މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި ހައްޔަރުކުރި ދެ މީހެއްގެ ބަންދުގެ މުއްދަތު އިތުރުކުރުމަށް ކްރިމިނަލް ކޯޓުން އަމުރުކޮށްފި އެވެ.

މި މައްސަލައާ ގުޅިގެން ހައްޔަރުކުރެވިފައިވަނީ، މުހައްމަދު ތިބާގް، 39، މ. ސައިރިއަސް އާއި ފަރީދާ އަބްދުއްރަހުމާން، 35، ވ. ރަކީދޫ، ޖަންބުގެ، އެވެ.

މި މައްސަލައާ ގުޅިގެން، ފުލުހުންގެ ކައުންޓަ ނާކޮޓިކްސް އިންޓެލިޖެންސް އަދި ޑްރަގް އެންފޯސްމަންޓް ޔުނިޓުން ގުޅިގެން ހިންގި އޮޕަރޭޝަނެއްގައި، މާފަންނުގެ އެޕާޓްމަންޓެއް ބަލައި ފާސްކުރުމަށްފަހު، ތިން މީހުން ވަނީ މިދިޔަ މަހުގެ 20 ވަނަ ދުވަހު ހައްޔަރުކޮށްފަ އެވެ. މީގެ ތެރޭގައި ހިމެނެނީ މުހައްމަދު ތިބާގް، ފަރީދާ އަބްދުއްރަހްމާން އަދި މުޙައްމަދު ޝާނީޒު، ސ. މަރަދޫ ފޭދޫ، ނަސީމީގެ އެވެ.

މި މައްސަލައިގައި ހައްޔަރުކުރެވުނު އަންހެން މީހާ ބުނެފައި ވަނީ، ފެނުނު މަސްތުވާތަކެއްޗާ އޭނާއާ ގުޅުމެއް ނެތް ކަމަށާއި، އެ ގެއަށް ޒިޔާރަތްކުރި ސަބަބަކީ ގޭގެ ވެރިފަރާތަށް އެހީތެރިވުމަށް ކަމަށެވެ.

ކޯޓުން ފުރަތަމަ ކަނޑައެޅީ، ތިބާގް އަދި ފަރީދާ 15 ދުވަހުގެ މުއްދަތަށް ބަންދުކުރުމަށެވެ. އެ މުއްދަތު ހަމަވުމާ ގުޅިގެން، އިތުރު 15 ދުވަހަށް އެ ދެ ފަރާތުގެ ބަންދު އިތުރުކުރުމަށް ކޯޓުން ނިންމާފައިވެ އެވެ.

މި މައްސަލައިގެ ތަހުގީގު ދަނީ ކުރިއަށެވެ.