1986 ވަނަ އަހަރު ނެރުނު އެކްޝަން އެޑްވެންޗާ ފިލްމު "ޓޮޕް ގަން"ގެ ސީކުއަލް "ޓޮޕް ގަން: މެވެރިކް" ރިލީޒްކުރަން އެތައް ތާރީހުތަކެއް މިދިޔަ ދެ އަހަރުގެ ތެރޭގައި ދީފައިވެ އެވެ. ނަމަވެސް އެއިން އެއްވެސް ތާރީހަކަށް މި ފިލްމު ސްކްރީންތަކާ ހަމައަށް އަދިވެސް މި އޮތީ ނާދެވި އެވެ.

މި ފިލްމު އުފައްދާ ޕެރަމައުންޓް ޕިކްޗާސްއިން އަނެއްކާ ވެސް މި ވަނީ ފިލްމު ނެރޭނެ ތާރީހެއް އިއުލާންކޮށްފަ އެވެ. ޓޮމް ކްރޫޒްގެ ފޭނުންނަށް އެ ކުންފުނިން ދިން ތާރީހަކީ އަންނަ އަހަރުގެ މޭ މަހުގެ 27 ވަނަ ދުވަހެވެ.

"ޓޮޕް ގަން: މެވެރިކް" ގެ އިތުރުން ޓޮމް ކްރޫޒްގެ އެންމެ ކާމިޔާބު ފިލްމު ސީރީޒް "މިޝަން އިމްޕޮޒިބްލް 7" ރިލީޒްކުރަން ނިންމި ތާރީހު ވެސް އެތައް ފަހަރަކު މިވަނީ ފަހަތަށް ޖެހިފަ އެވެ. މި ފިލްމަށް އެންމެ ފަހުން ދިން ތާރީހަކީ އަންނަ އަހަރުގެ ސެޕްޓެމްބަރު 30 ވަނަ ދުވަހެވެ.

މި ދެ ފިލްމުގެ އިތުރުން މި އަހަރުގެ އޮކްޓޫބަރު 22 ގައި ކުރިން ރީލީޒްކުރަން ނިންމި ޖޯނީ ނޮކްސްވިލޭ އަދި ސްޓީވް އޯ ފެނިގެންދާ ކޮމެޑީ ފްރެންޗައިޒް ފިލްމު "ޖަކާސް ފޯއެވާ" ރިލީޒްކުރުން ވެސް މިހާރު ވަނީ އަންނަ އަހަރުގެ ފެބްރުއަރީ ހަތަރަކަށް ފަސްކޮށްފަ އެވެ.

މީގެ އިތުރުން ޔުނިވާސަލްގެ މިޔުޒިކަލް އެޑެޕްޓޭޝަން ފިލްމް "ޑިއާ އީވެން ހަންސޭން" ރިލީޒްކުރުން އަންނަ ސެޕްޓެމްބަރު 24 އަށް ތާވަލުކޮށްފައިވާއިރު، ޖޭމްސް ބޮންޑްގެ ސީކުއަލް "ނޯ ޓައިމް ޓު ޑައި" ލޯންޗް ކުރާނީ އަންނަ މަހު 8 ވަނަ ދުވަހު އެވެ.

ޖޯސެފް ކޮޒިންސްކީ ޑައިރެކްޓްކޮށްފައިވާ "ޓޮޕް ގަން: މެވެރިކް" ގައި މިލެޒް ޓެލާ، ޖެނިފާ ކޮނޮލީ، ޖޮން ހަމް، ގްލެން ޕަވެލް، އެޑް ހެރިސް، ލުވިސް ޕުލްމަން، ވަލް ކިލްމާ އަދި މޮނިކާ ބާބަރޯ ފަދަ ތަރިން ފެނިގެންދާނެ އެވެ.