ބިންވެރިޔާ ސްކީމްގެ ދަށުން ވަގު ލިޔުންތަކެއް ތައްޔާރުކޮށްގެން ގޯތިތަކެއް ދިން މައްސަލައިގައި މިހާތަނަށް ސުވާލުކުރި ފަރާތްތަކުން ބުނީ، އެ ލިޔެކިޔުންތައް ދީފައި އޮތީ މިދިޔަ އެމްޑީޕީ ސަރުކާރުގައި ކަމަށް ފުލުހުން ބުނެފިއެވެ.

މި މައްސަލަ ސަމާލު ކަމަށް އައީ، ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ، އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދުގެ ޝަރުތު ހަމަނުވި ނަމަވެސް، އޭނާއަށް ގޯތި ދީފައިވާ ލިޔެކިޔުމެއް ސޯޝަލް މީޑިއާއަށް ލީކުވުމާ ގުޅިގެންނެވެ.

ބިންވެރިޔާ ސްކީމާ ގުޅޭ ފޯޖަރީގެ މައްސަލަ ސަމާލު ކަމަށް އައުމާ ގުޅިގެން ފުލުހުން ވަނީ އެ މައްސަލައިގެ ޖިނާއީ ތަހުގީގެއް ފަށަފައިފައެވެ.

މި މައްސަލައާ ގުޅޭ މައުލޫމާތު ދިނުމަށް ފުލުހުން ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި ގޮތުގައި، ފުލުހުންގެ ތަހުގީގަށް ސުވާލުކޮށްފައިވާ ހުރިހާ ފަރާތަކުން ބުނެފައިވަނީ، ފޯޖުކޮށްފައިވާ ލިޔެކިޔުންތައް ދިނީ ކުރީ ސަރުކާރުން ކަމަށެވެ.

އެ ގޮތުން މި މައްސަލައިގައި ފަޒީލާ ސުވާލުކުރުމުން، އޭނާ ވެސް ބުނެފައި ވަނީއެފަދައިން ކަމަށް ޝަރީފް ވިދާޅުވި އެވެ. ޝަރީފް ވިދާޅުވި ގޮތުގައި، ގޯތި ނުލިބުމުން ފަޒީލް ވަނީ ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީނާ ވެސް ބައްދަލު ކޮށްފަ އެވެ.

ފުލުހުން ބުނި ގޮތުގައި މި މައްސަލައިގައި ހިމެނޭ ލިޔުންތަކުގެ ސައްހަކަން ކަށަވަރު ކުރުމާއި، މައްސަލައިގައި ސުވާލުކުރަންޖެހޭ ފަރާތްތަކާ ސުވާލު ކުރުމުގެ މަސައްކަތް ކުރިޔަށް އެބަގެންދެ އެވެ.

ޝަރީފް ވިދާޅުވީ މިހާތަނަށް ބެލިބެލުމުން ފާހަަގަވެފައިވަނީ މި ފަދަ ތިން ގޯއްޗެއް ކަމަށާއި ނަމަވެސް މި މައްސަލައިގައިބަޔަކު ގޯހެއް ހަދާފައިވާކަން އަދި ފާހަގަނުވާ ކަމަށް ވެސް އޭނާ ވިދާޅުވި އެވެ.

"އަޅުގަނޑު ނުބުނަން މި ޑޮކިއުމަންޓުތަކަކީ ސައްހަ އެއްޗެކޭ ވެސް. އެކަން ކަށަވަރު ކުރުމަށް އަޅުގަނޑުމެން މަސައްކަތް ކުރަމުން މި ދަނީ. މިއީ އޭރުގެ މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗާގެ ނަމުގައި ހަދާފައިވާ ޑޮކިއުމަންޓުތަކެއް،" ޝަރީފް ވިދާޅުވި އެވެ.

ހަގީގަތާއި ޚިލާފު ދޮގުލިޔެކިޔުމެއް އުފެއްދުމަކީ ގާނޫނީ ކުށަކަށް ވާއިރު، ގޯތި މައްސަލައިގައި ދޮގު ލިޔުންތަކެއް ހަދާފައިވާކަން ހައުސިން މިނިސްޓްރީގެ އިތުރުން އެޗްޑީސީއަށް ވެސް އެނގުނުތާ ފަސް މަސް ވެގެން ވަނީ ގޮސްފައެވެ.

އެހެން ނަމަވެސް ފުލުހުންނަށް އެކަން އަންގާފައިނުވާ ކަމަށް ރޭގެ ނޫސްވެރިންނާއި އެކު ބޭއްވި ބައްދަލުވުމުގައި ފުލުހުން ވަނީ ބުނެފައެވެ. ދޮގު ލިޔުންތަކެއް ހަދައިގެން އުޅޭކަމުގެ މައުލޫމާތު އެނގިހުރެ، އެކަން ސިއްރު ކުރުމުން އެ އިދާރާތައް ކުށްވެރިވާނެތޯ ކުރެވުނު ސުވާލަށް ފުލުހުން ޖަވާބެއް ނުދެއެވެ. ފުލުހުން ބުނި ގޮތުގައި އެ މައްސަލަ ބަލަން ފެށީ، ސޯޝަލް މީޑިއާއިން ފުލުހުންގެ ސަމާލު ކަމަށް އައުމާއެކީގައެވެ.

މިދިޔަ އަހަރުގެ އޮގަސްޓު މަހު ނެރެފައިވާ ބިންވެރިޔާ ސްކީމްގެ ފައިނަލް ލިސްޓުގައި ފަޒީލްގެ ނަން އޮތެވެ. ނަމަވެސް އޭނާއަށް އޮތީ ޝަރުތު ހަމަނުވާ ކަމަށެވެ. އޭގެ ސަބަބެއްގެ ގޮތުގައި ބަޔާންކޮށްފައިވަނީ ސަރުކާރުން ހިންގައިފައިވާ އަސާސީ ބޯހިޔާވަހިކަމުގެ ސްކީމަކުން އޭނާއަށް ކުރިން ގޯއްޗެއް ލިބިފައި އޮތުމެވެ.

ފަޒީލްއަށް ލިބިފައިވާ ގޯއްޗާ ގުޅޭ ލިޔެކިޔުންތަކެއް ސޯޝަލް މީޑިއާގައި ވަނީ އާންމުވެފަ އެވެ. އޭގެ ތެރޭގައި، ފަޒީލަށް ދީފައިވާ ގޯތި އެހެން މީހަކަށް ވެސް ލިބިފައިވާ ކަމަށް އެޗްޑީސީއަށް ފާހަގަވުމުން، އެ ކުންފުނިން މިދިޔަ ޖުލައި މަހު ހައުސިން މިނިސްޓްރީ މެދުވެރިކޮށް މައުލޫމާތު ސާފުކުރަން ފޮނުވައިފައިވާ ސިޓީއެއް ހިމެނެ އެވެ.

މި މައްސަލަ އެންޓި ކޮރަޕްޝަން ކޮމިޝަން (އޭސީސީ)އާއި ގުޅިގެން ތަހުގީގު ކުރުމަށް ތައްޔާރުވަމުން އަންނައިރު، ފަޒުލް ހިމެނޭހެން އެޗްޑީސީގެ ބޯޑު މެންބަރުންތަކެއް ވަނީ ސަސްޕެންޑުކޮށްފައެވެ. އަދި އޭނާގެ ބޭބެ ފަޒީލް ވެސްވަނީ ސަސްޕެންޑު ކޮށްފަ އެވެ.