އަވަށްޓެރި ސްރީލަންކާއަށް ކުރަމުންދާ ވިއްސާރައިގައި ގެއްލުންވި ފަރާތްތަކަށް އެހީތެރިވުމުގެ ގޮތުން ރާއްޖެއިން 50،000 ޑޮލަރާއި 25،000 މަސްދަޅު ކޭސް ހަދިޔާކުރުމަށް ނިންމައިފި އެވެ.

ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ، ލަންކާގެ ރައްޔިތުންނަށް އެހީ ދިނުމަށް ނިންމީ، 'ޑިޓްވާ' ތޫފާން ގެ ސަބަބުން ލަންކާގެ އެކި ހިސާބުތަކަށް ބޯކޮށް ވާރޭވެހި އެ ގައުމުގެ ރައްޔިތުންނަށް ދިމާވެފައިވާ ގެއްލުންތަކާއި ދަތިތަކުން އަރައިގަތުމަށް އިންސާނީ އެހީ ފޯރުކޮށްދިނުމުގެ ގޮތުން ކަމަށެވެ.

ރާއްޖެއިން ލަންކާއަށް އެހީ ފޮނުވަން ނިންމީ ދެ ގައުމުގެ ދެމެދުގައި އޮތް ގާތް އެކުވެރި ގުޅުން ރަމްޒުކޮށްދީ ދިވެހިން ލަންކާ ރައްޔިތުންނާއެކު ތިބިކަން ހާމަކުރުމުގެ ގޮތުން ކަމަށް ބަޔާނުގައި ބުނެފައިވެ އެވެ.

ލަންކާ ސަރަހައްދުގައި މިދިޔަ ބުރާސްފަތި ދުވަހު އުފެދުނު 'ޑިޓްވާ' ތޫފާނުގައި އެ ގައުމުން މިހާތަނަށް 64 މީހުން މަރުވެ، 34 މީހަކު ގެއްލިފައިވާ ކަމަށް ރިޕޯޓްތައް ބުނެ އެވެ. އެ ގައުމުގެ ސަރުކާރުން ދަނީ ތޫފާނުގައި ގެއްލުންވި ފަރާތްތަކަށް އެހީތެރިކަން ފޯރުކޮށްދިނުމާއި ގެއްލުނު މީހުން ހޯދުމުގެ މަސައްކަތް ކުރަމުންނެވެ.

ލަންކާއަކީ ގިނަ އަދަދަކަށް ދިވެހިން ދިރިއުޅެ އަދި ޒިޔާރަތް ކުރާ ގައުމަކަށްވާއިރު، ލަންކާގައި ހުންނަ ދިވެހި ހައިކޮމިޝަނުން ވަނީ ދިވެހިން ސަމާލުވެ ރައްކާތެރިވުމަށް އިލްތިމާސްކޮށްފަ އެވެ.