އިތުބާރުނެތް ކަމުގެ ވޯޓެއް ނަގައި ދެކުނު ކޮރެއާގެ ރައީސްގެ މަގާމުން ދުރުކުރި ރައީސް ޔޫން ސުކް ޔެއޯލް ހައްޔަރުކޮށްފި އެވެ.

މިއަދު ޔޫން ހައްޔަރުކުރުރީ 3 ޑިސެމްބަރުގައި މާޝަލް ލޯ ތަންފީޒު ކުރަން އޭނާ މަސައްކަތް ކުރުމުގެ ސަބަބުން އުފެދުނު މައްސަލަތަކާއި ގުޅިގެންނެވެ.

ދެކުނު ކޮރެއާ ސިޔާސީ ގޮތުން ހަލަބޮލިވެފައިވާތާ ދެ ހަފްތާއެއްހާ ދުވަސް ވެފައިވަނިކޮށް ހާލަތު ނިމުމަކަށް ގެނެސް، ތަޙުޤީޤުތަކަށް އެއްބާރުލުން ދިނުމަށް ރައީސް ޔޫން ވަނީ އެއްބަސްވެފަ އެވެ.

ޑިސެމްބަރު 3 ވަނަ ދުވަހު ކުއްލިއަކަށް މާޝަލް ލޯ އިޢުލާނުކުރުމާއި ގުޅިގެން އެ ގައުމުގެ ޤާނޫނު ހަދާ މަޖިލީހުން އޭނާ މަޤާމުން ވަކިކުރުމަށް ވޯޓެއް ނެގި އެވެ. މަގާމުން ވަކިކުރުމަށް ފަހު މަގާމުގެ ބޭނުން ނަހަމަ ގޮތުގައި ހިފި ކަމަށް ބުނެ ޔޫންގެ މައްސަލަ ތަހުގީގު ކުރަން ވަނީ ފަށާފަ އެވެ. ތަހުގީގު ކުރާ ފަރާތްތަކުން ރައީސް ޔޫން މީގެ ކުރިން ހައްޔަރުކުރަން އުޅުމުން ސަލާމަތީ ބާރުތަކުންނާއި ޔޫންއަށް ތާއީދުކުރާ ފަރާތްތަކުން ވަނީ އެކަމަށް ހުރަސް އަޅާފަ އެވެ.

މި ހައްޔަރުކުރުމާއެކު، އޭނާއަކީ ޤައުމުގެ ތާރީޚުގައި ހައްޔަރުކުރެވުނު ފުރަތަމަ ރައީސް އެވެ. ނަމަވެސް އެ ޤައުމުގައި ކުރީގެ ވެރިންނަށް ދަޢުވާކޮށް ޖަލަށްލުމުގެ ތާރީޚެއް އެބައޮތެވެ.

މަތީ ފަންތީގެ އޮފިޝަލުންގެ ކޮރަޕްޝަން ތަހުގީގުކުރާ އޮފީހުން ބުނެފައިވަނީ ތަހުގީގުކުރާ ފަރާތްތަކުން ޔޫން ހައްޔަރުކުރުމުގެ ވޮރަންޓް ތަންފީޒުކުރީ މިއަދު ހެނދުނު ކަމަށެވެ.

ޖެނުއަރީ 15 ވަނަ ދުވަހުގެ ފަތިހުން ފެށިގެން 3،000 އަށްވުރެ ގިނަ ފުލުހުން އޭނާ ހައްޔަރުކުރުމަށް އޭނާގެ ގެއަށް ގޮސްފައިވެ އެވެ. އެއްވެސް އަނިޔާވެރިކަމަކަށް ފުރުސަތު ނުދިނުމަށްޓަކައި ތަހުގީގަށް ހާޒިރުވުމަށް ނިންމީ ކަމަށް ޔޫން ވިދާޅުވެފައިވެ އެވެ.