އެމްޑީޕީގެ ހުސްވެފައިވާ ޗެއާޕާސަންގެ މަގާމަށް މެންބަރަކު އިންތިހާބުކުރެވެންދެން އެ މަގާމުގެ މަސްއޫލިއްޔަތުތައް ވަގުތީގޮތުން އަދާކުރަން ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު, އިންތިހާބު ވެއްޖެ ކަމަށް އެ ޕާޓީން ނިންމި ނަމަވެސް އެ މަގާމު ދޫކޮށްލަން އޭނާ މިއަދު ނިންމައިފި އެވެ.

މިދިޔަ ހުކުރު ދުވަހުގެ ރޭ އެމްޑީޕީން ބޭއްވި ގައުމީ މަޖިލީހުގެ ބައްދަލުވުމުގައި, ވަގުތީ ޗެއާޕާސަންގެ މަގާމަށް ކުރިމަތިލެއްވި ވަހީދު އެ މަގާމަށް ގެންނަން ފެނޭތޯ ނުވަތަ ނޫންތޯ ބެލުމަށް ނެގި ވޯޓުގެ ނަތީޖާއާ މެދު ސުވާލު އުފެދި އެ ބައްދަލުވުން ހޫނުވެގެން ފަހުން ވަނީ ބައްދަލުވުން ނިންމާލައިފަ އެވެ.

ބައްދަލުވުން ހޫނުވެ ނިންމާލަން ޖެހުނީ ޗެއާގެ މަގާމަށް އަބްދުﷲ ވަހީދު ހޮވުމަށް 48 ވޯޓް ބޭނުންވާއިރު, އެ ރޭ ލިބުނީ 47 ވޯޓް ކަމަށް ސެކެޓްރިއޭޓުން އިއުލާން ކުރުމާއެކުއެވެ. ވަހީދު އަށް މި އަދަދަށް ވޯޓު ލިބުނު އިރު އެމްޑީޕީގެ ބައެއް މެމްބަރުން ވަނީ އަޑު ގަދަކޮށް ތަނުގައި ޖަގަޑާ ހަދާފަ އެވެ.

ފަހުން އެކަން ހިނގައިދިޔަ ގޮތް ބެލުމަށް ފަހު, އެ ޕާޓީގެ ޗެއާޕާސަންގެ ނައިބު, އިބްރާހީމް ވަހީދު, އެ ޕާޓީގެ ރައީސް އަބްދުالله ޝާހިދަށް އިއްޔެ ފޮނުވި ރިޕޯޓްގައި ބުނެފައިވަނީ ވަހީދަށް 48 ވޯޓް ލިބި, އޭނާ ވަގުތީ ޗެއާޕާސަންގެ މަގާމަށް އިންތިހާބު ވެފައިވާ ކަމަށެވެ. އެ ރިޕޯޓްގައި ވޯޓް ލިބުނު ގޮތުގެ ތަފްސީލު ވެސް ހިމަނައިފައިވެ އެވެ.

ނަމަވެސް އަބްދުالله ވަހީދު މިއަދު އެމްޑީޕީއަށް ފޮނުވި ސިޓީއެއްގައި ވިދާޅުވީ އޭނާ އިންތިހާބުވި އެ މަގާމު ދޫކޮށްލަން ނިންމާފައިވާ ކަމަށެވެ. އެކަމުގެ ސަބަބުތައް އޭނާ ވަނީ ބަޔާނުގައި ހާމަ ކުރައްވައިފަ އެވެ.

ވަހީދު ވިދާޅުވިގޮތުގައި އޭނާ އެ މަގާމަށް ކުރިމަތި ލެއްވުމަށް ނިންމެވީ ޕާޓީގެ ޕާލަމެންޓްރީ ގުރޫޕުގެ މެންބަރަކު ގުޅުއްވައި އެކަމަށް އެދިވަޑައިގަތުމުން ކަމަށެވެ. އެ ހުށަހެޅުން އައުމާއެކު ޕާޓީގެ ރައީސް އަބްދުالله ޝާހިދާއި ޕާޓީގެ އެޑްވައިޒަރު, އަދި ކުރީގެ ރައީސް އިބްރާހީމް މުހައްމަދު ސޯލިހުގެ ލަފާ ހޯއްދެވި ކަމަަށާއި ދެ ބޭފުޅުން ވެސް ލަފާ ދެއްވީ އެކަމުގައި ކުރިއަށް ދިއުމަށް ކަމަށް ވަހީދު ވިދާޅުވި އެވެ.

