ގައުމީ އެއާލައިން، މޯލްޑިވިއަންގެ ފުރަތަމަ ވައިޑް-ބޮޑީ އެއާކްރާފްޓް، އޭ330 މަތިންދާބޯޓު މިއަދު ރާއްޖެ ގެެނެސްފި އެވެ.

އެ ބޯޓު މިއަދު ހަވީރު ރާއްޖެ އައިއިރު، އޭގައި ޕައިލަޓުންގެ ގޮތުގައި އާއި ކުރޫއިންގެ ގޮތުގައި ހަރަކާތްތެރިވެފައި ވަނީ ހަމައެކަނި ދިވެހީންނެވެ. ސިންގަޕޫރުން ގެނައި އެ ބޯޓުގެ ފަސްޓް އޮފިސަރެއްގެ ގޮތުގައި ހުންނެވީ އޭވިއޭޝަން ދާއިރާގައި 21 އަހަރުގެ ތަޖުރިބާހުރި ކެޕްޓަން މުހައްމަދު ތޮއްލަތު އަންވަރެވެ. އޭނާ މަސައްކަތް ކުރައްވަނީ ގަތަރު އެއާލައިންގަ އެވެ.

އެ ބޯޓު ޖެއްސިވަގުތު ރައީސް ޑރ. މުހައްމަދު މުއިއްޒާއި ނައިބު ރައީސް ހުސައިން މުހައްމަދު ލަތީފްގެ އިތުރުން ޓްރާންސްޕޯޓް މިނިސްޓަރު މުހައްމަދު އަމީނާއި ދައުލަތުގެ އިސްވެރިން އެއާޕޯޓް ރަންވޭގައި ތިއްބެވެ. އެ ބޯޓު ރާއްޖެ އައުން ފާހަގަކުރަން ހާއްސަ ރަސްމިއްޔާތެއް ވެސް މިއަދު ބޭއްވި އެވެ.

އެ ބޯޓުން ޗައިނާގެ ތިން މަންޒިލަކަށް ދަތުރުތައް ކުރަން ވަނީ ނިންމާފަ އެވެ. އެއީ ބެއިންޖިން އާއި ޝެންހާއީ އާއި ޗެންގްޑޫ އެވެ.

މޯލްޑިވިއަންގެ ފްލީޓުގައި މިހާރު 24 ބޯޓު އެބައޮތެވެ. އެއީ، އެއާބަސް އޭ320 މަރުކާގެ ބޯޓަކާއި ޑޭޝް މަރުކާގެ އަށް ބޯޓާއި އޭޓީއާރުގެ ހަތަރު ބޯޓާއި ސީ ޕްލޭންގެ 11 އޭޓީއާރްގެ ހަތަރު ބޯޓާއި ޑޭޝް ޓުވިން އޮޓާގެ 11 ބޯޓެވެ. މިހާތަނަށް ބޭރު ދަތުރުތައް ކުރަމުން އައީ އެއާބަސް އޭ320 މަރުކާގެ ބޯޓުންނެވެ.

އެ ބޯޓު ރާއްޖެ އައުން ފާހަގަކުރަން މިއަދު ބޭއްވި ރަސްމިއްޔާތުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށްފަހު ގައުމީ އެއާލައިން ތަރައްގީކޮށް، ކުރިއެރުވުމަށް ގިނަ މަސައްކަތްތަކެއް ފެށިފައިވާ ކަމަށް ވިދާޅުވި އެވެ.

"ކުންފުނި ހިންގުމުގެ ނިޒާމަށް ގެނެވޭ ބަދަލުތަކާއެކު ކުންފުނި ރިކަވަރކުރެވޭނެ. ކޮންމެ ފްލީޓަކަށްވެސް އިތުރު ބޯޓެއް ހޯދުމަކީ އަމާޒެއް. އެއަރލައިނަކީ ރިސްކު ބޮޑު ހަރަދު ބޮޑު އޮޕަރޭޝަނެއް. އެއަރލައިންގެ ސަބަބުން ގައުމަށް ލިބޭނެ އިކޮނޮމިކް ކޮންޓްރިބިޔުޝަން" އަމީން ވިދާޅުވި އެވެ.

އަމީން ވިދާޅުވީ މޯލްޑިވިއަނަށް އިތުރުވި ވައިޑް ބޮޑީ އެއާކްރާފްޓާއެކު ރާއްޖެއަށް ފަތުރުވެރިން އަންނަ އަދަދު އިތުރުވެ، ސީޕްލޭން އޮޕަރޭޝަންތަކާއި އެތެރޭގެ އުދުހުންތައްވެސް އިތުރުވެ، އިގްތިސާދީގޮތުން ގިނަ ފައިދާތަކެއް ލިބޭނެ ކަމަށެވެ.