އީރާނުގެ މުގައްދަސް ބިމަކީ "ނަރަކައިގެ އަހުލުވެރިންނަށް" އޮތް ތަނެއް ނޫން ކަމަށާއި ބޭރުގެ ސިފައިން ނުވިސްނާ އީރާނުގެ ފަސްގަނޑަށް ފައިއަޅައިފިނަމަ، އީރާނުގެ ފައުޖުތަކުން އެމީހުން މަރައި ނުވަތަ ހައްޔަރުކުރާނެ ކަމަށް އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލާރިޖާނީ ވިދާޅުވީ،

ބުރާސްފަތި ދުވަހު އެކްސްގައި ކުރެއްވި ޕޯސްޓެއްގައި ލާރިޖާނީ ވިދާޅުވީ، އެމެރިކާގެ ބައެއް އޮފިޝަލުން "އެތައް ހާސް ސިފައިންނާއެކު އެއްގަމު މަގުން އީރާނުގެ ސަރަހައްދަށް ވަނުމަށް ގަސްދުކުރާ" ކަމަށް ބުނެފައިވާ ކަމަށެވެ. މިހެން ބުނެފައި މިވަނީ އެމެރިކާ އާއި އިޒްރޭލުގެ އަސްކަރީ ކޯލިޝަނުން އީރާނާ ދެކޮޅަށް އުދުވާނީ ހަނގުރާމައެއް ފެށިތާ ފަސް ދުވަސް ފަހުންނެވެ.

"އިމާމް ޚުމައިނީ އާއި އިމާމް ޚާމަނާއީގެ ހިތްވަރުގަދަ ދަރިން ތިބީ އެކަމަށް ފާރަވެރިވެގެން، އެތައް ހާސް ބަޔަކު މަރައި ހައްޔަރުކޮށް، އެމެރިކާގެ ކޮރަޕްޓް އޮފިޝަލުން ފަޟީހަތްކޮށްލުމަށް އެ ފަރާތްތައް ތިބީ ތައްޔާރަށް،" ކަމަށް އީރާނުގެ ސަލާމަތީ އިސްވެރިޔާ ފާހަގަކުރެއްވި އެވެ. އޭނާ އިތުރަށް ވިދާޅުވީ، "އީރާނުގެ މުގައްދަސް ބިމަކީ ނަރަކައިގެ އަހުލުވެރިންނަށް އޮތް ތަނެއް ނޫން،" ކަމަށެވެ.

'އެކްސިއޯސް' އިން އެމެރިކާގެ ނަން ހާމަނުކުރާ އޮފިޝަލަކާ ހަވާލާދީ ކުރިން ރިޕޯޓްކޮށްފައިވާ ގޮތުގައި، އީރާނުގެ އެތެރޭގައި އެއްގަމު މަގުން ހަމަލާދިނުމަށްޓަކައި ހަތިޔާރު އެޅި ކުރުދީ ހަނގުރާމަވެރިންނަށް އެހީތެރިވުމުގެ ހުށަހެޅުން ފުރަތަމަ ހުށަހެޅީ ސީ.އައި.އޭ އާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެވެ. އަދި ފަހުން އެމެރިކާގެ އިންޓެލިޖެންސް އިދާރާތަކުން ވަނީ އެކަން ކަށަވަރުކޮށްދީފަ އެވެ.

އީރާނާ ދެކޮޅަށް ދޭން ފެށި މި އުދުވާނު ފެށުނީ މިދިޔަ ހޮނިހިރު ދުވަހު އެވެ. މީގެ ސަބަބުން މިހާތަނަށް އީރާނުގެ 1,200 އަށްވުރެ ގިނަ ރައްޔިތުން ޝަހީދުވެފައިވާއިރު، އޭގެ ތެރޭގައި ގިނައީ އާންމުންނާއި ސްކޫލް ކުދިންނެވެ.

އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އަސްކަރިއްޔާގެ ބައެއް އިސް ކޮމާންޑަރުން ވެސް ވަނީ މި ޣައިރު ގާނޫނީ އުދުވާނުގައި އަވަހާރަކޮށްލާފަ އެވެ.

މީގެ ރައްދުގައި، އިސްލާމީ އިންގިލާބީ ގާޑުންގެ ލަޝްކަރު (އައި.އާރު.ޖީ.ސީ) އާއި އީރާނުގެ އަސްކަރިއްޔާއިން ވަނީ ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށާއި، އިޒްރޭލުން ހިފާފައިވާ ފަލަސްތީނުގެ ބިންތަކުގައިވާ އަމާޒުތަކަށް ގިނަ އަދަދެއްގެ މިސައިލް ހަމަލާތަކެއް ފޮނުވާލާފަ އެވެ.

ބުރާސްފަތި ދުވަހު، އިރާގުގެ ބޯޑަރު ސަރަހައްދުތަކުގައި ހުރި ޓެރަރިސްޓް ޖަމާއަތްތަކުގެ މަރުކަޒުތަކަށް އަމާޒުކޮށް ހަމަލާދީ އެ ތަންތަން ސުންނާފަތިކޮށްލާފައިވާ ކަމަށް އީރާނުގެ ސަލާމަތީ ބާރުތަކުން ވަނީ އިއުލާންކޮށްފަ އެވެ.