ޖެހި ހިސާބު ގޯސްވެ، އަބްދުއްރަހީމްގެ އިރު އޮއްސިއްޖެ

"މި ވެރިކަން ފެށުނުއިރު އަޅުގަނޑުމެން ދެމީހުންގެ މެދުގައި އޮތް ގާތްގުޅުމާއި އިތުބާރު އޮތް ނަމަ މިއަދު މިކަން މިގޮތަށް ނުހިނގާނެ," މިއީ މަޖިލީހުގެ ރައީސް އަބްދުއްރަޙީމް އަބްދުﷲ މިއަދު ވިދާޅުވި ބަސްފުޅެކެވެ. ކަން މިހާރު އޮތް ހިސާބާއި ކަންކަން ހިނގާފައިވާ ގޮތް ވަރަށް ސާފެވެ. ރައްޔިތުންގެ މަޖްލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމުގެ މި ބަސްފުޅު އެމަނިކުފާނުގެ އަމިއްލަ ދޫފުޅުން ރާއްޖޭގެ މީޑިއާއަށް ވިދާޅުވުމުގެ ކުރިން ވެސް މިކަން ހިނގަމުން ދަނީ މި ގޮތައްކަމަށް ގިނަ ބަޔަކު ދިޔައީ ބުނަމުންނެވެ.

ސަރުކާރުގެ ސިޔާސަތުތަކަށް ގިނަ ބަޔަކު ފާޑުކިޔައި ބަސްތައް ރައްދުކުރަމުން ދިޔައިރު، އޭރު ސަރުކާރާއި ރައީސް މުހައްމަދު މުއިއްޒުގެ ދިފާއުގައި ގަދަ ބަސްތައް ބުނަމުން ދިއަ ވަރުގަދަ އަބްދުއްރަހީމް ހުންނެވީ ހިމޭނުންނެވެ. ކަހާތަން ހަމަ ހިރުވާ ވެސް ނުލަ އެވެ.

މިހެން ކަންތައް ވަމުންދާތީ އޭރުވެސް ގިނަ ބަޔަކަށް އަބްދުއްރަހީމާއި ރައީސް މުއިއްޒާއި ދެމެދު ހިތްހަމަ ނުޖެހުންތަކަކާއި ގޯސްތަކެއް އުޅޭކަމަށް އައީ ވާހަކަތައް ދެކެވެމުންނެވެ.

ރައްޔިތުން އޭރު ބުނަމުން އައި ވާހަތަކާއި ކުރަމުން އައި ޝައްކުތައް ހަމަގައިމުވެެސް މިއަދު މިވަނީ ހަގީގަތަކަށް ބަދަލުވެފަ އެވެ. އަބްދުއްރަހީމް ޖެހި ހިސާބު ގޯސްވެއްޖެ އެވެ.

ރައްޔިތުންނަށް އެކަން އެނގި ސާފުވީ އަބްދުއްރަހީމްގެ ލޯބިވާ ދަރިކަލުން އިބްރާހިމް ފައިސަލް ޓޫރިޒަމް މިނިސްޓަރުކަމުން މިއަދު ހެނދުނު ވަކިކުރި ހިސާބުންނެވެ. އެހިސާބުން ރައްޔިތުންގެ ހިތްތަކުގައި އުފެދިފައި އޮތް ސުވާލުތަކަށް އަބްދުއްރަހީމް ވަނީ ވަރަށް ސާފު ޖަވާބެއް ދެއްވާފަ އެވެ. އެއީ އެމަނިކުފާނާއި ރައީސް މުއިއްޒާއި ދެމެދު އޮތް މާކުރިން ވެސް ގޯސްވެފައި އޮތްކަމެވެ. މިކަމަށް އިއުތިރާފު ވީ ޚުދު އަބްދުއްރަހީމް އަމިއްލަފުޅަަށެވެ.

