މިހާރަކަށް އައިސް މުޅި ދުނިޔޭގެ ސިނަމާތަކުގައިވެސް ބޮޑު ކާމިޔާބީއެއް ހޯދަމުންދާ ޖާނަރަކީ "ހޮރޯ" ނުވަތަ ބިރުވެރި ފިލްމުތަކެވެ. ފަހަކަށް އައިސް ބެލުންތެރިންގެ މެދުގައި ބިރުވެރި ފިލްމުތަކަށް އޮތް ޝައުގުވެރިކަން ވަނީ އާދަޔާ ހިލާފަށް އިތުރުވެ ފައެވެ.

ހާއްސަކޮށް، ކޮމެޑީއެއް ނުވަތަ ލޯބީގެ ބައިތަކެއް ނުހިމަނައި، ހަމައެކަނި "ބިރުގަންނުވާލުމަށް" އަމާޒުކޮށްގެން އުފައްދާ ފިލްމުތައް ބޮކްސް އޮފީހުގައި ދަނީ ބޮޑެތި ރެކޯޑުތައް މުގުރަމުންނެވެ.

މި ބަދަލުގެ އެންމެ ބޮޑު މިސާލަކީ ވަރަށް ކުޑަ ބަޖެޓަކުން އުފައްދައި، މުޅި ދުނިޔޭގައި ބޮޑު މަގުބޫލު ކަމެއް ހޯދަމުންދާ ހޮލީވުޑްގެ ފިލްމު 'އޮބްސެޝަން' އެވެ. މި ފިލްމަށް ބައިނަލްއަގުވާމީ ބާޒާރުތަކުން ބޮޑު އާމްދަނީއެއް ލިބެމުން ދާއިރު، އިންޓަނެޓްގެ މަޝްހޫރު ވާހަކައަކަށް ބިނާކޮށް އުފެއްދި 'ބެކްރޫމްސް' ފަދަ ފިލްމުތަކަށްވެސް ބެލުންތެރިންގެ ބޮޑު ތަރުހީބެއް ދަނީ ލިބެމުންނެވެ.

ހޮރޯ ފިލްމުތައް ސިނަމާގައި ކާމިޔާބުވަނީ ކީއްވެ؟

ސްޓްރީމިންގް ޕްލެޓްފޯމްތަކުގެ ޒަމާނުގައި، ގޭގައި ތިބެގެން ފިލްމު ބެލުމުގެ ބަދަލުގައި މީހުން ބިރުވެރި ފިލްމުތައް ބަލަން ސިނަމާތަކަށް ދާން ބޭނުންވާ މުހިންމު ސަބަބުތަކެއް އެބައޮތް ކަމަށް މާހިރުން ދެކެ އެވެ.

އިޖުތިމާއީ ތަޖުރިބާ: ބިރުވެރި ފިލްމުތަކުގެ "ޖަމްޕް ސްކެއާސް" (ސިއްސައިގެންދާ މަންޒަރުތައް) އަދި އަޑުގެ އަސަރުތައް އެންމެ ފުރިހަމައަށް އިހުސާސް ކުރެވެނީ ގިނަ ބަޔަކާއެކު އަނދިރި ސިނަމާ ހޯލެއްގެ ތެރޭގަ އެވެ. އެކަކު އަނެކަކުގެ ހަޅޭކުގެ އަޑާއި ސިއްސައިގެންދާ ދިއުން މުޅި ހޯލަށް ފެތުރިގެންދާ ދިއުމަކީ ގޭގައި ފިލްމު ބަލާއިރު ލިބޭނެ ތަޖުރިބާއެއް ނޫނެވެ

