ރ. ވާދޫގައި މީދާ ހިފާ މުބާރާތެއް ބޭއްވުމަށް އެރަށު ކައުންސިލުން ތައްޔާރުވެއްޖެ އެވެ.

ވާދޫގައި އަހަރަކު އެއްފަހަރު މީދާ މެރުމުގެ ހަރަކާތްތައް ބޭއްވި ނަމަވެސް މިއީ މުބާރާތެއްގެ ގޮތުގައި މިކަން ކުރާ ފުރަތަމަ ފަހަރު ކަމަށް ވާދޫ ކައުންސިލުން ވަނީ ބުނެފަ އެވެ.

މި މުބާރާތަކީ ރައްޔިތުންގެ އެއްބައިވަންތަކަން އިތުރުކުރުމާއި، ކަންކަމުގައި ރައްޔިތުންގެ ބައިވެރިވުން އިތުރުކުރުމަށް އެއްބާރުލުން ދިނުމުގެ ޝިއާރުގައި ބާއްވާ މުބާރާތެއް ކަމަށް ވެސް އެ ކައުންސިލުން ބުނެ އެވެ.

އެރަށު ކައުންސިލުން ބުނީ މި މުބާރާތް ކުރިއަށް ގެންދިއުމަށް ހަމަޖެހިފައިވަނީ މިމަހުގެ 25 ވަނަ ދުވަހުން ފެށިގެން އަންނަ މަހުގެ ފަސް ވަނަ ދުވަހާއި ހަމައަށް ކަމަށެވެ.

އެގޮތުން މުބާރާތުން އެއްވަނަ އަށް ހޮވޭ ފަރާތަކަށް 3،000 ރުފިޔާ އާއި، ދެވަނައަށް ހޮވޭ ފަރާތަކަށް 2،000 ރުފިޔާ، އަދި ތިންވަނަ އަށް ހޮވޭ ފަރާތަކަށް 1،000 ރުފިޔާ ދިނުމަށް ހަމަޖެހިފައިވާ ކަމަށް ވެސް އެ ކައުންސިލުން ވަނީ ބުނެފަ އެވެ.

އެ ކައުންސިލުން އިތުރަށް ބުނީ މި މުބާރާތުގައި ބައިވެރިވެވޭނީ އެރަށުގައި ދިރިއުޅޭ މީހުންނަށް އެކަނި ކަމަށެވެ. އަދި މީދާ ހިފޭނީ ވާދޫގެ ފަސްގަނޑުން ކަމަށާއި، އެކި ޓީމްތަކަށް ބަހައިގެންނާއި ވަކި ވަކި ފަރުދުންގެ ގޮތުގައި ވެސް ބައިވެރިވުމުގެ ފުރުސަތު އޮންނާނެ ކަމަށް އެ ކައުންސިލުން ވަނީ ބުނެފަ އެވެ.