މަޝްހޫރު ރެޕް ލަވަކިޔުންތެރިޔާ ނިކީ މިނާޖް އަށް އެމެރިކާގެ ރައީސް ޑޮނަލްޑް ޓްރަމްޕްގެ "ގޯލްޑް ކާޑް" ދީފި އެވެ.

ހުކުރު ދުވަހު ބޭއްވި ޓްރަމްޕް އެކައުންޓްސް ސަމިޓުގައި ލަވަކިޔުންތެރިޔާ ނިކީ މިނާޖް ވަނީ ރައީސް ޓްރަމްޕަށް ތާއީދުކުރާކަން ހާމަކޮށް އެކުގައި ފެނިލާފަ އެވެ. އެ ހަފްލާގައި ނިކީ ބުނީ އޭނާއަކީ ޓްރަމްޕްގެ "ނަމްބަ 1 ފޭން" ކަމަށެވެ.

ޓްރަމްޕްގެ އެކައުންޓްސް ސަމިޓްގައި ނިކީ މިނާޖް އާއެކު

އެއާއެކު ޓްރަމްޕް ވެސް ވަނީ ނިކީއަށް ވަރަށް ތައުރީފުކޮށް ވާހަކަދައްކަވާފަ އެވެ.

ހަފްލާއަށް ފަހު ނިކީ 43، ސޯޝަލްމީޑިއާގައި ވަނީ ޓްރަމްޕްގެ ފޮޓޯ ޖަހާފައިވާ ގޯލްޑް ވިސާ ކާޑެއް ހިއްސާކޮށް، އޭނާއަށް ޓްރަމްޕް އެއްވެސް އަގަކާ ނުލައި ގޯލްޑް ކާޑު ދެއްވި ކަމަށް ބުނެފަ އެވެ.

"ޓްރަމްޕް ގޯލްޑް ކާޑް" އަކީ އެމެރިކާއަށް ހިޖުރަކޮށްގެން އުޅޭ އެހެން ގައުމުތަކުގެ މީހުންނަށް ވިސާ ނުވަތަ ސިޓިޒަންޝިޕް އެއް މިލިއަން ޑޮލަރު ދީގެން ގަތުމަށް ދެވޭ ހިދުމަތެކެވެ. އެއް މިލިއަން ޑޮލަރުގެ އިތުރުން 15،000 ޑޮލަރު ޕްރޮސެސިން ފީއަށް ވެސް ދައްކަން ޖެހެ އެވެ.

ޓްރިނިޑާޑް އެންޑް ޓޮބާގޯއަށް އުފަން ނިކީގެ ޕޯސްޓުގައި ބުނެފައި ވަނީ އޭނާ އެމެރިކާގެ ސިޓިޒަންޝިޕްއަށް ހުށަހެޅުމަށް މަސައްކަތް ފަށާފައިވާ ކަމަށެވެ.

ބައެއް ނޫސްތަކުން ރިޕޯޓުކޮށްފައިވާ ގޮތުން ޓްރަމްޕް ނިކީއަށް ދެއްވި ގޯލްޑް ކާޑަކީ ރަމްޒީ ކާޑެކެވެ. އެކަމާ ގުޅޭ އިތުރު ތަފްސީލް ވައިޓްހައުސްއިން ދީފައެއް ނުވެ އެވެ.