އަބްދުއްރަޙީމް "ދައުރު" ނޫހަށް ދެއްވި އިންޓަވިއުއެއްގައި ވަރަށް ސާފުކޮށް ރައީސް މުއިއްޒާ ދެމެދު އޮތް ސިޔާސީ ގުޅުން ގޯސްކަމަށް އެއްބަސްވެވަޑައިގެންނެވި އެވެ. އަދި ގުޅުން ރަނގަޅު ނަމަ މިހެން ކަން ދިމާނުވީސް ކަމަށް އެ މަނިކުފާނު އަމިއްލަފުޅަށް ގަބޫލުކުރައްވަ އެވެ.

އެހެންވީމާ ޔަގީނުން ވެސް ކުރިން އެ އޮތް ގާތް، ރަހުމަތްތެރި، އެކުވެރި ގުޅުން ކެނޑިއްޖެ އެވެ. އަބްދުއްރަހީމްގެ ދަރިކަލުން ފައިސަލް މަގާމުން ވަކިކުރީ އަންގާވެސް ނުލާ ހަމަ ކުއްލިއަކަށެވެ. ސަބަބެއްވެސް ނެތި އެވެ. ފައިސަލް ވަކި ކުރިކަން ރައީސް އޮފީހުން ކަށަވަރުކޮށްދިން އިރު، އޭނާ މަގާމުން ވަކިކުރި ސަބަބައެއް ހާމައެއް ނުކުރެެ އެވެ.

ފައިސަލް ވިދާޅުވި ގޮތުގައި ރައީސް އޮފީހުން ފޮނުވި ސިޓީގައި ވެސް ސަބަބެއް ބަޔާންކޮށްފައެއް ނުވެ އެވެ. އަބްދުއްރަހީމް ވެސް ވިދާޅުވީ، ސަބަބެއް ނޭނގޭ ކަމަށެވެ. ވީގޮތެއް ނޭނގޭ ކަމަށެވެ.

އެންމެންވެސް ދަންނާނޭހެން އަބްދުއްރަހީމަކީ ރައީސް ޑރ. މުއިއްޒު ވެރިކަމަށް ގެނައުމަށް އެންމެ މަސައްކަތް ކުރެއްވި އަދި އެންމެ ބޮޑު ބުރައެއް އުފުއްލެވި ބޭފުޅާ އެވެ. އަދި މުއިއްޒު ވެރިކަމަށް ވަޑައިގެންއިރު އެންމެ އަރިސް ބޭފުޅާ އެވެ. ފުރަތަމަ ހުންނެވީ ރައީސްގެ ޚާއްސަ އެޑްވައިޒަރެއްގެ ގޮތުގަ އެވެ. ރައީސްގެ ބަސްފުޅުން ނަމަ، ސިޔާސީ ގޮތުން އެ މަނިކުފާނު އެންމެ ފަހުރުވެރިވާ ބޭފުޅާ އެވެ. އަބްދުއްރަހީމްގެ ބަސްފުޅުން ނަމަ، ރައީސާ އެންމެ ގާތް ބޭފުޅަކީ އެ މަނިކުފާނެވެ.

ރައީސާއި އަބްދުއްރަހީމްގެ ގުޅުން އެންމެ ބޮޑަށް ބަދަހިވެގެންދިޔައީ ޕީއެންސީ ސެނެޓުގައި ބޭއްވި ރިޔާސީ ޕްރައިމަރީއާ ހަމައިންނެވެ.

އެ ޕްރައިމަރީ ކާމިޔާބުކޮށް، އޭރު މާލޭ މޭޔަރަކަށް ހުންނެވި ރައީސް މުއިއްޒު ވެރިކަމަށް ގެނައުމަކީ ސިޔާސީ ހަޔާތުގެ އެންމެ ކާމިޔާބު، އެންމެ ބުރަ، މަސައްކަތުގެ ގޮތުގައި އަބްދުއްރަހީމް އިޝްތިހާރު ކުރެއްވި އެވެ. އެ މަނިކުފާނު ފަޚުރުވެރިކަމާއެކު ތަކުރާރުކޮށް، އެތައް ޕޯޑިއަމެއްގައި އެ ވާހަކަ ވިދާޅުވި އެވެ. އެއީ، އެ މަނިކުފާނުގެ ބުރަ، މިންނެތް މަސައްކަތް ކަމަށެވެ.

