ބޭންކް އޮފް މޯލްޑިވްސް (ބީއެމްއެލް) އިން މިދިޔަ އަހަރުގެ ފަހު ކުއާޓަރުގައި ސާފު ފައިދާގެ ގޮތުގައި 725 މިލިއަން ރުފިޔާ ހޯދައިފި އެވެ.

ރާއްޖޭގެ އެންމެ ބޮޑު ބޭންކުން މިއަދު ބުނީ މިދިޔަ ކުއާޓަރުގައި ސާފު ފައިދާގެ ގޮތުގައި 725 މިލިއަން ރުފިޔާ ލިބިފައިވާއިރު، މިއީ ތިން ވަނަ ކުއާޓަރާ އަޅައިބަލާއިރު 47 ޕަސެންޓްގެ ކުރިއެރުމެއް ކަމަށެވެ.

ބީއެމްއެލް އިން ބުނީ ސާފު ފައިދާ އިތުރުވެފައިވަނީ ޕްރޮވިޜަންގެ ގޮތުގައި ބެހެއްޓިފައިވާ ނިސްބަތުން ބޮޑު އަދަދެއް ލިބުމުން ކަމަށެވެ.

އެ ބޭންކަށް މިދިޔަ ކުއާޓަރުގައި ހިންގުމުގެ ފައިދާގެ ގޮތުގައި 685 މިލިއަން ރުފިޔާ ލިބިފައިވެ އެވެ.

އެ ބޭންކުން މިއަދު އާއްމުކުރި 2024 އަހަރުގެ އޮޑިޓް ނުކުރާ މާލީ ހިސާބުން ދައްކާ ގޮތުގައި އެ ބޭންކަށް ސާފު ފައިދާގެ ގޮތުގައި 2.1 ބިލިއަން ރުފިޔާ ލިބިފައިވެ އެވެ. މިއީ 2023 ވަނަ އަހަރާ އަޅައިބަލާއިރު 4 ޕަސެންޓްގެ އިތުރުވުމެކެވެ. އަދި ޖުމްލަ އެސެޓް ވަނީ 2023 ވަނަ އަހަރަށްވުރެ 3 ބިލިއަން ރުފިޔާ އިތުރުވެފައި ކަމަށް އެ ހިސާބުތަކުން ދައްކަ އެވެ. އެ ބޭންކުން ދޫކުރަމުން އަންނަ ލޯނުގެ ފެންވަރު ރަނގަޅުވެފައިވާއިރު، މިދިޔަ އަހަރު އާންމު ފަރުދުންނާއި ވިޔަފާރިތަކަށް 5.2 ބިލިއަން ރުފިޔާގެ އާ ލޯނު ދޫކޮށްފައިވާ ކަމަށް ތަފާސްހިސާބުތަކުން ދައްކަ އެވެ.

ބީއެމްއެލްގެ ރައުސުލްމާލާއި ލިކުއިޑިޓީ ރޭޝިއޯ ގާނޫނު ލާޒިމްކުރާ މިންވަރަށް ވުރެ މަތީގައި ދެމެހެއްޓިފައިވާ ކަމަށް ވެސް ރިޕޯޓުން ދައްކަ އެވެ.

މި ނަތީޖާއާ ގުޅޭގޮތުން ވާހަކަ ދައްކަވަމުން ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ 2024 ވަނަ އަހަރު ލިބުނު ހަރުދަނާ މާލީ ނަތީޖާއިން ބޭންކުގެ ކުރިއެރުން ދައްކުވައިދޭއިރު، މުޖުތަމައަށް ޚިދުމަތްކުރުމަށް ބޭންކުން ދޭ އަހުމިއްޔަތުކަން ހާމަވެގެންދާ ކަމަށެވެ. އަދި 2025 އަހަރު ބޭންކުން މަސައްކަތް ކުރާނީ މި ލިބުނު ނަތީޖާއާއެކު އިތުރު ކާމިޔާބީ ހޯދޭނެކަމުގެ ޔަގީންކަމާއެކު ކަމަށް އޭނާ ވިދާޅުވި އެވެ.

"ދިވެހި ރައްޔިތުންނަށް ފާގަތި މުސްތަގުބަލެއް ހޯދައިދީ، ކަސްޓަމަރުން ބޭނުންވާފަދަ ހެޔޮ ބަދަލެއްހޯދައިދިނުމުގެ އަޒުމާއެކު،" ޝަރީފު ވިދާޅުވި އެވެ.

މިދިޔަ ކުއާޓަރުގައި ބޭންކުން ވަނީ 2025 ވަނަ އަހަރު ނިމެންވާއިރަށް ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމަށް "މުޅި ރާއްޖެއަށް ބީއެމްއެލް އޭޓީއެމް" މަޝްރޫއެއް އިއުލާންކޮށްފަ އެވެ. އަދި ޖަމިއްޔާތައް ބާރުވެރިކުރުވައި، ރާއްޖޭގެ އެކި ކަންކޮޅުތަކުގައި ދެމެހެއްޓެނިވި ތަރައްގީގެ މަޝްރޫޢުތައް ހިންގުމަށް "ބޭންކް ފަންޑް" ލިބޭ 5 ފަރާތެއް ހޮވާފައިވެ އެވެ.

އެ ބޭންކުން 20 އަތޮޅުގައި 39 ބްރާންޗް، 95 ސެލްފް ސާވިސް ބޭންކިން ސެންޓަރު، 150 އޭޓީއެމް، އަދި އޭޖެންޓް ބޭންކިންގެ ހިދުމަތް ވެސް ބީއެމްއެލް އިން ދެމުން ގެންދެ އެވެ.