ރާއްޖޭގައި ބައިނަލްއަގުވާމީ ފުޓްބޯލް ފެސިލިޓީއެއް ގާއިމްކުރުމަށް ހުޅުމާލެއިން ދިން ބިން ކުއްޔަށް ދޫކޮށް ލިބުނު ފައިސާގެ ތެރެއިން ގާތްގަނޑަކަށް 30 މިލިއަން ރުފިޔާ ގެއްލިފައިވާކަން ފާހަގަކޮށް، އެ ފައިސާއާ ހަވާލުވި ފަރާތްތަކުގެ ތެރޭގައި މިނިސްޓްރީ އޮފް ޔޫތު އިންފޮމޭޝަން އެންޑް އާޓްސްގެ ޑެޕިއުޓީ މިނިސްޓަރު އަދި އެފްއޭއެމްގެ ކުރީގެ ޖެނެރަލް ސެކެޓްރީ ހުސެއިން ޖަވާޒް ހިމެނޭ ކަމަށް އޮޑިޓް އޮފީހުން ބުނެފި އެވެ.

އޮޑިޓް އޮފީހުން ބުނީ، އެ ފައިސާއާ ހަވާލުވި ފަރާތްތަކުގެ ތެރޭގައި އެފްއޭއެމްގެ ކުރީގެ ޖެނެރަލް ސެކްރެޓަރީ ހުސެއިން ޖަވާޒު ހިމެނޭ ކަން ފާހަގަވީ ފުޓްބޯޅަ ޓްރެއިނިން ފެސިލިޓީއެއް ބިން ކުއްޔަށް ދޫކުރުމާ ގުޅޭ ގޮތުން ހެދި ހާއްސަ އޮޑިޓެއްގަ އެވެ.

އޮޑިޓުގެ ރިޕޯޓުގައި ބުނީ، އެ ބިން ދޫކޮށް ލިބުނު ގާތްގަނޑަކަށް 52 މިލިއަން ރުފިޔާގެ ތެރެއިން 30 މިލިއަން ރުފިޔާ ވީނުވީއެއް ނޭނގި ގެއްލިފައިވާ ކަމަށެވެ.

އޮޑިޓްގައި ފާހަގަކޮށްފައިވާ ގޮތުގައި އެ ފައިސާއާ ހަވާލުވެފައިވަނީ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް، ފައިނޭންސް ހެޑް މުހައްމަދު އަގީލް އަދި ޖެނެރަލް ސެކްރެޓަރީ ހުސެއިން ޖަވާޒެވެ.

މީގެ ތެރެއިން ބައްސާމް ވަނީ އެފްއޭއެމްގެ ފައިސާއަށް ހިޔާނަތްތެރިވީ މައްސަލައިގައި 32 އަހަރަށް ޖަލަށްލާފަ އެވެ. އަގީލްގެ މައްޗަށް ވެސް ދައުވާކޮށްފައިވާއިރު، ފިލައިގެން ރާއްޖޭން ބޭރުގައި އުޅެނިކޮށް އޭނާވަނީ ހައްޔަރުކޮށްފަ އެވެ.

މި ތިން މީހުންގެ ތެރެއިން މިނިވަންކޮށް މި ވަގުތު ހުރީ ޖަވާޒު އެކަންޏެވެ. ޖަވާޒަކީ މި ސަރުކާރުގެ ޑެޕިއުޓީ މިނިސްޓަރެކެވެ. އެފްއޭއެމުން އިސްތިއުފާ ދިންތާ ދުވަސްކޮޅެއްގެ ތެރޭގައި ޖަވާޒުއަށް ވަނީ ޑެޕިއުޓީ މިނިސްޓަރުކަން ދީފަ އެވެ.

ހާއްސަ އޮޑިޓްގެ އެނެކްސް ތިނެއްގައި ފާހަގަކޮށްފައިވާ ގޮތުގައި އަމިއްލަ ކުންފުންޏަކުން ތިން ފަހަރެއްގެ މަތިން ނަގުދު ފައިސާއިން ދިން 1.2 މިލިއަން ރުފިޔާއާ ޖަވާޒު ވަނީ ހަވާލުވެފަ އެވެ.

އޮޑިޓާ ޖެނެރަލް ސޮއިކުރައްވައި ނެރުއްވާފައިވާ ހާއްސަ އޮޑިޓްގައި ވަނީ، އެފްއޭއެމުން ގެއްލުނު ފައިސާ ހޯދުމަށް އަދި އެކަމުގައި ޒިންމާވާ ފަރާތްތަކާމެދު ފިޔަވަޅު އެޅުމަށް ފުލުސް އޮފީހަށް އެންގުމަށް ލަފާ ދެއްވާފަ އެވެ.