އެ މަނިކުފާނު އަތުރާ ފެންވަރުގައި އެއްވެސް ސިޔާސީ ބޭފުޅަކަށް ކުޅިބައި ނޭތުރޭނެ ކަމަށް އަބްދުއްރަހީމް ވިދާޅުވި އެވެ. ހިތުގެ އަޑިން އެކަން ގަބޫލުކުރައްވައިގެން މޭފުޅުގައި އަތްޖައްސަވާފަ އެވެ.

ދަރިފުޅު ފައިސަލަށް ފަހު ދެން އޮތީ ބައްޕަ އަބްދުއްރަހީމް؟

ރައީސް މުއިއްޒާއި އެންމެ އަރިސް، އެއް ތަށިން ކައިބޮއެ އުޅުނު، މަޖިލީހުގެ ރައީސް އަބްދުއްރަހީމްގެ ލޯބިވާ ދަރިފުޅު، އިބްރާހީމް ފައިސަލް މަގާމުން ވަކިކޮށްލި ޚަބަރާއެކު ގިނަ ބަޔަކަށް ކުއްލި ހައިރާންކަމެއް ލިބުނެވެ.

ރާއްޖޭގެ އިގުތިސާދު މުޅިން ބަރޯސާވެފައި އޮތް ފަތުރުވެރިކަމުގެ ސިނާއަތާ ބެހޭ ވަޒީރުކަމަށް ފައިސަލް އައްޔަންކޮށްފައި ހުރީ އޭނާއަކީ މާމޮޅު އިލްމަކާއި ތަޖުރިބާއެއް ލިބިފައިވާ މީހަކަށް ވެގެނެއް ނޫނެވެ. ހަމައެކަނި އަބްދުއްރަހީމާއި މުއިއްޒާއި އޮތް ގާތްކަމުގެ ތެރެއިންނެވެ. ނަމަވެސް ފައިސަލް އެ މަގާމަށް އައްޔަންކުރުމުން ގިނަ ބައެއްގެ ފާޑުކިޔުން އަމާޒުވި އެވެ. ނަމަވެސް މިއަދާ ޖެހެންދެން ވެސް ފައިސަލް އެ މަގާމުގައި ބަހައްޓާފައި ހުރީ އެ ދެބޭފުޅުންގެ ދެމެދު އޮތް ގާތް ގުޅުމުގެ ތެރެއިންނެވެ.

ކުއްލި ގޮތަކަށް ދަރިފުޅުގެ މަގާމް ގެއްލުވާލިއިރު، މިހާރު ގިނަ ބައެއްގެ ހިތުގައި އުފެދިގެން އުޅޭ އެންމެ ބޮޑު ސުވާލަކީ މަޖިލީހުގެ ރައީސް އަބްދުއްރަހީމްއަށް ދެން ވެގެންދާނެގޮތަކާ މެދު އެވެ.

އަބްދުއްރަޙީމް މިހާރު ހުންނެވި މަޖިލީހުގެ ރައީސްކަމުގެ މަގާމު އެމަނިކުފާނަށް ދެއްވަން ނިންމެވީ ސީދާ ރައީސް މުއިއްޒެވެ. އެއީ، ވެސް އެ ދެ ބޭފުޅުންގެ މެދުގައި އޭރު އޮތް ގާތް ގުޅުމެވެ. އެކުވެރިކަމެވެ. އިތުބާރެވެ.

އެހެން ނަމަވެސް މިއަދު ހާމަވެގެން މި ދިއައީ އަބްދުއްރަހީމާއި ރައީސާ ދެމެދު ގުޅުން ގޯސްވެފައި އޮންނަތާ ދުވަސްކޮޅެއް ވެއްޖެ ކަމެވެ.

