ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން ރައްޔިތުންގެ މަޖިލީހަށް ހުށަހަޅާފައިވާ "ނަފްރަތުގެ ބިލު" ވީހާ ވެސް އަވަހަކަށް ފާސްކޮށްދިނުމަށް ސަރުކާރަށް އެމްޑީޕީން ގޮވާލައިފި އެވެ.

އެމްޑީޕީން ނެރުނު ބަޔާނެއްގައި ބުނެފައި ވަނީ ގާނޫނުލް އުގޫބާތަށް 124 ވަނަ މާއްދާގެ ގޮތުގައި މާއްދާއެއް އިތުރު ކުރަން ހުށަހަޅާފައިވަނީ ދީން ހަތިޔާރަކަށް ބޭނުންކޮށްގެން މުސްލިމުންގެ ބޮލުގައި ދީނާ ގުޅުވައި ތަފާތު ލޭބަލްތައް އަޅުވައި، މުޖުތަމައުގައި ވަކިވަކި ފަރުދުންނާމެދު ނަފްރަތު އުފައްދައި، އެކަމުގެ ނަތީޖާއެއްގެ ގޮތުން އެ މީހުންގެ ލޭ ހުއްދަކަމަށް ބަޔަކަށް ގަބޫލުކުރެވި، އެ މީހުން މަރައި އަދި ގެއްލުވާލުމުގެ ހާދިސާތަކެއް ރާއްޖޭގައި ހިނގާފައިވާތީ ނަފްރަތުގެ އަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމުގެ ބޭނުމުގައި ކަމަށެވެ.

އެ ބިލް ހުށަހެޅި ހިސާބުން ފެށިގެން އެއާ މެދު ރައްޔިތުންގެ ހިތުގައި ނުބައި ޝުއޫރުތަކެއް އުފައްދައި އެއީ ދީނާ ހިލާފު ބިލެއްކަން ވިސްނައިދޭން ބަޔަކު މަސައްކަތްކުރާ ކަމަށާއި އެކަން ޕާޓީއިން ހަރުއަޑުން ކުށްވެރިކުރާ ކަމަށް ވެސް އެ ބަޔާނުގައި ވަނީ ބުނެފަ އެވެ. އަދި މި ބިލަށް ތާއިދުކޮށް ރައްޔިތުންގެ ތެރެއިން ވަރަށް ގިނަ ބަޔަކު ޕެޓިޝަނެއްގައި ސޮއިކުރަމުންދާ މި ދަނިޑިވަޅުގައި މި ބިލާ ދެކޮޅަށް ޕެޓިޝަނެއް ހަދައި، އެ ޕެޓިޝަނަށް ނެތް ތާއީދެއް އޮތް ކަމަށް ދެއްކުމަށް ހީލަތްތެރި އުކުޅުތައް ބޭނުން ކުރާކަމީ ކަންބޮޑުވާ ކަމެއް ކަމަށްވެސް އެމްޑީޕީން ބުނެ އެވެ.

"މި ޕާޓީން އެދެނީ ވީހާ ވެސް އަވަހަކަށް މި ބިލު ރައްޔިތުންގެ މަޖިލީހުން ފާސްކޮށް ދީނާ ގުޅުވައިގެން މުޖުތަމައުގައި ވަކިވަކި ފަރުދުންނާ މެދު ނަފްރަތު އުފެއްދުމުގެ އަމަލުތަކަށް ނިމުމެއް އައުމެވެ. އަދި ކޮންމެ ރައްޔިތަކަށް ވެސް އަމިއްލަ ނަފްސުގެ ރައްކާތެރިކަން އޮތް ތަނެއްގެ ގޮތުގައި މި ގައުމު ބިނާކުރުމަކީ މި ޕާޓީގެ އެންމެ އިސް އެއް އަމާޒެވެ،" ބަޔާނުގައި ބުންޏެވެ.

ސަރުކާރުގެ ފަރާތުން ހުށަހެޅި ބިލުގައި ހުރި ކަންބޮޑުވުންތަކާ ގުޅިގެން ރާއްޖޭގެ އެކިކަންކޮޅުތަކުން ބަޔާން ނެރެމުން އަންނައިރު އެމްޑީޕީން ދަނީ މިބިލު ފާސްކުރުމަށް ސަރުކާރަށް ފިއްތުންތައް ކުރިމަތި ކުރަމުންނެވެ. އަދި މިބިލުގައި ވަކި ބަޔަކު ހިމާޔަތް ކުރުމަށް އެމްޑީޕީގެ އިސްވެރިން އަންނަނީ މަސައްކަތް ކުރަމުންނެވެ. އަދި ރައީސް ނަޝީދު އިސްކޮށް ހުންނަވައިގެން އިސްލާމް ދީނާ ދެކޮޅަށް ގިނަ މަސައްކަތްތަކެއް ކުރަމުންދާ ކަމަށް ގިނަ ބަޔަކު އަންނަނީ ބުނަމުންނެވެ.

އެމްޑީޕީން ވަނީ އެ ބިލްގެ މަސައްކަތް އަވަހަށް ނިންމައިލުމަށް ގޮވާލައި އޮންލައިން ޕެޓިޝަނެއްގައި ސޮއިކުރަން ވެސް ގޮވާލައިފަ އެވެ. އެ ހަރަކާތުގައި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އެ މަނިކުފާނުގެ އެންމެ އަރިސް ބޭފުޅުން އިސް ދައުރެއް އަދާކުރައްވަ އެވެ.

އޭގެ އަނެއް ކޮޅުން، އެ ކަމާ ދެކޮޅު ހަދާ މީހުން ދަނީ އެ ބިލު އަނބުރާ ގެނައުމަށް ގޮވާލައި ޕެޓިޝަނެއްގައި ސޮއިކުރަން ފަށައިފަ އެވެ. އޭގެ އިތުރުން، ބިލުގައި ހުރި ކަންބޮޑުވުންތައް ހިއްސާކޮށް އެ ބިލު އަނބުރާ ގެނައުމަށް ގޮވާލައި 101 ދީނީ އިލްމުވެރިޔަކު ސޮއިކޮށް ރައީސް އިބްރާހިމް މުހައްމަދު ސޯލިހަށް ވެސް ޕެޓިޝަނެއް ހުށަހަޅާފައި ވެ އެވެ.