ނަމަވެސް އެ ދެ ބޭފުޅުންނާއި ޕާލަމެންޓްރީ ގުރޫޕުގެ ބޭފުޅުން ފަހުން އަމަލު ކުރެއްވީ ވިދާޅުވިގޮތާ ހިލާފަށް ކަމަށް ވަހީދު ވިދާޅުވި އެވެ. އެގޮތުން ވޯޓާ ހަމައަށް ދިޔައިރު، އެ މަގާމަށް ނުކުތުމަށް ހިތްވަރު ދެއްވި ޕާޓީގެ ރައީސާއި ޕާޓީގެ އެޑްވައިޒަރު އަދި ޕާލަމެންޓްރީ ގުރޫޕުގެ މެންބަރުން އަމަލު ކުރެއްވީ މުޅިން ދިމާ އިދިކޮޅަށް ކަމަށް ވަހީދު ވިދާޅުވި އެވެ. އަދި އެ ވޯޓަށް ފަހު އެ ފަރާތްތަކުން އަމަލު ކުރައްވަމުން ގެންދަވާފައިވާ ގޮތުން އެ މަގާމު ފުރުމުގައި ބޮޑެތި ހުރަސްތަކެއް ކުރިމަތި ކުރުވާނޭ ކަމާ މެދު ޝައްކު ނުކުރާ ކަމަށް ވެސް ވަހީދު ވިދާޅުވިއެވެ.

އެހެންކަމުން އެ ސަބަބާ ހުރި އެ މަގާމުގައި އިތުރަށް ދެމި ނުހުންނަށް ނިންމާފައިވާ ކަމަށް ވަހީދު ވިދާޅުވިއެވެ. އޭނާ އެގޮތަށް ނިންމީ ޕާޓީ އެކަތިގަނޑެއްގެ ގޮތުގައި ބޭއްވުމަށް ކަމަށް ވަހީދު ވިދާޅުވި އެވެ.

އަދި ކުރިއަށް އޮތްތަނުގައި އެފަދަ ގޮތަކަށް އަމަލު ނުކުރެއްވުމަށް, ސޯލިހާއި ޝާހިދުގެ ކިބައިން ވަހީދު ވަނީ އެދިވަޑައިގެންފަ އެވެ. އަދި ޕާޓީގެ ބަދަހިކަން ހިފެހެއްޓުމަށް އެ ދެ ބޭފުޅުން މަސައްކަތް ކޮށްދެއްވުމަށް އޭނާ އެދިވަޑައިގަތެވެ.

އެމްޑީޕީގެ ޗެއާޕާސަންގެ މަގާމުގައި ހުންނެވި ފައްޔާޒް އިސްމާއީލް އިސްތިއުފާ ދެއްވުމާއެކު, ސޯލިހާއި ކުރީގެ ރައީސް މުހައްމަދު ނަޝީދުގެ ވާދަވެރިކަން އަނެއްކާވެސް ވަނީ ބޮޑުވެފަ އެވެ.

ވަގުތީ ޗެއާޕާސަންގެ މަގާމަށް ސޯލިހުގެ ފެކްޝަނުން ގެންނަން ބޭނުންވީ މަޖިލީހުގެ ކުރީގެ ރައީސް މުހައްމަދު އަސްލަމް ކަމަށް އޭރު ވާހަކަ ދެކެވުނެވެ. ނަމަވެސް އެމްޑީޕީގެ ގާނޫނީ ޓީމުން ލަފާ ދިނީ ގައުމީ މަޖިލީހުގައި ހިމެނިވަޑައިނުގަންނަވާ, އަދި އިންތިޚާބީ މަގާމެއްގައި ނެތް ބޭފުޅަކަށް އެ މަގާމަށް ވާދަ ނުކުރެއްވޭނެ ކަމަށެވެ. އެއާއެކު ވޯޓަށް ދިޔައީ ވަހީދުގެ ނަން އެކަންޏެވެ.