އެކިއެކި މަސްދަރުތަކުން އައީ ފައިސަލް ވަކިކުރާނެ ކަމަށް ބުނަމުންނެވެ. އެ ވާހަކަ ތުންތުން މަތިން އަޑުއިވޭތާ އެތައް ދުވަހެއް ވެއްޖެ އެވެ. ސަރުކާރު ތެރޭ ތިބި، އިސްވެރިން އެކިއެކި ސައިމޭޒުދޮށުގައި އެ ވާހަކަ ކިޔައިދެ އެވެ. އެކަމަކު، ސާފު ސަބަބެއް ވިދާޅެއް ނުވެ އެވެ. އެ ކަން ކުރައްވަން ރައީސް އުޅުއްވާތާ އެތައް ދުވަހެއް ވެއްޖެ ކަމަށް ވެސް ވާހަކަދެކެވެ އެވެ.

އިތުބާރު ހުރި ފަރާތަތަކުން ބުނިގޮތުގައި މިހާރު އަބްދުއްރަހީމް މަގާމުން ވަކިކުރަން ވެސް މަޖިލީހުގެ ބައެއް މެންބަރުން އަންނަނީ މަސައްކަތް ކުރަމުންނެވެ. ބައެއް މަޖިލީސް މެންބަރުން ވިދާޅުވާ ގޮތުގައި ޕީއެންސީގެ ތެރެއިން އަންނަނީ އަބްދުއްރަހީމްގެ އިތުބާރު ނެތްކަމުގެ މައްސަލަ ހުށަހަޅަން ސޮއި ހަމަކުރަމުންނެވެ. ރައީސް މުއިއްޒު އަންގަވައިގެން ކަމެއް، އެ މެންބަރުން ބޭނުންވާވަރުން ކަމެއް ނޭނގެ އެވެ.

މިވަގުތު މެލޭޝިއާގައި ހުންނެވި އަބްދުއްރަހީމް އެ ހުންނެވި މަޖިލީހުގެ ރައީސް ކަމަކީ ޕީއެންސީއަށް އޮތް ސުޕަ މެޖޯރިޓީއާއެކު ރައީސްގެ އަތްޕުޅުގައި އޮތް ކަމެކެވެ. ޕީއެންސީގައި ހުރިހާ ބާރުވެރިކަމެއް އޮތީ ވެސް ރައީސްގެ އަތްޕުޅުގަ އެވެ. ޕީއެންސީގެ ޗެއާޕާސަންކަމުގައި ހުންނެވޭނީ ވެސް ރައީސް ބޭނުންފުޅު ނަމަ އެވެ. ނުވިތާކަށް، ޕާޓީން ވަކިވެއްޖެ ނަމަ، ނޫނީ ވަކިކުރިޔަސް އަބްދުއްރަހީމް ވިޔަސް އޭނާގެ ގޮނޑި ގެއްލޭނެ އެވެ. އެ ގޮތަށް ގާނޫނުއަސާސީ އެ އޮތީ އިސްލާހުކޮށްފަ އެވެ. އަބްދުއްރަހީމް ވެސް ރުހިގެންނެވެ.

ކޮންމެއަކަސް ރައީސް މައުމޫން އަބްދުއްގައްޔޫމަށާއި ރައީސް އަބްދުﷲ ޔާމީނަށް ދޯކާދިން އަބްދުއްރަޙީމްގެ ސިޔާސީ ބާރު އެ ދަނީ ކެނޑެމުންނެވެ. ސިޔާސީ ހަޔާތް މަޑުމަޑުން އެދަނީ ފަނޑުވަމުންނެވެ. އަބްދުއްރަހީމަށް ވެސް މަގާމު ގެއްލޭކަށް މާގިނަ ދުވަހެއް ނެތެވެ. އަބްދުއްރަހީމްގެ އިރު ސިޔާސީ އުދަރެހުން އޮއްސުމާ ކައިރިވެއްޖެ އެވެ.