މާވެލް ސިނެމެޓިކް ޔުނިވާސް (އެމް.ސީ.ޔޫ) ގެ އެންމެ ކާމިޔާބު އަދި އެންމެ ގިނަ ބައެއްގެ ލޯބި ލިބުނު އެއް ފިލްމު ކަމަށްވާ "އެވެންޖާސް: އެންޑްގޭމް" ސިނަމާތަކަށް އަލުން ގެންނަން ނިންމައި، އެކަމުގެ ހާއްސަ ޓްރެއިލާއެއް މާވެލް ސްޓޫޑިއޯސްއިން އާންމު ކޮށްފި އެވެ.

"އެވެންޖާސް: އެންޑްގޭމް އެންކޯ"ގެ ނަމުގައި ސިނަމާތަކަށް އަޅުވާ މި ވާޝަން އާއެކު، ކުރިއަށް އޮތް ބޮޑު ފިލްމު "އެވެންޖާސް: ޑޫމްސްޑޭ"އަށް ފޭނުން ތައްޔާރު ކުރުމުގެ މަސައްކަތް ވަނީ ފަށާފަ އެވެ.

"އެންކޯ" ވާޝަންގައި ހިމެނޭ އާ ކަންތައްތައްމި ސެޕްޓެމްބަރު މަހުގެ 25 ވަނަ ދުވަހު ސިނަމާތަކަށް އަންނަ މި ހާއްސަ ރީ-ރިލީޒްގައި ފާހަގަ ކޮށްލެވޭ މުހިންމު ކަންތައްތަކެއް ހިމެނެ އެވެ:

އެގޮތުން މިއަހަރުގެ ކުރީކޮޅު ޑައިރެކްޓަރުން ކަމަށްވާ ރުސޯ ބްރަދާސް ބުނެފައިވާ ގޮތުގައި، މި ފިލްމުގައި "ޑޫމްސްޑޭ"ގެ ވާހަކައާ ގުޅުވައިދޭ އާ ފުޓޭޖްތަކެއް ހިމެނޭނެ އެވެ.

އެ ފިލްމުގެ އަސްލު ދިގުމިނަކީ 3 ގަޑިއިރާއި 1 މިނެޓު ކަމަށްވާއިރު، "އެންކޯ" ވާޝަންގެ ދިގުމިނަކީ 3 ގަޑިއިރާއި 5 މިނެޓެވެ. މިއީ އިތުރު 4 މިނެޓުގެ ފުޓޭޖެވެ.

ފިލްމުގެ އެންމެ ފަހު މަންޒަރުގައި ކުރިއަށް އޮތް "ޑޫމްސްޑޭ" ފިލްމާ ގުޅުވައިދޭ ހާއްސަ މަންޒަރުތަކެއް ނުވަތަ ޕޯސްޓް-ކްރެޑިޓް މަންޒަރެއް ހިމެނޭނެ ކަމަށް ރިޕޯޓުތައް ބުނެ އެވެ.

އެއާއެކު މި ފިލްމު ބަލައިލުމަށް ސިނަމާތަކަށްދާ ފޭނުންނަށް، ޚާއްސަކޮށް އައިމެކްސް އަދި އިންފިނިޓީ ވިޝަން ސެޓްފިކެޓް ލިބިފައިވާ ސްކްރީންތަކުން އިތުރު ހާއްސަ ޕްރިވިއުއެއް ލިބިގެންދާނެ އެވެ.

މި ރީ-ރިލީޒްގެ މަގުސަދަކީ މާވެލްގެ އިންފިނިޓީ ސާގާ އާއި މަލްޓި ޔުނިވާސް ސާގާ ގުޅުވައިދިނުމެވެ. ޑިސެމްބަރު 18، 2026 ގައި ސިނަމާތަކަށް ނެރުމަށް ހަމަޖެހިފައިވާ "އެވެންޖާސް: ޑޫމްސްޑޭ"ގައި ރޮބާޓް ޑައުނީ ޖޫނިއާ އެނބުރި އަންނާނީ "ޑޮކްޓަ ޑޫމް"ގެ ގޮތުގަ އެވެ. އަދި މި ފިލްމުގައި އެންޑްގޭމް ހާދިސާތަކުގެ އަސަރުތައް ފެނިގެންދާނެ ކަމަށް ބެލެވެ އެވެ.

"އެވެންޖާސް: އެންޑްގޭމް އެންކޯ" ސިނަމާތަކަށް އަންނާނީ ސެޕްޓެމްބަރު 25، 2026ގަ އެވެ.