މަޝްހޫރު ލަވަކިޔުންތެރިޔާ ޖަސްޓިން ބީބާއާއި އޭނާގެ އަންހެނުން ހެއިލީ ބީބާގެ ގުޅުމުގައި މައްސަލަތަކެއް އުޅޭ ކަމަށް ހަބަރުތައް ބުނެފި އެވެ.

ޖަސްޓިންއާއި ހެއިލީގެ މެދުގައި މައްސަލައެއް އުޅޭ ކަމަށް އަޑު ފެތުރެން ފަށާފައިވަނީ އިންސްޓަގްރާމްގައި ޖަސްޓިން ހެއިލީގެ އެކައުންޓް "އަންފޮލޯ" ކުރުމުންނެވެ.

އިންސްޓަގްރާމްގައި ޖަސްޓިން ފޮލޯކުރާ މީހުން ހޯދުމުން ހެއިލީގެ ނަން ނުފެނުމާއެކު ގިނަ ބަޔަކު ވަނީ އެމީހުން ވަރިއަކަށް މިސްރާބު ޖަހާފައިވާ ކަމަށް ބުނަމުންނެވެ. މި އަޑުތައް ފެތުރެމުން ދަނިކޮށް ޖަސްޓިން ވަނީ އޭނާގެ އެކައުންޓުން ހެއިލީ އަންފޮލޯކުރީ އޭނާ ނޫން ކަމަށާއި އޭނާގެ އެކައުންޓް ހެކްކޮށްފައިވާ ކަމަށް ބުނެފަ އެވެ.

އޭގެ އިތުރުން ހެއިލީ ވެސް ވަނީ ޖަސްޓިންގެ ފޮޓޯއެއް އޭނާގެ އިންސްޓަގްރާމް ސްޓޯރީގައި ހިއްސާކޮށް ވަރީގެ އަޑުތައް ހިންދާލާފަ އެވެ.

އެހެން ކަމުން ހެއިލީއާއި ޖަސްޓިންގެ މެދުގައި މައްސަލަ ޖެހިފައިވާ ކަމަށް ދެކެވޭ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށް ބެލެވިދާނެ އެވެ.