ދުނިޔެއަށް ބޮޑު އިންގިލާބެއް ގެނުވި ކޮވިޑް 19އަށް މަގުފަހިވީ ޗައިނާގެ ލެބޯޓްރީއަކުން ލީކުވި ވައިރަސްއެއްގެ ސަބަބުން ކަމަށް އެމެރިކާއިން ބުނެފި އެވެ.

އެމެރިކާގެ ސެންޓްރަލް އިންޓެލިޖެންސް އޭޖެންސީ (ސީއައިއޭ)އިން ކުރި ތަހުގީގަކަށްފަހު އެ އިދާރާއިން ބުނެފައިވަނީ ކޮވިޑް 19 ފެތުރެން ފެށީ ޗައިނާގެ ލެބް ލީކަކުން ކަން ސާބިތުވާ ހެކި ފެނިފައިވާ ކަމަށެވެ.

ދުނިޔެ މިހާތަނަށް ދެކެފައިވާ އެންމެ ނުރައްކާތެރި އެއް ޕެންޑެމިކް ފެށުނު ގޮތަކީ މިހާތަނަށް ވެސް ހޯދިފައިނުވާ އެކަމާ ބެހޭގޮތުން ގިނަ ބަހުސްތަކެއް ކުރެވޭ ކަމެކެވެ.

އެގޮތުން އެ ބަލީގެ އެންމެ ފުރަތަމަ ކޭސްތައް ފެނުނީ ޗައިނާއިން ކަމަށްވުމާއެކު އެއީ ޗައިނާގެ ލެބޯޓްރީ ހާދިސާއެއްގެ ނަތީޖާ ކަމަށް ގިނަ ބަޔަކު ގަބޫލުކުރި އެވެ.

އެމެރިކާގެ ޖާސޫސީ އިދާރާއިން މި ރިޕޯޓު ނެރެފައިވަނީ އެގައުމުގައި އަލަށް ހުވާކުރި ޓްރަމްޕްގެ ސަރުކާރުން ޕެންޑަމިކްގެ އަސްލު ހޯދަން ކުރާނެ ކަމަށް ބުނި މަސައްކަތްތަކުގެ ދަށުންނެވެ.

ގާތްގަނޑަކަށް އަހަރެއްހާ ދުވަހަށް ދެމިގެންދިޔަ ނޭވާލާ ނިޒާމުގެ ބައްޔެއް ކަމަށްވާ ކޮވިޑް 19 ޕެންޑެމިކްގައި އެތައް ބައެއްގެ ފުރާނަ ގެއްލި ދިރިއުޅުމުގެ އެތައް ކަމަކަށް ބުރޫ އަރާފައިވެ އެވެ.