިނާ މެޝިނަރީ އެންޑް އިންޖިނިއަރިން ކޮމްޕެނީ (ސީއެމްއީސީ) އަށް ފައިސާ ދައްކައި، އެމީހުން މެދުވެރިކޮށް އެޗްޑީސީގެ ވެރިން ކޮމިޝަން ނެގިކަމަށް ދަނީ ތުހުމަތު ކުރަމުންނެވެ.

ވޭރިއޭޝަނަށް އެޗްޑީސީ ބޯޑުން ބަދަލުގެނެސްފައިވާ ނިންމުން

ރައީސް މުހައްމަދު މުއިއްޒުގެ ވެރިކަން ފެށުނުތާ ކުރީކޮޅު ހިންގާފައިވާ މި ހިޔާނާތާއި ގުޅޭ ބައެއް މައުލޫމާތު ސޯޝަލް މީޑިއާގައި ދަނީ ދައުރުކުރަމުންނެވެ.

މީގެ ކުރިންވެސް އެޗްޑީސީގެ އެމްޑީ ފަޒުލްގެ ހިޔާނާތުގެ މައްސަލަތަކެއް ވަނީ ފެންމަތިވެފަ އެވެ. އެގޮތުން ފަޒުލް ގާތް ބަޔަކަށް ކޮރަލްވިލްގެ 9 ޓަވަރުގެ ބޭރު ރެނދުތައް ފިލުވައި، ކުލަލުމުގެ މަސައްކަތް އިންތިހާއަށް ބޮޑު އަގުގައި ހަވާލުކުރި މައްސަލަ ފާހަގަކޮށްލެވެ އެވެ.

އެޗްޑީސީގައި ހިޔާނާތުގެ އެތައް ކަމެއް ހިންގަމުންދާކަން ހާމަވަމުންދާއިރު، ސަރުކާރާއި އެންޓި ކޮރަޕްޝަން ކޮމިޝަނުން މިހާތަނަށް މިފަދަ އެއްވެސް ތުހުމަތެއް ތަހުގީގުކޮށްފައިނުވެ އެވެ.