ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާތަކަށް ހިޔާނާތްތެރިވުމުގެ ތުހުމަތުގައި އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް އުފުލާފައިވާ ދެ ދައުވާއަށް އޭނާ މިއަދު އިންކާރުކޮށް, އެއީ ކަން ހިނގި ގޮތް ނޫން ކަމަށް އޭނާގެ ފަރާތުން ބުނެފި އެވެ.

ބައްސާމްގެ މައްޗަށް އެ ދައުވާކުރަނީ ފީފާއިން ފޮނުވި ފައިސާގެ ތެރެއިން 10،000 ޑޮލަރު އޭނާގެ އަމިއްލަ އެކައުންޓަށް ފޮނުވައި، އަމިއްލަ ކަންކަމަށް ބޭނުންކޮށްފައިވާ ކަމަށް ބުނެ އެވެ. އެ މައްސަލާގައި ކުރަނީ ހިޔާނާތާއި މަނީ ލޯންޑްރިންގެ ދައުވާ އެވެ.

ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ދައުވާއަށް ޖަވާބުދާރީވާން އިތުރު ވަގުތު ބޭނުންވާ ކަމަށް ބައްސާމްގެ ވަކީލް ވިދާޅުވި ނަމަވެސް، އެ މައްސަލަ ބައްލަވާ ގާޒީ ވަނީ އެކަމަށް ދެކޮޅު ހައްދަވައިފަ އެވެ.

ބައްސާމްގެ ވަކީލް ވިދާޅުވީ އެ ދެ ދައުވާއަށް ވެސް އިންކާރު ކުރާ ކަމަށާއި ދައުވާގައި ބުނަނީ ކަން ހިނގާފައިވާ ގޮތަށް ނޫން ކަމަށް ވަކީލް ވިދާޅުވި އެވެ.

ދެން އަޑުއެހުމެއް ބާއްވާނީ އެ ހުށަހެޅުންތައް ހުށަހެޅުމަށެވެ.

ދައުލަތުން ބުނެފައިވާ ގޮތުގައި އެ ފައިސާ ބޭނުން ކޮށްގެން ބައްސާމް ކުއްޔަށް ނަގައިގެން އުޅުނު ރެހެންދި ފްލެޓްގެ ކުލި ދެއްކުމަށާއި އަމިއްލަ ކަންކަމަށް އެ ފައިސާ ބޭނުންކޮށްފައިވެ އެވެ. އަދި އެ 10،000 ޑޮލަރު ދައުލަތަށް ނަގައިދިނުމަށް އެދިފައިވެ އެވެ.

ބައްސާމްގެ މައްޗަށް އެފްއޭއެމްގެ އެހެން ފައިސާތަކަކާ ގުޅޭ މައްސަލައެއްގައި ވެސް މަނީ ލޯންޑްރިން އާއި ހިޔާނާތުގެ އިތުރު ދައުވާއެއް ވެސް ކޮށްފައިވެ އެވެ. އެ މައްސަލާގައި ހިޔާނާތުގެ ދައުވާ އުފުލާފައިވަނީ އަމިން ކޮންސްޓްރަކްޝަންގެ އަމީން އެވެނިއު އިން އެޕާޓްމަންޓެއް ގަތުމަށްޓަކައި އެފްއޭއެމްގެ 1.2 މިލިއަން ޑޮލަރަށް އޭނާ ހިޔާނާތްތެރިވެފައިވާ ކަމަށް ބުނެ އެވެ. .

މަނީ ލޯންޑްރިންގެ ދެވަނަ ދައުވާ އުފުލީ އަމީން އެވެނިއުގެ ދެ ޕެންޓްހައުސެއް ބައްސާމް ގަތުމަށްޓަކައި އަމިން ކޮންސްޓްރަކްޝަނަށް ދައްކަންޖެހޭ ޖުމްލަ 25 މިލިއަން ރުފިޔާގެ ތެރެއިން ބުކިން ފީ އާއި ކޮމިޓްމަންޓް ފީ ހިމެނޭ ގޮތަށް އެ ތަނުގެ އަގަށްވާ ފައިސާ އެފްއޭއެމްގެ ޑޮލަރު އެކައުންޓުން އެކިއެކި ކުންފުނިތަކަށް ފައިސާ ފޮނުވައިގެން އަމިން ކޮންސްޓްރަކްޝަނަށް ދައްކާފައިވާތީ އެވެ.

އެ މައްސަލާގައި ބައްސާމް ގަނެފައިވާ އެޕާޓްމެންޓްތައް ފުލުހުން ވަނީ ހިފަހައްޓައިފަ އެވެ.