މެދުއިރުމަތީގައި ހަނގުރާމަ ފެތުރެމުންދާ މި ދަނޑިވަޅުގައި، އެމެރިކާއާއި އިޒްރޭލުން ދެމުންދާ ހަމަލާތަކުން ދިފާއުވުމަށް އީރާނުން ކުރާ މަސައްކަތަށް ތާއީދުކުރާ ކަމަށް ޗައިނާގެ ފޮރިން މިނިސްޓަރު ވަންގް ޔީ ވިދާޅުވެއްޖެ އެވެ.

މިކަން ހާމަކުރެއްވީ ހޯމަ ދުވަހު އީރާނުގެ ފޮރިން މިނިސްޓަރު އައްބާސް އަރަގްޗީއާ ފޯނުން ގުޅުއްވައި ދެއްކެވި ވާހަކަފުޅުގަ އެވެ.

ވޭތުވެދިޔަ ހޮނިހިރު ދުވަހުން ފެށިގެން އެމެރިކާ އާއި އިޒްރޭލުން އީރާނުގެ އެކި ސަރަހައްދުތަކަށް ދެމުންދާ ހަމަލާތަކުގައި މިހާތަނަށް އެތައް ސަތޭކަ ބަޔަކު ވަނީ މަރުވެފަ އެވެ. މި ހަމަލާތަކަށް ރައްދު ދިނުމުގެ ގޮތުން އީރާނުން ވަނީ އިޒްރޭލަށާއި، ގަލްފުގެ ގައުމުތަކުގެ އިތުރުން ސައިޕްރަސްގައި ހުންނަ އިނގިރޭސިވިލާތުގެ އަސްކަރީ މަރުކަޒަކަށް ގިނަ އަދަދެއްގެ މިސައިލާއި ޑްރޯން ހަމަލާތަކެއް ފޮނުވާލާފަ އެވެ.

ޗައިނާގެ ދައުލަތުގެ މީޑިއާ ސީސީޓީވީން ރިޕޯޓްކޮށްފައިވާ ގޮތުގައި، ވަންގް ޔީ ވަނީ ޗައިނާ އާއި އީރާނާ ދެމެދު އޮންނަ ޒަމާންވީ އެކުވެރިކަން ދަމަހައްޓާނެ ކަމުގެ ޔަގީންކަން ދެއްވާފަ އެވެ. އަދި އީރާނުގެ ސިޔާދަތާއި، ސަލާމަތާއި، ސަރަހައްދީ ނަޒާހަތްތެރިކަމުގެ އިތުރުން ގައުމީ ކަރާމާތް ދިފާއުކުރުމަށް ކުރާ މަސައްކަތަށް ޗައިނާއިން ފުރިހަމައަށް ތާއީދުކުރާ ކަމަށް އޭނާ ވިދާޅުވި އެވެ.

މީގެ އިތުރުން، އެމެރިކާއާއި އިޒްރޭލުން ކުރިއަށްގެންދާ އަސްކަރީ އޮޕަރޭޝަންތައް ވަގުތުން ހުއްޓާލުމަށާއި، މަސްރަހު އިތުރަށް ގޯސްވިޔަނުދީ މުޅި މެދުއިރުމަތީ ސަރަހައްދަށް ހަނގުރާމަ ފެތުރުން ހުއްޓުވުމަށް ޗައިނާއިން ވަނީ ގޮވާލާފަ އެވެ. އޯމާންގެ ފޮރިން މިނިސްޓަރާ ދެއްކެވި ވާހަކަފުޅުގައި ވަންގް ވަނީ އެމެރިކާ އާއި އިޒްރޭލުން އީރާނާ ދެކޮޅަށް އިސްވެ ގަސްދުގައި ހަނގުރާމައެއް ފަށައި، އދ. ގެ ޗާޓަރާ ހިލާފުވެފައިވާ ކަމަށް ތުހުމަތުކުރައްވާފަ އެވެ.

"އދ. ގެ ސަލާމަތީ މަޖިލީހުގެ ޕްލެޓްފޯމް މެދުވެރިކޮށް އިންސާފު ގާއިމުކުރުމަށާއި، ސުލްހައަށް މަސައްކަތްކުރުމުގެ އިތުރުން ހަނގުރާމަ ހުއްޓުވުމުގައި ބިނާކުރަނިވި ދައުރެއް އަދާކުރުމަށް ޗައިނާ އޮތީ ތައްޔާރަށް،" ވަންގް ޔީ ވިދާޅުވި އެވެ.

ފަރަންސޭސިވިލާތުގެ ފޮރިން މިނިސްޓަރާ ވާހަކަދައްކަވަމުން އޭނާ ވަނީ ބާރުގަދަ ގައުމުތަކުން އެމީހުންގެ އަސްކަރީ ކުރިއެރުމުގެ ބޭނުންކޮށްގެން އެހެން ގައުމުތަކަށް ހަމަލާދިނުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެފަ އެވެ.

މި ހަމަލާ ބަދަލުކުރުންތަކުގައި މިހާތަނަށް އެމެރިކާގެ އަސްކަރިއްޔާގެ ހަތަރު މީހަކު މަރުވެފައިވާއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނާއެކު ކުރާ މި ހަނގުރާމަ އެތައް ހަފްތާއަކަށް ދެމިގެން ހިނގައިދާނެ ކަމުގެ އިންޒާރު ދެއްވާފަ އެވެ.

ޗައިނާއިން ބުނަމުންދަނީ އީރާނުގެ ނިއުކްލިއާ މައްސަލައަށް ވެސް ހައްލެއް ހޯދަންޖެހޭނީ ސިޔާސީ އަދި ޑިޕްލޮމެޓިކް މަގުން ކަމަށެވެ.