ފުވައްމުލަކު ފުނާޑު އަވަށު ޗަސް ބިސް ސަރަހައްދުގައި ރޭ ރޯވި އަލިފާންގަނޑު ބަންޑާރަ ކިޅިއަށް ފެތުރި އެތަނުގެ ބޮޑު ސަރަހައްދެއް އަނދާފައިވާ ކަމަށް ސިޓީ ކައުންސިލުން ބުނެފި އެވެ.

ފުވައްމުލަކު ސިޓީ ކައުންސިލުން މިއަދު ބުނީ ބަންޑާރަ ކިޅީގައި ހިނގި އަލިފާނުގެ ހާދިސާގައި 306،586 ހަ އަކަފޫޓްގެ ސަރަހައްދެއް އަނދާފައިވާ ކަމަށެވެ. ޗަސް ބިން ސަރަހައްދުގައި ރޯވި އަލިފާންގަނޑު ކޮންޓްރޯލްކޮށް، އެއްކޮށް ނިއްވާލެވުނީ ރޭ ދަންވަރު 1:30 ހާއިރު އެވެ.

އަލިފާންގަނޑު ނިއްވާލެވިފައި ވަނީ އެމްއެންޑީއެފްގެ ފަޔާ އެންޑް ރެސްކިއު ޓީމާއި، ފުލުހުންނާއި، ކައުންސިލްގެ މުއައްޒަފުންނާއި އާއްމުންކުރި މަސައްކަތުންނެވެ.

ފުވައްމުލަކު ބަންޑާރަ ކިޅީގައި ރޭ ރޯވެ އަނދަނީ. އެތަނުގެ ބޮޑު ސަރަހައްދެއް ވަނީ އަނދާފައި. ފޮޓޯ: ފުވައްމުލަކު ސިޓީ ކައުންސިލް

ފުނާޑު އަވަށުގައި ރޭ 10 އެއް ޖަހާކަން ހާއިރު ރޯވި އަލިފާންގަނޑު އެންމެ ފުރަތަމަ ފެތުރިގެން ދިޔައީ ނޭޗާ ޕާކުގައި ހަދާފައިވާ ހަޓާއި ޖެޓީ އާ ދިމާއަށެވެ. އެ ހަޓާއި ޖެޓީގައި އަލިފަންގަނޑު ހިފުމުގެ ކުރިން އާއްމުންނާއި ސިފައިން ގުޅިގެން ކުރި މަސައްކަތުން ކޮންޓްރޯލް ކުރި އެވެ. ނަމަވެސް ވައި ޖެހޭ މިސްރާބު ބަދަލުވެ، އަލިފާންގަނޑު އެ ސަރަހައްދު އެހެން ދިމާއަކަށް ފެތުރިގެންދިޔަ އެވެ.

ފުވައްމުލަކު ޗަސް ބިން ސަރަަހައްދުގައި ދޭތެރެ ދޭތެރެއިން ރޯވެ ގަސްތައް އަނދައި ހުލިވެ އެވެ. އެތަނުގައި އާއްމުކޮށް ހެދިފައި ހުންނަނީ ހުއި އާއި ދަނބުގަހެވެ. މިދުވަސްވަރު ވައި ބާރުވުމުން އެ ގަސްތަކުގައި ހުޅު ހިފައި ވަރަށް ފަސޭހައިން އަލިފާންގަނޑު ފެތުރެ އެވެ.

އެ ސަރަހައްދުން އަލިފާނުގެ އަސަރު ފެނިއްޖެ ނަމަ ލަސްނުކޮށް ފުވައްމުލަކު ފަޔާ އެންޑް ރެސްކިއުގެ ނަންބަރު 6869118 އަށް ނުވަތަ، 9550254 އަށް ގުޅުމަށް ސިޓީ ކައުންސިލުން އެދެ އެވެ.