ލުބުނާނާއި އިސްރާއީލާ ދެމެދު ވެފައިވާ ހަމަލާ ބަދަލުކުރުން ހުއްޓާލުމުގެ އެއްބަސްވުމަކާ ޚިލާފަށް، އިއްޔެ އިސްރާއީލުން ލުބުނާނަށް އަލުން ހަމަލާތައް ދޭން ފެށުމާ ގުޅިގެން ދުނިޔޭގެ ބާޒާރުގައި ތެލުގެ އަގު އަނެއްކާވެސް އުފުލިއްޖެ އެވެ.

ހަކަތައިގެ ބާޒާރަށް ކުރިމަތިވި މި ސިހުމާއެކު، މިއަދު ތެލުގެ އަގު ވަނީ ފީފާއަކުން ދެ ޑޮލަރަށްވުރެ ބޮޑުވެފަ އެވެ. އެގޮތުން އެމެރިކާގެ ސާފުނުކުރާ ތެލުގެ ފިއުޗާސް 2.10 ޑޮލަރު ނުވަތަ 2.32 އިންސައްތަ މަތިވެ، ފީފާއެއްގެ އަގު 92.64 ޑޮލަރަށް ވަނީ އަރާފަ އެވެ. އަދި ބްރެންޓް ސާފުނުކުރާ ތެލުގެ ފިއުޗާސް 2.33 ޑޮލަރު ނުވަތަ 2.5 އިންސައްތަ އުފުލި، ފީފާއެއްގެ އަގު ވަނީ 95.42 ޑޮލަރަށް ޖެހިފަ އެވެ.

އިސްރާއީލުން ބެއިރޫތަށް ދިން މި ހަމަލާތަކަކީ އެމެރިކާއާއި އީރާނާ ދެމެދު ސުލްހައިގެ އެއްބަސްވުމަކަށް އައުމަށާއި، ދުނިޔޭގެ ތެލާއި ގޭހުގެ ވިޔަފާރިއަށް އެންމެ މުހިންމު މަގެއް ކަމަށްވާ ހޮރުމުޒް ކަނޑުއޮޅި އަލުން ހުޅުވާލުމަށް އެޅުނު އިތުރު ހުރަހެއް ކަމަށް މިހާރު ވަނީ ބެލެވިފަ އެވެ.

އީރާނުން ވޮޝިންޓަނާއެކު ސުލްހައިގެ އެއްބަސްވުމަކަށް އައުމުގެ މައިގަނޑު ޝަރުތެއްގެ ގޮތުގައި ލުބުނާނުގައި ހަމަލާތައް ހުއްޓާލުން ހިމަނާފައި އޮތް ނަމަވެސް، އީރާނުގެ ތާއީދު އޮންނަ ހިޒްބުﷲ އަށް އަމާޒުކޮށް އިސްރާއީލުން ދިން ހަމަލާތަކުގެ ބަދަލުހިފުމުގެ ގޮތުން އީރާނުން ވަނީ އިސްރާއީލަށް މިސައިލް ހަމަލާތަކެއް ދީފަ އެވެ. މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނަށް ރައްދު ހަމަލާ ނުދިނުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއަށް ގޮވާލައްވާނެ ކަމަށެވެ.

މީގެ ކުރިން ޖޫން ތިންވަނަ ދުވަހު ވޮޝިންޓަނުގައި ކުރިއަށްދިޔަ މަޝްވަރާތަކަށްފަހު ލުބުނާނާއި އިސްރާއީލުން ހަމަލާތައް ހުއްޓާލުމަށް އެއްބަސްވެފައިވީ ނަމަވެސް، މާޗް މަހު އިސްރާއީލުން ލުބުނާނަށް އެރީ ހިޒްބުﷲ އިން ބޯޑަރު ހުރަސްކޮށް ރޮކެޓާއި ޑްރޯން ހަމަލާތަކެއް ދިނުމާ ގުޅިގެންނެވެ. އަދި އޭގެ ކުރިން އޭޕްރީލް މަހު ވެސް ދެ ގައުމުން ހަމަލާތައް ހުއްޓާލުމަށް އެއްބަސްވި ނަމަވެސް، ހަމަނުޖެހުންތައް ވަނީ ކުރިއަށް ގޮސްފަ އެވެ.

އޭޕްރީލް މަހުގެ ކުރީކޮޅު އެމެރިކާއާއި އިސްރާއީލުން އީރާނަށް ދެމުންދިޔަ ހަމަލާތައް ހުއްޓާލުމާ ގުޅިގެން ފުޅާ ދާއިރާއެއްގައި ހިނގަމުންދިޔަ ހަނގުރާމަ މަޑުޖެހިފައި އޮތް ނަމަވެސް، އީރާނުން ދަނީ ހޮރްމުޒް ކަނޑުއޮޅިން ކުރާ ދަތުރުފަތުރުގެ ބޮޑު ބައެއް ހުއްޓުވަމުންނެވެ. މިކަމުގެ ސަބަބުން ތެޔޮ ފޯރުކޮށްދިނުމަށް ދިމާވެފައިވާ ދަތިތަކާ ގުޅިގެން، އޯޕެކް ޕްލަސް އިން އާދީއްތަ ދުވަހު ވަނީ ތެޔޮ އުފައްދާ މިންވަރު އިތުރުކުރުމަށް އެއްބަސްވެފަ އެވެ.

މިއީ ފާއިތުވި ހަތަރު މަސް ދުވަހުގެ ތެރޭގައި ތެޔޮ އުފައްދާ މިންވަރު އިތުރުކުރުމަށް އެ ޖަމާއަތުން ނިންމި ހަތަރުވަނަ ފަހަރެވެ. ނަމަވެސް ބާޒާރުގެ ތަޖުރިބާކާރުން ބުނާ ގޮތުގައި މި ނިންމުމުގެ ސަބަބުން މާކެޓަށް މާ ބޮޑު އަސަރެއް ނުކުރާނެ އެވެ. ސަބަބަކީ ހޮރްމުޒް ކަނޑުއޮޅި ބަންދުވެފައި އޮތުމާއި، ރަޝިޔާގެ އުމްރާނީ ވަސީލަތްތަކަށް ދީފައިވާ ހަމަލާތަކުގެ ސަބަބުން އެ ގައުމުގެ ތެޔޮ އުފެއްދުމުގެ ގާބިލުކަން ދަށްވެފައިވުމާއެކު، އޯޕެކް ޕްލަސްގެ ގިނަ ގައުމުތަކަށް ކަނޑައެޅިފައިވާ މިންވަރަށް ތެޔޮ ނުއުފެއްދޭތީ އެވެ.