ރާއްޖެއިން ބޭރުގައި ކިޔަވާ ދަރިވަރުންނަށް ފައިސާ ލަހުން ޖަމާކުރުމާއި ދަރިވަރުންގެ ޝަކުވާތަކަށް މިނިސްޓްރީން ޖަވާބު ނުދޭ މައްސަލަ ހައްލުކުރައްވާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.

ރައީސް މިހާރު އިނގެރޭސިވިލާތައް ކުރައްވަމުން ގެންދަވާ ދަތުރުފުޅުގައި އެ ގައުމުގައި ކިޔަވަން ތިބި ދިވެހި ދަރިވަރުންނާ ބައްދަލުކުރައްވައި ރައީސް ވިދާޅުވީ ސްކޮލަޝިޕުގައި ކިޔަވަން ގޮސްފައި ތިބި ކުދިން އަދި ލޯނުގައި ކިޔަވާ ކުދިންގެ ޓިއުޝަން ފީ ދެއްކުމުގައި ދިމާވި މައްސަލަތައް ހައްލުކުރަން ފާއިތުވި ދުވަސްތަކުގައި ވަރަށް ގިނަ މަސައްކަތް ކޮށްފައިވާ ކަމަށެވެ.

މީގެ އިތުރުން ރައީސް ވިދާޅުވީ ރާއްޖެއިން ބޭރުގައި ކިޔަވާއިރު ފައިސާ ލިބުން ލަސްވުމުން ދިމާވާ ދަތިތައް ވަރަށް ރަނގަޅަށް އެނގިވަޑައިގަންނަވާ ކަމަށެވެ.

އެ މަނިކުފާނު ވިދާޅުވީ ކޮންމެ ގައުމެއްގައި ހުރެގެން ކިޔެވިއަސް އެ މައްސަލަ ހައްލުކޮށްދެއްވާނެ ކަމަށެވެ.

ރައީސް ވިދާޅުވީ ދަރިވަރުން ހަޔަ އެޑިއުކޭޝަން މިނިސްޓްރީއަށް ފޮނުވާ މެއިލްތަކަށް މިނިސްޓްރީން ޖަވާބު ނުދޭ މައްސަލަ ވަރަށް ގިނައިން ލިބިވަޑައިގަންނަވާ ކަމަށެވެ. އެހެންކަމުން އެކަމަށް ހައްލު ހޯއްދަވާދެއްވާނެ ކަމުގެ ޔަގީންކަން ރައީސް ވަނީ ދެއްވާފަ އެވެ.

އިނގިރޭސިވިލާތުގެ ލިވަޕޫލް ފުޓްބޯލް ކްލަބް (އެލްއެފްސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގުޅިގެން ރާއްޖޭގެ ފަތުރުވެރިކަން އިޝްތިހާރު ކުރުމަށް ކުރިއަށްގެންދާ ކޯ-ބްރޭންޑް ކެމްޕޭން ހަރަކާތް ފެށުމުގައި ބައިވެރިވެވަޑައިގަތުމަށް، ރައީސް މުހައްމަދު މުއިއްޒު އިނގިރޭސިވިލާތުގެ ލިވަޕޫލް ސިޓީއަށް ވަޑައިގެންނެވީ މި މަހުގެ އެއްވަނަ ދުވަހު އެވެ.

މި ދަތުރުފުޅުގައި ރައީސް ވަނީ އިނގިރޭސިވިލާތުގައި އެ މަނިކުފާނުގެ ދަރިކަނބަލުން ކިޔަވަމުން ގެންދަވާ ޔުނިވާސިޓީއަށްވެސް ރައީސް ވަނީ ޒިޔާރަތްކުރައްވާފަ އެވެ.