.ނަފްސާނީ ހިތްހަމަޖެހުން: ފިލްމީ ދާއިރާގެ މާހިރުން ފާހަގަކުރާ ގޮތުގައި ބިރުވެރި ފިލްމުތައް ބެލުމަކީ ރޯލާ ކޯސްޓާއަކަށް އެރުން ކަހަލަ ކަމެކެވެ. ސިނަމާ ހޯލަކީ ރައްކާތެރި ތަނެއްކަން ސިކުނޑިއަށް އެނގޭ ހާލު، ބިރުވެރިކަމުގެ ސަބަބުން ހަށިގަނޑަށް ލިބޭ އެޑްރެނަލިން އަދި ޑޯޕަމީންގެ "ރަޝް" އަކީ ބެލުންތެރިން ގަޔާވާ އަދި ހާސްކަން ފިލުވައިދޭ ކަމެކެވެ.'

ޕިއުއާ ހޮރޯ' އާއި ފިލްމީ ދާއިރާގެ ގޮންޖެހުންތައް

ދުނިޔޭގެ އެކި ކަންކޮޅުތަކުގައި "ހޮރޯ-ކޮމެޑީ" (ބިރުވެރި އަދި މަޖާ) ނުވަތަ "ސައިކޮލޮޖިކަލް ތުރިލާ" ފިލްމުތަކަށް ބޮޑު ކާމިޔާބީއެއް ލިބުނު ނަމަވެސް، ހަމައެކަނި ބިރުވެރިކަމަށް ހާއްސަ ފިލްމުތައް އުފެއްދުމަކީ އަދިވެސް ގިނަ ގޮންޖެހުންތަކެއް ހުރި ކަމެކެވެ.

ހޮލީވުޑްގެ 'ދަ ކޮންޖުރިންގް' ނުވަތަ 'އިންސިޑިއަސް' ފަދަ މަޝްހޫރު ފްރެންޗައިޒްތައް ދުނިޔޭގައި ހިނގަނީ އޭގެ ފެންވަރު ރަނގަޅު ވުމުންނެވެ.

ނަމަވެސް ގިނަ ގައުމުތަކުގެ އަމިއްލަ ފިލްމީ ސިނަމާތަކުގައި ބިރުވެރި ފިލްމުތަކަށް އެދެވޭ ބަޖެޓެއް ނުދެ އެވެ. އަދި އޭ-ލިސްޓް ތަރިން މިފަދަ ފިލްމުތައް ކުޅެން ބޭނުން ނުވަނީ، ފިލްމުގެ މައިގަނޑު "ހައިލައިޓް"އަކަށް ވާނީ އެ ތަރިއަށްވުރެ ބޮޑަށް "ބިރުވެރި ރޫހު" ކަމަށްވާތީ އެވެ.

އެހެންނަމަވެސް، ދާދި ފަހުން ރިލީޒްކުރި ފިލްމުތަކުގެ ކާމިޔާބީން އެނގެނީ ބެލުންތެރިން ތަފާތު އަދި ސީރިއަސް ބިރުވެރި ފިލްމުތައް ބޭނުން ވެފައިވާ މިންވަރެވެ.

ބެލުންތެރިންގެ މި ތަރުހީބާއެކު، ދުނިޔޭގެ އެކި ކަންކޮޅުތަކުގެ ޑައިރެކްޓަރުން މިހާރު ދަނީ ބޮޑެތި ބަޖެޓުތަކާއެކު ޒަމާނީ ޓެކްނޮލޮޖީ ބޭނުން ކޮށްގެން އާ ބިރުވެރި ފިލްމުތައް އިއުލާން ކުރަމުންނެވެ.

ފިލްމު އުފައްދާ ފަރާތްތަކުގެ ކުރިމަތީގައި އޮތް ގޮންޖެހުމަކީ، ބެލުންތެރިން ހީނުކުރާ ފަދަ އާ އުކުޅުތަކެއް ބޭނުން ކޮށްގެން، ސިއްސުވާލެވޭ ފަދަ މޮޅު "ޕިއޯ ހޮރޯ" ފިލްމުތަކެއް އުފެއްދުމެވެ.