ފަތުރުވެރިކަމުގެ ދާއިރާގެ ނަޒާހަތްތެރިކަމާ ގުޅޭ ބައިނަލްއަގުވާމީ ފޯރަމެއް ރާއްޖޭގައި ބޭއްވުމަށް ނިންމައިފި އެވެ.

މި ފޯރަމް އަކީ، ސައުދީ އަރަބިއްޔާގެ އޯވަސައިޓް އެންޑް އެންޓި ކޮރަޕްޝަން އޮތޯރިޓީ އާއި ރާއްޖޭގެ އެންޓި ކޮރަޕްޝަން ކޮމިޝަން (އޭސީސީ)ން ގުޅިގެން، އިސްލާމީ ގައުމުތަކަށް ހާއްސަކޮށްގެން ކުރިއަށް ގެންދާ ފޯރަމްއެކެވެ.

މި ފޯރަމް ރާއްޖޭގައި ބޭއްވުމަށް ހަމަޖެހިފައިވާއިރު، ފޯރަމް އޮންނާނީ މޭ މަހުގެ 6 އިން 7 އަށް ވިލާ ނޯޓިކާ ރިސޯޓުގައި ކަމަށް އޭސީސީން ބުނެ އެވެ. އެގޮތުން އޯގަނައިޒޭޝަން ފޯ އިސްލާމިކް ކަންޓްރީސް (އޯއައިސީ)ގެ މެންބަރު ގައުމުތަކުގެ އެންޓި ކޮރަޕްޝަން އިދާރާތަކާއި، ފަތުރުވެރިކަމުގެ އިދާރާތަކާއި ބައިނަލްއަގުވާމީ އެހީދޭ ޖަމާއަތްތަކުން މި ފޯރަމްގައި ބައިވެރިވާނެ ކަމަށް އޭސީސީން ބުނެ އެވެ.

މިމަހުގެ 10 ވަނަ ދުވަހާއި ހަމައަށް މިފޯރަމުގައި ބައިވެރިވުމުގެ ފުރުސަތު ހުޅުވާލާފައިވާއިރު، މިހާތަނަށް 50 އަށް ވުރެ ގިނަ ފަރާތަކުން ރަޖިސްޓްރީކޮށްފައިވާ ކަމަށް ވެސް އޭސީސީން ބުނެ އެވެ.

އޭސީސީގެ ޑިރެކްޓަ އޮފް ޕްރިވެންޝަން ފާތިމަތު އިބްނާ ވިދާޅުވިގޮތުގައި، ފަތުރުވެރިކަމުގެ ދާއިރާއަކީ ކޮރަޕްޝަންގެ ހިރާސް ބޮޑު ދާއިރާއެކެވެ. އަދި މި ދާއިރާއަށް ހާއްސަކޮށް މި ފޯރަމް ބާއްވަން ނިންމީ، މިއީ މިހާތަނަށް އެހާ ބޮޑަށް ސަމާލުކަން ދެވިފައި ނުވާ ދާއިރާއަކަށް ވާތީ ކަމަށް އޭނާ ވިދާޅުވި އެވެ.

ފޯރަމް ނިމޭއިރު، މި ދާއިރާގައި ހުރި ހިރާސްތައް ނައްތާލުމަށް ބޭނުންވާ އުސޫލުތަކެއް އެކުލަވާލެވޭނެ ކަމަށް އޭސީސީން ބުނެ އެވެ.