ރަމަޟާން މަސް ފެށިގެން ކުރިއަށްދާއިރު ކޮންމެ ދުވަހަކު ވެސް އަހަރުމެންގެ ހާރުދަމުގެ ސުފުރާ މައްޗަށް އެކި ބާވަތްތަކުގެ ކާބޯތަކެތި އަރަ އެވެ.

އެހެން ނަމަވެސް ކިތަންމެ ބައިވަރު ބާވަތްތަކެއް މޭޒުމަތީގައި ހުރި ނަމަވެސް ގިނަ ބައެއްގެ އެންމެ ފުރަތަމަ އިޚްތިޔާރަކަށް އަބަދުވެސް ވަނީ ހުދު ބަތާއި ގަރުދިޔަ އެވެ.

ބަތާއި ގަރުދިޔައަކީ ކިތަންމެ އާދައިގެ ކެއުމެއްގެ ގޮތުގައި ބެލެވިފައި އޮތް ނަމަވެސް އެއީ ދިވެހިންގެ އެންމެ ގާތް ރޯދަ ބައިވެރިޔާ އެވެ. ސަބަބުތައް ވެސް ބައިވަރެވެ.

އެންމެ ފުރަތަމަ ކަމަކީ ކައްކަން ފަސޭހަ ވެފައި އެކަމަށް ހޭދަވާ ވަގުތު ކުޑަ ވުމެވެ. ރޯދަ މަހުގެ ހަލަބޮލި ކަމުގެ ތެރެއިން ހާރުދަމަށް ހަމަ ކޮންމެހެން ވެސް ގަރުދިޔަ ތައްޔާރު ކުރެވެނީ އެހެންވެ އެވެ.

ހަމައެއާއެކު ގަރުދިޔައަކީ ސިއްހީ ގޮތުން ބަލާއިރު ވެސް ރޯދައަށް ހުންނައިރު މުޅި ދުވަހު މީހާގެ ހަކަތަ ދަމަހައްޓައިދޭ ކެއުމެކެވެ. އެއާއެކު ބަރު ކެއުންތަކަށްވުރެ ބަނޑަށް ވެސް ލުއިކަން ގިނަ ބަޔަކު ފާހަގަ ކުރެ އެވެ.

ގަރުދިޔަ ކެއްކުމުގައި ވެސް އެންމެ ރަނގަޅީ ބޮޑަށް ރަތްވި ވަރެއް ކަމަށް އެ ކެއުމަށް ލޯބިކުރާ މީހުން ބުނެ އެވެ. އެއާއެކު ގަރުދިޔަ ކައްކާއިރު ހިކި މިރުހާއި ހިކަނދިފަތް އަދި ފިޔާ އެޅުމުން އެއީ ހަމަ "މަރެކެވެ".

ބަތާއި ގަރުދިޔަ ކެއުމުގައި އެކި މީހުން އެކި ގޮތް ހިޔާރު ކުރެ އެވެ. ބައެއް މީހުން ހުސްކޮށް ބަތާއި ގަރުދިޔަ ކާއިރު އަނެއްބަޔަކަށް ކަމުދަނީ ފަސްކުޅިއާއި ތެއްލި މަސް ނުވަތަ އަސާރަ އެއްކޮށްގެންނެވެ.

ކޮންމެއަކަސް އަހަރުތައް ފާއިތުވެ ރޯދަ ސުފުރާތަކަށް އަންނަމުންދާ ބަދަލުތަކުގެ ތެރެއިން ވެސް ދިވެހިންގެ ރަތް ގަރުދިޔަ ވެފައިވަނީ ހާރުދަމުގެ ދެގޮތެއްނުވާ ބައިވެރިއަކަށެވެ.