ބްލެންހައިމް ޕެލަސްއަށް ބަޔަކު ވަދެ، އަގުހުރި ރަން ފާޚާނާއެއް ވަގަށް ނެގި މައްސަލައެއް އޮކްސްފޯޑް ކްރައުން ކޯޓުން ނިންމައިފި އެވެ.

"އެމެރިކާ" މިނަން ދީފައިވާ 2.8 މިލިއަން ޕައުންޑުގެ އަގުހުރި މި ފާހަނާ ވަގަށް ނަގާފައިވަނީ، ބަޔަކު މުގުރު ބޭނުންކޮށްގެން އެތަން ތަޅާލައިގެން ވަދެ އެވެ. އަދި އެމީހުން އެކަން ކޮށްފައިވަނީ އެންމެ 5 މިނެޓުގެ ތެރޭގައި ކަމަށް ވެސް ހާމަވެފައިވެ އެވެ.

އިޓަލީގެ ކަލާކާރު މައުރިޒިއޯ ކަޓެލާންގެ އާޓްވޯކެއް ކަމުގައިވާ މި ފާޚާނާއަކީ، ސާ ވިންސްޓަން ޗާޗިލް އުފަންވި އޮކްސްފޯޑްޝަޔާގެ ކަންޓްރީ ހައުސް ބްލެންހައިމް ޕެލަސްގައި ބެހެއްޓި، ބޭނުންކުރެވޭ ގޮތަށް ހުރި ފާޚާނާއެކެވެ. 18 ކެރެޓްގެ މި ރަން ފާޚާނާގެ ބަރުދަނަކީ ގާތްގަނޑަކަށް 98 ކިލޯގްރާމެވެ. އަދި މިއީ ހަ މިލިއަން ޑޮލަރަށް އިންޝުއަރެންސް ކޮށްފައިވާ އެއްޗެއް ކަމަށް ޕްރޮސިކިއުޝަނުން އޮކްސްފޯޑް ކްރައުން ކޯޓުން ބުނެފައިވެ އެވެ.

ވަގަށް ނެގުނު އިރު، ހަމައެކަނި ރަނުގެ އަގު ގާތްގަނޑަކަށް 2.8 މިލިއަން ޕައުންޑު ހުންނާނެ ކަމަށް ބެލެވެ އެވެ. މި ފާހާނާ ވަގަށް ނަގާފައިވަނީ 14 ސެޕްޓެމްބަރ 2019 ވަނަ އަހަރުގަ އެވެ.

މި މައްސަލަ ކޯޓުން މިފަހުން ނިންމާފައިވާއިރު، މައްސަލައިގައި އެފަރާތަކަށް ދައުވާކޮށްފައިވާ، 39 އަހަރުގެ މައިކަލް ޖޯންސް، އާޓްވޯކް ވަގަށް ނެގިކަމަށް ބުނާ ތުހުމަތުތަކަށް އިންކާރުކޮށްފައިވެ އެވެ. އޭނާގެ އިތުރުން، 36 އަހަރުގެ ފްރެޑެރިކް ޑޯ ކިޔާ މީހާއާއި، 41 އަހަރުގެ ބޯރާ ގުޗުކް، ކުށުގެ ގޮތުގައި ހޯދާފައިވާ މުދާ ބަދަލުކުރުމަށް ރޭވުމުގެ ކުށަށް އިންކާރުކޮށްފައިވެ އެވެ.

"މި ވައްކަމަކީ ވަރަށް ރަނގަޅަށް ރާވައިގެން، އަވަހަށް ކޮށްލާފައިވާ ކަމެކެވެ،" ޕްރޮސިކިއުޓަރު ޖުލިއަން ކްރިސްޓޯފާ ކޭސީ ބުނެފައިވެ އެވެ.

"އެމީހުންނަށް ދާންޖެހޭ ތަން ސީދާ އެނގިފައިވެ އެވެ. ފާޚާނާ ހުރި ކިއުބިކަލްގެ ލަކުޑި ދޮރު ތަޅާލައި، ފުރިހަމައަށް ހޮޅިއަޅާފައި ހުރި ފާޚާނާ ނަގައި، ހޮޅިތަކުން ފެން އޮހޮރެމުންދާ ގޮތަށް ދޫކޮށްލާފައި ފުރައިގެން ގޮސްފައިވޭ،" ކްރިސްޓޮފާ އިތުރަށް ބުންޏެވެ.

އޭނާ އިތުރަށް ބުނީ، ޖުމްލަކޮށް އެމީހުން އިމާރާތުގެ ތެރޭގައި ހޭދަކޮށްފައި ވަނީ އެންމެ ފަސް މިނެޓު ކަމަށެވެ.