މަޝްހޫރު އިނގިރޭސި ރެޕް ލަވަކިޔުންތެރިޔާ ނިކީ މިނާޖް ހައްޔަރު ކުރުމުގެ ކޯޓު އަމުރަކަށް އެމެރިކާގެ ފުލުހުން އެދިފައިވާ ކަމަށް ހަބަރުތައް ބުނެފި އެވެ.

ރިޕޯޓުތައް ބުނާ ގޮތުގައި ނިކީ ހައްޔަރު ކުރަން ކޯޓު އަމުރަކަށް އެދިފައި މިވަނީ އޭނާގެ ކޮންސެޓް ޓުއާއެއްގެ ތެރެއިން ހިނގި ހާދިސާއަކާ ގުޅިގެންނެވެ.

ނިކީގެ ކުރީގެ މެނޭޖަރު އޭނާއާ ދެކޮޅަށް ފުލުހަށް ހުށައެޅި އެ މައްސަލާގައި ނިކީއަށް ތުހުމަތު ކޮށްފައިވަނީ ޖިސްމާނީ އަނިޔާއާއި ފުރައްސާރައިގެ ތުހުމަތެވެެ.

އެ މައްސަލާގައި ނިކީ ހައްޔަރު ކުރަން ފުލުހުން އެދިފައިވާއިރު އެމެރިކާގެ ޕްރޮސިކިއުޓާ ޖެނެރަލްގެ އޮފީހުން އަންނަނީ އެކަން އިތުރަށް ބަލަމުންނެވެ.

ބުނެވޭ ގޮތުގައި 2024 ވަނަ އަހަރުގެ އޭޕްރީލް މަހުގެ ތެރޭގައި ހިނގި އެ ހާދިސާގައި ނިކީ ވަނީ އޭނާގެ ޑްރެސިން ރޫމް ތެރޭގައި އޭނާގެ މެނޭޖަރަށް ޖިސްމާނީ ގޮތުން ހަމަލާދީފަ އެވެ.

މިކަމާ ގުޅިގެން ނިކީގެ ގާނޫނީ ޓީމުން ބުނީ އެފަދަ އެއްވެސް މައުލޫމާތެއް އެނގިފައިނުވާ ކަމަށާއި މިހާތަނަށް ނިކީއާ ދެކޮޅަށް އެއްވެސް އަމުރެއްގެ ނޯޓިސް ލިބިފައިވާ ނުވާ ކަމަށެވެ.