ރިޔާސީ ކެމްޕޭނުގައި ވައުދުވި ހުރިހާ ބޯހިޔާވަހިކަމުގެ މަޝްރޫއެއް ހިންގާނެ ކޮންޓްރެކްޓަރުން ހޯދަން މި މަހުގެ ތެރޭގައި އިއުލާން ކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ކ. ގުޅީ ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ އެމަނިކުފާނު ވައުދުވި "ހުރިހާ ދިމާލެއްގައި" ބޯހިޔާވަހިކަމުގެ މަޝްރޫއުތައް ހިންގުމުގެ އަމަލީ މަސައްކަތް މި އަހަރުގެ ތެރޭގައި ފަށާނެ ކަމުގެ ފުރިހަމަ ޔަގީންކަން އަރުވާ ކަމަށެވެ.

"ކެމްޕޭން ތެރޭގައި، މެނިފެސްޓޯގައި ކަނޑައަޅާފައި ހުރި ހުރިހާ ބޯހިޔާވަހިކަމުގެ މަޝްރޫއުތައް ހިންގަދޭނެ ފަރާތްތައް ހޯދަން، އަމަލީގޮތުން މަސައްކަތްކޮށްދޭނެ ކޮންޓްރެކްޓަރުން ހޯދަން އަޅުގަނޑުމެން އިއުލާން އެބަކުރަން މި ޖެނުއަރީ މަސް ތެރޭގައި،" ރައީސް ވިދާޅުވި އެވެ.

އެމަނިކުފާނު ވިދާޅުވީ އެ މަސައްކަތް ކުރިއަށްދާނީ އިސްކަންދޭ ވަކި ތަރުތީބަކުން ކަމަށެވެ. އަދި މި އަހަރު ވެގެންދާނީ ގެދޮރުގެ މައްސަލަ ހައްލުކުރަން އެއް އަހަރު ތެރޭ އެންމެ ގިނަ މަސައްކަތް ކުރެވޭނެ އަހަރަށް ކަމަށް ވެސް ރައީސް ވިދާޅުވި އެވެ.

މި އަހަރަށް ލަފާކޮށް ރައްޔިތުންގެ މަޖިލީހުން ފާސްކުރި ބަޖެޓަކީ ވެސް ބޯހިޔާވަހިކަމުގެ ބަޖެޓެއް ކަމަށް ރައީސް މުއިއްޒު މީގެކުރިން ވިދާޅުވެފައިވެ އެވެ. މަޖިލީހުން ފާސްކުރާ ބަޖެޓުގައިވާ ފައިސާގެ އަދަދުތަކަކީ ހަމައެކަނި ލިޔެފައިވާ ނަންބަރުތަކެކެވެ. އެ ނަންބަރުތަކަށް ފައިސާ ހޯދުމަކީ ސަރުކާރުން ކުރަންޖެހޭ ކަމެކެވެ. ފާއިތުވި ސަރުކާރުތަކުން ނަގާފައިވާ ގިނަ އަދަދެއްގެ ލޯނުތައް ވެސް ބަޖެޓްގެ ތެރެއިން ދައްކަންޖެހެ އެވެ. ބަޖެޓަށް ލިބޭ ފައިސާ އަކީ ދައުލަތުގެ ހުރިހާ ހަރަދެއް ހިންގަން ހުންނަ ފައިސާ އެވެ. އެހެންކަމުން ބޯހިޔާވަހިކަމުގެ މަޝްރޫއުތައް ހިންގަން ބޮޑު އަދަދެއްގެ ފައިސާ ބޭނުންވާނެ އެވެ. އެކަމަކު އެ ފައިސާ ހޯދަން ގެންގުޅުއްވާ ޕްލޭނެއް ރައީސް ވިދާޅެއްނުވެ އެވެ.

މީގެއިތުރުން ރައީސް މުއިއްޒު ވިދާޅުވީ ރަސްމާލެ ހިއްކުމުގެ މަސައްކަތުގެ ދުވެލި އަވަސް ކުރުމަށް އިތުރު ޑްރެޖަރު ގެނެސްގެން މަސައްކަތް ކުރިއަށްގެންދާނެ ކަމަށެވެ. އެކަމުގެ ސަބަބުން މުޅި މަޝްރޫއުގެ ސްޕީޑު ދެތިން ގުނަ އިތުރުވެގެންދާނެ ކަމަށް އެމަނިކުފާނު ވިދާޅުވި އެވެ.

"މިހާރު އަމަލީ ގޮތުން ބިން ހިއްކުން އެ ހިނގަނީ. އިރާދަކުރެއްވިއްޔާ އަދި އިތުރު ބައެއް ފަރާތްތަކުން، އިތުރު ބައެއް ކޮމްޕެނީތަކުން އަޅުގަނޑުމެން އެތަނަށް ޑްރެޖަރު މޮބިލައިޒް ކުރުވައިގެން އެއްފަހަރާ އެތައް މަޝްރޫއުތަކެއް، އެތައް ފަރާތްތަކެއްގެ މަސައްކަތްތަކެއް އެތާ ފެށުމަށް މަސައްކަތް މިކުރަނީ. އެހެންވީމަ ސްޕީޑު ދެގުނަ އަދި ތިންގުނައަށް ބާރުވާނެ އިރާދަކުރެއްވިއްޔާ،" ރައީސް ވިދާޅުވި އެވެ.