މިއަހަރުގެ މިހާތަނަށް ރާއްޖެއަށް 5 ލައްކައަށް ވުރެ ގިނަ ޓޫރިސްޓުން އަތުވެއްޖެ އެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ 4 ވަނަ ދުވަހުގެ ނިޔަލަށް ރާއްޖެއަށް 502،252 ޓޫރިސްޓުން ވަނީ އައިސްފަ އެވެ. މިދިޔަ އަހަރުގެ މި މުއްދަތުގައި ރާއްޖެ އައީ 461،839 ޓޫރިސްޓުންނެވެ. އެހެންކަމުން މިއީ 8.8 ޕަސެންޓްގެ އިތުރުވުމެކެވެ.

އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ޓޫރިސްޓުން އައިސްފައި ވަނީ ޗައިނާއިންނެވެ.

އެންމެ ގިނައިން ޓޫރިސްޓުން އައިސްފައިވާ 5 ގައުމު:

  • ޗައިނާ: 79،681 ޓޫރިސްޓުން
  • ރަޝިއާ: 57،466 ޓޫރިސްޓުން
  • އިޓަލީ: 48،417 ޓޫރިސްޓުން
  • އިނގިރޭސިވިލާތް: 46،005 ޓޫރިސްޓުން
  • ޖަރުމަން: 31،344 ޓޫރިސްޓުން

މި މުއްދަތުގެ ތެރޭގައި ރާއްޖެ އައި ޓޫރިސްޓުންގެ ތެރެއިން އެންމެ ގިނަ އަދަދެއްގެ ޓޫރިސްޓުން ޗުއްޓީ ހޭދަކޮށްފައި ވަނީ ރިސޯޓްތަކުގަ އެވެ. އެއީ 336،579 ޓޫރިސްޓުންނެވެ. ދެވަނައަށް އެންމެ ގިނަ ޓޫރިސްޓުން ޗުއްޓީ ހޭދަކޮށްފައި ވަނީ ގެސްޓްހައުސްތަކު ގައެވެ. އެއީ 131،261 ޓޫރިސްޓުންނެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން އެވްރެޖްކޮށް މިހާރު ދުވާލެއްގެ މައްޗަށް ރާއްޖެއަށް އައި ޓޫރިސްޓުންގެ އަދަދު ވަނީ ބޮޑަށް ދަށްވެފަ އެވެ. އެއީ މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ޓޫރިސްޓުން ރާއްޖެ އަންނަ ގިނަ މަންޒިލްތަކެއްގެ ފްލައިޓްތައް ވަނީ ހުއްޓާލުމުންނެވެ.

މިހާލަތުން އަރައިގަތުމަށް ސަރުކާރުން މަސައްކަތް ކުރަމުންދާއިރު ހުއްޓިފައިވާ ބައެއް ފްލައިޓްތައް އަލުން އޮޕަރޭޓްކުރުމުގެ މަސައްކަތް ވެސް އަންނަނީ ކުރަމުންނެވެ. އަދި އިތުރު މަންޒިލްތަކުން ފްލައިޓްތައް ގެނައުމުގެ މަސައްކަތް ވެސް ސަރުކާރާއި ކަމާ ގުޅުން ހުރި އިދާރާތަކުން އަންނަނީ ކުރަމުންނެވެ.