ތަމަޅަ ޑައިރެކްޓަރު އެޓްލީ ކުމާރާއެކު ބޮލީވުޑްގެ އެކްޓަރު ޝާހްރުކް ހާން މަސައްކަތްކުރަމުން އަންނަ ފިލްމުގެ ޓީޒާ މިމަހުގެ 15 ވަނަ ދުވަހު ނެރުމަށް ނިންމައިފި އެވެ.

އެޓްލީއަކީ ބޮކްސް އޮފީހަށް ބްލޮކް ބާސްޓަ އެތައް ފިލްމްތަކެއް ދޫކޮށްފައިވާ މަޝްހޫރު ޑައިރެކްޓަރެކެވެ.

އެޓްލީ އާއި ޝާހްރުކް ޚާން ގުޅިގެން ފިލްމެއް އުފެއްދުމުގެ މަސައްކަތްތައް ކުރަމުންދާތާ ގާތްގަނޑަކަށް އަހަރެއްހާ ދުވަސް ވަނީ ވެފަ އެވެ. މިހާރު މިވަނީ މި ފިލްމުގެ ޓީޒާ މި މަހުގެ 15 ވަނަ ދުވަހު ލޯންޗްކުރާ ގޮތަށް ހަމަޖައްސާފަ އެވެ.

ޝާހްރުކް ޚާން އާއެކު މި ފިލްމުގައި ފެނިގެންދާނެ އަންހެން ބައިވެރިއަކަށް މީޑިއާތަކުގައި ރިޕޯޓް ކޮށްފައި ވަނީ އެޓްލީގެ "ރާޖާ ރާނީ" އަދި "ބިޖްލީ"ގެ ތަރި ނަޔަންތާރާ އެވެ.

ދާދި ފަހުން އެޓްލީ ވަނީ ޝާހްރުކް އާއި ނަޔަންތާރާ އެކުގައި ފޮޓޯ ޝޫޓެއް ވެސް ކުރިޔަށް ގެންގޮސްފަ އެވެ. ފިލްމުގެ ނަން ވެސް މިހާރު ފައިނަލް ކުރެވިފައިވާއިރު، 15 ވަނަ ދުވަހު ލޯންޗްކުރާ ޓީޒާއަކީ ވަރުގަދަ ޓީޒާއަކަށް ވެގެންދާނެ ކަމަށް ބެލެވެ އެވެ.

ފިލްމުގެ މިއުޒިކް ބައި ކުރިޔަށް ގެންދަން ހަމަޖެހިފައި ވަނީ އޭ އާރް ރަހްމާން އެވެ. ފިލްމުގެ ޝޫޓިންތައް ފެށުމަށް ހަމަޖެހިފައި ވަނީ އަންނަ ސެޕްޓެމްބަރު ދުބާއީގަ އެވެ.

ޝާހްރުކް ޚާން މިވަގުތު ވެސް ދަނީ ފިލްމެއްގެ މަސައްކަތެއް ކުރަމުންނެވެ. އެއީ ސިދާތް އާނަންދް ޑައިރެކްޓްކޮށް، ހަދާ ބޮލީވުޑް ޑްރާމާ "ޕަތާން" ގެ މަސައްކަތްތަކެވެ.