ރޯދަ ވިއްލާ ގަޑީގައި ފޮނި ކާއެއްޗަކަށް ހަށިގަނޑު ވަރަށް ބޮޑަށް ބޭނުންވޭ. ގިނައިން ފޮނި ކާތަކެތި އެގަޑީގައި ބޭނުން ކުރެވޭ ނަމަ، ލޭގައި ހަކުރު ހިމެނޭ މިންވަރަށް ކުއްލި ބަދަލުތަކެއް އާދޭ. އޭގެ ސަބަބުން ވަރުބަލިވޭ، ލޮޑުވޭ، ނިދި ވެސް އާދޭ އަދި ހަށިގަނޑުން ފެން މަދުވޭ. ގިނައިން ކާން ބޭނުންވުމަކީ ވެސް އޭގެ ސަބަބުން މެދުވެރިވާ ކަމެއް. ގިނައިން ކެވޭނަމަ ފަލަވާން ދިމާވޭ. ވީމާ ރޯދަ ވިއްލާގަޑީގައި އެންމެ ރަނގަޅު ގޮތަކީ މޭވާއެއް ބޭނުން ކޮށްލުން.

ރޯދަ ވީއްލާ ގަޑިއަކީ ފޮނި އަދި ފިނި ބުއިމަކުން ކަރުތެރެ ތެންމާލަން ބޭނުންވާ ވަގުތެކެވެ. ކަރާފަނި ތައްޓަކުންނެވެ. ފިނި ކުރުނބާ ފަނި ތައްޓަކުންނެވެ. އެއަށްފަހު ދެން އެންމެ އަވަހަށް ނަޒަރު ހުއްޓާލެވެނީ ފޮނި ކާއެއްޗެއްސަށެވެ. ފޮނިގަދަވި ވަރެއް ހަމަ ބަރާބަރެވެ.

ސިއްހީ މާހިރުން ލަފާ ދެއްވާ ގޮތުގައި ރޯދަ ވިއްލާ ގަޑީގައި ގިނައިން ހަކުރު ހިމެނޭ ކާތަކެތި ބޭނުން ކުރުމަކީ ރަނގަޅު ކަމެއް ނޫނެވެ. ސަބަބަކީ ފޮނި ކާތަކެތި ބޭނުން ކުރުމުން ލޭގައި ހުންނަ ހަކުރުގެ މިންވަރަށް ކުއްލި ބަދަލުތަކެއް އަންނާތީ އެވެ. ލޭގައި ހުންނަ ހަކުރުގެ މިންވަރު ކުއްލިއަކަށް މައްޗަށް ޖެހިލައިފައި ވެއްޓެން މެދުވެރި ވާތީ އެވެ. ނަތީޖާއަކަށް ވަނީ ވަރުބަލި ކަމާއި، ލޮޑުކަން މެދުވެރި ވުމެވެ. އެއަށްފަހު ކުއްލިއަކަށް ވަރަށް ގަދައަށް ބަނޑުހައިވާން ފެށުމެވެ.

ފޮނި ކާތަކެތި ގިނައިން ބޭނުން ކުރެވޭ ނަމަ، ފައިދާހުރި ކާތަކެތި ކެއުން މަދުކޮށްލެވޭ

ބޮޑަށް ބަނޑުހައި ވުމުން ކެއުން ކޮންޓްރޯލް ކުރަން އުނދަގޫވެ އެވެ. އޭގެ ސަބަބުން ހަށިގަނޑަށް ގިނަ އަދަދަކަށް ހަކަތަ ލިބެން ފަށަ އެވެ. ހަށިގަނޑަށް ބޭނުންވާ ވަރަށް ވުރެ ހަށިގަނޑަށް އިތުރުވާ ހަކަތައަކީ ހަޑިގަނޑުގައި ރައްކާކުރެވޭ އެއްޗެކެވެ. ފަލަވާން މެދުވެރިވަނީ މިސަބަބާ ހުރެ އެވެ.

ރޯދަ ވީއްލަން ތައްޔާރު ކުރެވޭ ގިނަ ބާވަތްތަކަކީ ގިނަ އަދަދަކަށް ހަކުރު ހިމެނޭ ތަކެއްޗެވެ. އެތަކެތި ގިނައިން ބޭނުން ކުރެވުމުގެ ސަބަބުންނާއި ރޯދައަށް ހުރުމުގެ ސަބަބުން ހެލިފެލިވެ އުޅޭ މިންވަރު ދަށްވެ، ބަރުދަން އިތުރުވުމަށް މެދުވެރިވެ އެވެ.

ރޯދަ ވިއްލުމަށް ފަހު ހަކުރު ހުންނަ ކާނާ ގިނައިން ބޭނުން ކުރުމުން ދިމާވާ އިތުރު މައްސަލައަކީ ހަށިގަނޑުން ފެން މަދުވުމެވެ. އޭގެ ސަބަބުން ދުވާލާއި އަދި ރޭގަނޑުގެ ވަގުތުތަކުގައި ގަދައަށް ކަރު ހިއްކަން މެދުވެރިވެ އެވެ.

ހަށިގަނޑަށް ކޮންމެހެން ބޭނުންވާ ފައިދާހުރި މާއްދާތައް، ބޭނުން ކުރެވޭ ފޮނި ކާތަކެތީގެ ސަބަބުން މަދުވެ އެވެ. ނުވަތަ ހުއްޓިދެ އެވެ. ފޮނި ކާތަކެތީގައި ފައިދާހުރި މާއްދާތައް ހުންނަ މިންވަރު ވަރަށް ބޮޑަށް މަދެވެ. ވީމާ ގިނައިން ފޮނި ކާތަކެތި ބޭނުން ކުރުމުން ފައިދާ ހުރި ކާނާއަށް ދެވޭ ޖާގަ ކުޑަކޮށްލެވެ އެވެ.

ރޯދަ ވިއްލާ ވަގުތު ފޮނި ކާއެއްޗެއް ބޭނުން ކުރަން ބޭނުންވާ ނަމަ، ފޮނި މޭވާއެއް ކަލާށެވެ. ހަށިގަނޑަށް ބޭނުންވާ ހަކަތަ މޭވާއިން ވެސް ލިބެ އެވެ. އަދި ހަރަކާތްތެރިވެ އުޅޭ މިންވަރު އިތުރު ކޮށްލާށެވެ.