އީރާނާއި އެމެރިކާގެ މައްސަލަ އިތުރަށް ހޫނުވެ، ދެ ގައުމުންވެސް އިންޒާރު ދީފި އެވެ.

އީރާނުގެ ނިއުކްލިއާ ޕްރޮގްރާމް ހުއްޓާލުމަށް އެމެރިކާއާއެކު މަޝްވަރާގެ މޭޒަށް ގެނައުމަށް މަޖުބޫރުކުރުމުގެ ގޮތުން ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވިތާ ކުޑައިރުކޮޅެއްގެ ތެރޭގައި އީރާނުން ވަނީ ރައްދު ދީފަ އެވެ.

ބުދަ ދުވަހު ޓްރުތު ސޯޝަލްގައި ޓްރަމްޕް ވިދާޅުވީ އީރާނަށް ހަމަލާދިނުމުގެ ވަގުތު ކުޑަތަންވަމުންދާ ކަމަށެވެ. ޓްރަމްޕް މިހެން ވިދާޅުވެ އިންޒާރު ދެއްވަމުން ވިދާޅުވީ އެމެރިކާގެ ކަނޑުގެ ފައުޖެއް އިރާނާ ދިމާލަށް ދަތުރުކުރަމުންދާ ކަމަށާއި، އިރާނުން ނިއުކްލިއާ ހަތިޔާރު އުފެއްދުން ހުއްޓާލައި އާ އެއްބަސްވުމަކަށް ނައިސްފިނަމަ، ދެން ދޭ ހަމަލާ ކުރިއަށްވުރެ މާ ނުރައްކާތެރިވާނެ ކަމަށެވެ.

މިކަމަށް ރައްދު ދެއްވަމުން އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ، އެމެރިކާގެ ކޮންމެ ހަމަލާއަކަށް އީރާނުން ވަގުތުން ރައްދު ދޭނެ ކަމަށެވެ. އިރާނުގެ އުޑާއި، ބިމާއި، ކަނޑުގެ ސަރަހައްދަށް ދެވޭ ކޮންމެ އުދުވާނީ ހަމަލާއަކަށް ރައްދު ދިނުމަށް އިރާނުގެ ސިފައިން ތިބީ ހަމަލާ ދޭން ތައްޔާރަށް ކަމަށާއި، މިދިޔަ އަހަރުގެ ޖޫން މަހު އިޒްރޭލާއި އެމެރިކާއިން ދިން ހަމަލާތަކުން ލިބުނު ތަޖުރިބާގެ އަލީގައި މިފަހަރު މާ ވަރުގަދަ ރައްދެއް ދޭނެ ކަމަށް ބުދަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި އައްބާސް ވަނީ ވިދާޅުވެފަ އެވެ.

އީރާނުން ކުރިންވެސް ބުނެފައިވަނީ އެމެރިކާއިން ދެމުންދާ އިންޒާރުތަކަށް ފަހަތަށް ނުޖެހޭނެ ކަމަށާއި އަދި އެއްވެސް މަޝްވަރާއެއްވެސް ނުކުރާނެ ކަމަށެވެ.

މީގެ ކުރިންވެސް ދެ ގައުމުން އިންޒާރުތައް ބަދަލުކޮށްފައިވާއިރު، އިތުރަށް މަޝްރަހު ގޯސްވާނެ ކަމަށް ބެލެވެން ފަށާފައިވަނީ، އެމެރިކާގެ މަތިންދާބޯޓު އުފުލާ މަނަވަރު ޔޫ.އެސް.އެސް އަބްރަހަމް ލިންކަން އެ ސަރަހައްދަށް ފޮނުވުމާ ގުޅިގެންނެވެ. އަދި އިރާނުންވެސް ދަނީ ހޮރްމުޒް ކަނޑުއޮޅި ކައިރީގައި އަސްކަރީ ތަމްރީނުތައް ބާއްވަމުންނެވެ. އިރާނުގެ އިސްލާމިކް ރިވޮލިއުޝަނަރީ ގާޑް ކޯ އިން ވަނީ އެމެރިކާގެ ހަމަލާއަކަށް އެހީތެރިވެދޭ އެއްވެސް އަވަށްޓެރި ގައުމަކީ "ދުޝްމަނެއް" ކަމުގައި ބަލާނެ ކަމަށް އިންޒާރު ދީފަ އެވެ.