ބާޒަކީ އެމެރިކާގެ ރަސްމީ ދޫނިކަމަށް ނިންމައި އެމެރިކާގެ ގާނޫނު ހަދާ މަޖިލީހުން ގާނޫނު ފާސްކޮށްފި އެވެ. މި ގާނޫނު މިހާރު ވަނީ އެ ގައުމުގެ ރައީސް ޖޯ ބައިޑެން ތަސްދީގު ވެސް ކުރައްވާފަ އެވެ.

"މި ވައްތަރުގެ ބާޒަކީ އެމެރިކާގެ މިނިވަންކަމާއި ހިތްވަރު ރަމްޒުކޮށްދޭ ދޫންޏެއް،" ބިލު ހުށަޅެހި ސެނެޓާ އޭމީ ކްލޮބޫޗާ ބިލު ހުށަޙެޅި އިރު ވަނީ ވިދާޅުވެފަ އެވެ.

1782 ވަނަ އަހަރުން ފެށިގެން އެ ގައުމުގައި ބާޒުގެ ކުރެހުމަކީ އެމެރިކާގެ ދައުލަތުގެ ލިޔެކިޔުންތަކުގައި ބޭނުންކުރަމުން އަންނަ އެއްޗެކެވެ. އެހެން ކަމުން މިހާތަނަށް ވެސް އެމެރިކާގެ ރަސްމީ ދޫންޏަކީ، ބާޒު ކަމުގައި އެ ގައުމުގެ ރައްޔިތުން ވަނީ ބަލައިގެންފަ އެވެ.

އެމެރިކާގެ ގައުމީ ދޫނީގެ ގޮތުގައި ކަނޑައަޅާފައި ވަނީ ބާޒުގެ ވައްތަރެއް ކަމަށްވާ ބޯލްޑް އީގަލް އެވެ. މިއީ ފަޔާއި ތުނބުގައި ރީނދޫކުލަ ހުންނަ ބާޒެކެވެ. އަދި ކަރުގައި ހުދުކުލަ ހުންނަ ދޫންޏެކެވެ. މިއީ މިހާރު ވެސް އެމެރިކާގައި ހިމާޔަތްކޮށްފައިވާ ދޫންޏެކެވެ. އެހެން ކަމުން އެ ބާވަތުގެ ބާޒު ހިފުމާއި ވިއްކުމުގެ އިތުރުން ގެންގުޅުމަކީ ވެސް މަނާކަމެކެވެ.