ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ކޮރަޕްޝަންގެ ގިނަ މައްސަލަތަކެއް ފެންމަތިވެފައި ވަނިކޮށް އެ ކުންފުނީގެ ފަސް ލެޕްޓޮޕެއް ވަގަށް ނަގައިފި އެވެ.

ފުލުހުންގެ ތަރުޖަމާން އަހުމަދު ޝިފާން ވިދާޅުވީ އެޗްޑީސީގެ ލެޕްޓޮޕްތަކެއް ވަގަށް ނެގި މައްސަލައެއް ހުށަހެޅިފައިވާތީ އެ މައްސަލަ ތަހުގީގު ކުރަމުން އަންނަ ކަމަށެވެ.

އެ ލެޕްޓޮޕްތައް ވަގަށް ނަގާފައި ވަނީ އެ ކުންފުނީގެ ފައިނޭންސް ޑިޕާޓްމަންޓާއި ޕްރޮޖެކްޓްސް ޑިޕާޓްމަންޓުންނެވެ. އެ ލެޕްޓޮޕްތައް ވަގަށް ނަގާފައި ވަނީ މިދިޔަ ހުކުރު ދުވަހާއި އިއްޔެ އެވެ.

ފުލުހުން ބުނީ އެ ލެޕްޓޮޕްތައް މިހާރު ހޯދިފައިވާ ކަމަށެވެ. ނަމަވެސް އޭގެ އިތުރު ތަފުސީލެއް ފުލުހުން ނުދެ އެވެ.

އެޗްޑީސީގެ ކުރީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ ބޭބެ، މުހައްމަދު ފަޒީލް ރަޝީދަށް ވަގު ލިޔުމެއް ތައްޔާރުކޮށްގެން ގޯއްޗެއް ދިން މައްސަލައެއް ދާދިފަހުން ވަނީ ފަޅާއަރައިފަ އެވެ. އެ މައްސަލަ ފުލުހުން އަންނަނީ ތަހުގީގު ކުރަމުންނެވެ.

އެ މައްސަލައިގެ ހެކި ނައްތާލުމަށް އެޗްޑީސީގެ ތެރެއިން މަސައްކަތް ކުރަމުން އަންނަ ކަމަށް ސޯޝަލް މީޑިއާގައި ދިޔައީ ވާހަކަދެމެވެމުންދިޔަ އެވެ.