ހުރިހާ މީޑިއާ އަކަށް ވެސް ހިނގާ ބިލެއް މަޖިލީހަށް ހުށަހެޅުމުގެ ކުރިން، ގައުމީ ފެންވަރުގައި ރަނގަޅު ދިރާސާއެއް ކުރުން މުހިންމު ކަމަށް ބްރޯޑްކާސްޓިން ކޮމިޝަންގެ ރައީސް ސަފާ ޝަފީގު ވިދާޅުވެއްޖެ އެވެ.

ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފާއިވާ ބިލާ މެދު ނޫސްވެރިންނާއި މީޑިއާ ކައުންސިލާއި މޯލްޑިވްސް ޖާނަލިސްޓްސް އެސޯސިއޭޝަންގެ އިތުރުން ބޭރުގެ ގިނަ ޖަމިއްޔާތަކަކުން ކަންބޮޑުވުން ފާޅުކޮށްފައިވާ ވަނިކޮށް، ބިލް މަޖިލީހުން ވަނީ ބަލައިގެންފަ އެވެ.

މި ބިލު މަޖިލީހަށް ހުށަހަޅާފައިވަނީ ސަރުކާރުން ބޭނުންވާ ގޮތަށް ހުރިހާ މީޑިއާތަކެއް ތަޅު އެޅުވޭ ގޮތަށެވެ. މިކަމާ ގުޅިގެން ބްރޯޑްކާސްޓިންގ ކޮމިޝަނުން ވެސް ކަންބޮޑުވުން ފާޅުކޮށްފައި ވާއިރު، އެ ކޮމިޝަނުގެ ރައީސް ސަފާ ޝަފީގު ވިދާޅުވީ ކަމާގުޅޭ ފަރާތްތަކާ މަޝްވަރާނުކޮށް، އެއްވެސް ދިރާސާއެއް ކުރުމެއް ނެތި ހުށަހަޅާފައިވާތީ ކަންބޮޑުވާ ކަމަށެވެ.

އޭނާ ވިދާޅުވީ މީޑިއާތައް ރެގިއުލޭޓްކޮށް ފިޔަވަޅު އެޅޭ ގޮތްތައް ގާނޫނެއްގައި ކަނޑައަޅާއިރު، ގައުމީ ފެންވަރުގެ ދިރާސާއެއް ކުރެވެން ޖެހޭނެ ކަމަށެވެ. ބިލު އޮތީ ހުރިހާ ބާވަތެއްގެ މީޑިއާއަކަށް ވެސް ހިނގާ ގޮތަށް ކަމަށްވާތީ، މިކަމުގައި އެންމެ ރަނގަޅު ގޮތަކީ ކޮބައިިކަން ބެލުމަށް ދިރާސާއެއް ހެދުމަކީ ވަރަށް މުހިންމު ކަމެއްގެ ގޮތުގައި ސަފާ ފާހަގަކުރެއްވި އެވެ.

ސަފާ ވިދާޅުވީ ހިޔާލުފާޅުކުރުމުގެ މިނިވަންކަމާ މީޑިއާއާ ގުޅިފައި ވާތީ، އެކަމާ ގުޅޭ މާއްދާތަކެއް ލިޔާއިރު ރާއްޖޭން އެއްބަސްވެފައިވާ ބައިނަލްއަގުވާމީ މުއާހަދާތަކާ ފުށުއަރާ މިންވަރު ވެސް ބަލަންޖެހޭނެ ކަމަށެވެ. ކުއްލި ގޮތަކަށް އެއްވެސް މިންވަރަކަށް ދިރާސާނުކޮށް، އެއްވެސް މިންވަރަކަށް ކަންކަން ނުބަލައި ބިލެއް ގެނައުމުން އެފަދަ މުއާހަދާތަކާ ހިލާފާވުމުގެ ފުރުސަތު ވެސް އޮންނާނެ ކަމަށް އޭނާ ވިދާޅުވި އެވެ.

އޭނާ ވިދާޅުވީ ރާއްޖެއަށް ބޭނުންވަނީ ސެލްފް ރެގިއުލޭޓްރީ ނިޒާމެއްތޯ ނޫނީ ކޯ ރެގިއުލޭޓްރީ ނިޒާމެއްތޯ ވެސް ބަލަން ދިރާސާއެއް ކުރަން ޖެހޭ ކަމަށާއި އެކަން ނުބަލައި ގާނޫނެއް ގެނަޔަސް އެއިން ނަތީޖާއެއް ނުނެރެވޭނެ ކަމަށެވެ. ބިލު ޑްރާފްޓް ކުރުމުގެ މަރުހަލާގެ ތެރޭގައި ހިޔާލާއި މަޝްވަރާ ބޭނުންވަނީ އެހެންވެކަން އޭނާ ފާހަގަކުރެއްވި އެވެ.

ނޫސްވެރިން "މީޑިއާ ކޮންޓްރޯލް ބިލް"ގެ ގޮތުގައި މުހާތަބު ކުރާ ބިލު އޮތް ގޮތުން އެ ތަންފީޒު ކުރަން ފަސޭހަ ނުވާނެ ކަމަށް ސަފާ ވިދާޅުވި އެވެ. އޭނާ ވިދާޅުވީ މިހާރު ވެސް ބްރޯޑްކާސްޓިން ކޮމިޝަނުގައި މޮނީޓާކުރުމުގެ ވަސީލަތްތަކެއް ނެތް ކަމަށާއި އިންސާނީ ވަސީލަތެއް ވެސް ނެތް ކަމަށެވެ. އެހެންވެ ގާނޫނަކުން ކަންކަން އަދި ކަނޑައެޅިޔަސް، އެކަމަށް ބޭނުންވާ ވަސީލަތްތައް ފޯރުކޮށްނުދީ އެކަން ހާސިލްނުވާނެ ކަމަށް ވިދާޅުވި އެވެ.