ހުޅުމާލޭގައި މާލެ ސިޓީ ކައުންސިލް އިދާރާގެ ހިދުމަތްތައް ދިނުމަށާއި އިދާރީ އޮފީސް ހިންގުމަށް ޔުނިޓެއް ހަމަޖެއްސުމަށް މާލޭ ސިޓީ ކައުންސިލާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ޢާ ދެމެދު އެއްބަސްވުމެއްގައި މިއަދު ސޮއިކޮށްފި އެވެ.

މާލެ އިން ބޭރުގައި ސިޓީ ކައުންސިލްގެ އޮފީހެއް ހުޅުވާ ފުރަތަމަ ފަހަރެވެ.

ހުޅުމާލޭގައި ސިޓީ ކައުންސިލްގެ އޮފީހެއް ހެދުމުގެ އެއްބަސްވުމުގައި މާލެ ސިޓީ ކައުންސިލްގެ ފަރާތުން ސޮއިކުރެއްވީ މާލެ ސިޓީގެ މޭޔަރު ޑރ. މުހައްމަދު މުއިއްޒު އެވެ. އަދި އެ ކުންފުނީގެ ފަރާތުން ސޮއިކުރެއްވީ މެނޭޖިންގެ ޑިރެކްޓަރު ސުހައިލް އަހުމަދެވެ.

އެޗްޑީސީން ބުނީ އެ އެއްބަސްވުމުގެ ދަށުން އެޑްމިނިސްޓްރޭޓިވް އޮފީސް ޖާގަގައިގެ ގޮތުގައި ހުޅުމާލެ "އަމިން އެވެނިއު"ގެ މޭޕަލް ޓަވަރުގެ ޔުނިޓް (އޭ.އެމް-1-05) ސިޓީ ކައުންސިލްގެ ހިދުމަތްތައް ފޯރުކޮށްދޭން ކަނޑައެޅިފައިވާ ކަމަށެވެ. އަދި އޭގެ ސަބަބުން އަލަށް އެކުލަވާލެވުނު ކައުންސިލާއި ގާނޫނަށް ގެނެވެނު ބަދަލުތަކާއެކު ދެ ފަރާތުން ގުޅިގެން ރައްޔިތުންގެ ލާބައަށް މަސައްކަތް ކުރުމަށް ގިނަ ފަސޭހަތަކެއް ދެ އިދާރާއަށާއި ރައްޔިތުންނަށް ލިބޭނެ ކަމަށް އެ ކުންފުނިން ގަބޫލުކުރާ ކަމަށް ވެސް ބުންޏެވެ.

"ރައްޔިތުންނާއި ޙާއްސަކޮށް ހުޅުމާލޭގައި ދިރިއުޅުއްވާ ފަރާތްތަކަށް ލިބެންޖެހޭ ހިދުމަތްތަކުގެ ފެންވަރު ރަނގަޅުކޮށް ކުރިމަގުގައިވެސް އިތުރު ހިދުމަތްތައް ފޯރުކޮށްދިނުމުގައި ކައުންސިލް އާއި އެކު ގުޅިގެން ކުރެވެން ހުރި ހުރިހާ މަސައްކަތެއް ކުރުމަށް މި ކޯޕަރޭޝަން ތައްޔާރަށް އޮތްކަން މިފުރުސަތުގައި ފާހަގަކުރަން،" އެޗްޑީސީން ބުންޏެވެ.