އދ ރިސޯޓެއް ކައިރީ އޮތް ސަފާރީއަކުން ކަނޑަށް ވެއްޓުނުކަމަށް ބެލެވޭ ދިވެއްސަކު ހޯދުމުގެ މަސައްކަތް ކުރަން ފަށައިފި އެވެ.

ފުލުހުން ބުނީ 10 ޖެނުއަރީގައި ސަފާރީގައި އުޅުނު ދިވެއްސަކު ގެއްލިގެން ރިޕޯޓްކޮށްފައިވާ ކަމަށެވެ.

ގެއްލިގެން ހޯދަމުން ދަނީ ނ. ހޮޅުދޫ، ސީވީޑް، އަލީ އަރުޝަދު 35 އަހަރެވެ.

ފުލުހުން ބުނީ ރޭގެ ވަގުތެއްގައި ސަފާރީ ޑެކް މަތީގައި ހުއްޓާ ވެއްޓި އަރިމަތީ ޖެހިފައި މޫދަށް ވެއްޓިފައިވާ ތަން ސަފާރީގެ ސީސީޓީވީ ފުޓޭޖް އިން ފެނިފައިވާ ކަމަށެވެ.

އެމްއެންޑީއެފުން ބުނީ މިރިހި އައިލެންޑް ރިސޯޓް ކައިރީގައި އޮތް "ނޯތު 07" ސަފާރީއިން ދިވެއްސަކު ކަނޑަށް ވެއްޓި ގެއްލިގެން އުޅޭކަމުގެ މަޢުލޫމާތު އެމްއާރުސީސީއަށް ލިބުމާ ގުޅިގެން، ޑައިވަރުންގެ ޓީމަކާއެކު ސަފާރީ އޮތް ސަރަހައްދަށް ދިއުމަށް މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއިން ދަތުރުކުރަމުން ދާކަމަށެވެ.

އަރުޝަދު ހޯދުމުގެ މަސައްކަތް އެމްއެންޑީއެފާއި ފުލުހުން ދަނީ އެ ރަށުގައި ހަރަކާތްތެރިވަމުންނެވެ.