އދ. ދަނގެތީ މަރާލާފައި އޮއްވައި އިއްޔެ ފެނުނު އުމުރުން 57 އަހަރުގެ މަހުމޫދު އަބޫބަކުރުގެ ހަށިގަނޑު އިތުރު ތަހުލީލުތައް ކުރުމަށް މާލެ ގެނައުމަށް ފަހު އަނބުރާ ދަނގެއްޗަށް ގެންގޮސްފި އެވެ،

ރަހުމު ކުޑަގޮތަކަށް މަރާލައި ފަޅު ގޯއްޗެއްގެ ތެރޭގައި ހުރި ވަޅަކަށް އެއްލާލާފައި މަހުމޫދު ފެނިފައިވަނީ އޭނާ ގެއްލިގެން ހޯދަމުން ދަނިކޮށް އިއްޔެ މެންދުރު 2:30 ހާއިރު އެވެ.

މަހްމޫދުގެ ހަށިގަނޑު މާލެ ގެނައީ ފުލުހުން ކޮންމެހެން ހަދަން ޖެހޭ ޓެސްޓުތަކެއް ހެދުމަށެވެ.

އައިޖީއެމްއެޗްއިން ހަދަން ޖެހޭ ޓެސްޓްތައް ހެދުމަށް ފަހު މިހާރު ވަނީ މަހުމޫދުގެ ހަށިގަނޑު ދަނގެއްޗަށް ގެންދިއުމަށް ފުރުވާލާފަ އެވެ. އަދި މަހުމޫދުގެ ޒަނާޖާގެ ކަންތައްތައް މިއަދު އަސުރު ނަމާދަށް ފަހު ބޭއްވުމަށް މިހާރު ވަނީ ނިންމާފަ އެވެ.

މި މައްސަލައިގަ ފުލުހުން އަދި އެއްވެސް މީހަކު ހައްޔަރެއް ނުކުރެ އެވެ. އެކަމަކު އެ ރަށު މީހުން ތުހުމަތު ކުރާ ތިން މީހަކު ވަނީ ދަނގެތީ ޕޮލިސް ސްޓޭޝަނާއި ހަވާލުކޮށްފަ އެވެ.

މަހުމޫދުގެ މަރުގެ މައްސަލައިގެ ތަހްޤީޤް ލަސްވެގެން އެރަށުގެ ރައްޔިތުން ވަނީ ކަންބޮޑުވުން ވެސް ފާޅުކޮށްފަ އެވެ.

ފުލުހުން ބުނީ މަރުގެ މައްސަލާގައި ބަލަންޖެހޭ ކަންކަންބަލައި ތަހްޤީޤްކުރުމަށް ފުލުހުންގެ ޚާއްޞަ ތަހުގީގީ ޓީމެއް އެ ރަށަށް ގޮސްފައިވާ ކަމަށެވެ.

މަހުމޫދަކީ އެ ރަށުގައި ކާޑުގެ ވިޔަފާރި އާއި ހޮޓަލެއް ހިންގާ ވިޔަފާރިވެރި އެކެވެ. އެ ރަށު މީހުން ތުހުމަތު ކުރާގޮތުގައި މަހުމޫދު މަރާލީ ފައިސާގެ މައްސަލައެއްގައި އެވެ.