ހިންދީ ފިލްމީ ދާއިރާ، ބޮލީވުޑް ކުރިއެރުވުމުގައި މުހިއްމު ދައުރެއް އަދާކުރި ވެޓެރަން އެކްޓަރު މަނޯޖް ކުމާރު އިއްޔެ ހެނދުނުގެ ވަގުތެއްގައި މަރުވެއްޖެ އެވެ.

މީޑިއާ ހަބަރުތައް ބުނާ ގޮތުގައި އުމުރުން 87 އަހަރުގެ މަނޯޖް މަރުވީ ކުއްލި ގޮތަކަށް ޖެހުނު ސީރިއަސް ހާޓް އެޓޭކަކަށް ފަރުވާ ހޯދަމުން ދަނިކޮށް މުމްބާއީގަ އެވެ.

އޭގެ އިތުރުން ވެސް މަނޯޖް ވަނީ އޭނާގެ އުމުރުގެ ފަހު އަހަރުތަކުގައި ގިނަ ދުވަސްތަކެއް ވަންދެން ލިވާ ބައްޔަކަށް ވެސް ފަރުވާ ހޯދާފަ އެވެ.

ބޮލީވުޑް މަޝްހޫރުވެގެން އައި ދުވަސްވަރު އެންމެ އިިސްކޮށް އުޅުނު މަނޯޖް ފާހަގަވެފައިވަނީ އިންޑިއާގެ ގައުމީ ރޫހު ދައްކުވައިދޭ ފިލްމުތައް ޕްރޮޑިއުސްކޮށް އެ ފިލްމުތަކުގައި އެކްޓްކުރާ ފަރާތެއްގެ ގޮތުގަ އެވެ.

އެގޮތުން އޭނާގެ ފާހަގަކޮށްލެވޭ ފިލްމުތަކުގެ ތެރޭގައި "އުޕްކާރް" (1967)، "ޕޫރަބް އޯރް ޕަސްޗިމް" (1970)، އަދި "ރޯޓީ ކަޕްޑާ އޯރް މަކާން" (1974) ހިމެނެ އެވެ.

މަނޯޖް މަރުވުމާއެކު ބޮލީވުޑްއާއި އިންޑިއާގެ ސިޔާސީ ދާއިރާގެ ގިނަ ބަޔަކު ވަނީ ހިތާމައިގެ ޝުއޫރުތައް ފާޅުކޮށްފަ އެވެ. އޭގެ ތެރޭގައި އެގައުމުގެ ރައީސް ދްރޯޕަޑީ މުރުމުރު ވެސް ހިމެނެ އެވެ.

މަނޯޖްގެ އާއިލާއިން ބުނާ ގޮތުގައި އޭނާގެ ޖަނާޒާގެ ކަންތައްތައް ކުރިއަށް ގެންދާނީ މިއަދުގެ ވަގުތެއްގަ އެވެ. އެ ޖަނާޒާއަށް ގިނަ ބަޔަކު އެއްވާނެ ކަމަށް ބެލެވެ އެވެ.