ރިޔާސީ އިންތިޙާބުގައި މަކަރު ހަދާ އޮޅުވާލާކަމަށް ވިދާޅުވެ، އެ މައްސަލަ ސުޕްރީމްކޯޓަށް ހުށައަޅުއްވާނެ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ވައިޓްހައުސްގައި ސަޕޯޓަރުންނާއި ބައްދަލުކުރައްވާ ވާހަކަފުޅު ދައްކަވަމުން ޓްރަމްޕު ވިދާޅުވެފައި ވަނީ އިންތިޙާބު ވަނީ އޮޅުވާލާފައި ކަމަށެވެ. އެހެންކަމުން ވޯޓްގުނުމުގެ ކަންކަން ދަނީ އެއްވެސް ނުފޫޒެއްނެތިތޯ ޔަގީން ކުރަން އެ މައްސަލަ ސުޕްރީމް ކޯޓަށް ހުށައަޅުއްވާނެ ކަމަށް ޓްރަމްޕު ވިދާޅުވި އެވެ.

ޓްރަމްޕް ވިދާޅުވީ ރިޔާސީ އިންތިޙާބުން ކާމިޔާބު ލިބިވަޑައިގެންފައިވާ ކަމަށެވެ. އަދި އެކަން ފާހަގަކުރުމަށް ތައްޔާރުވަމުން އަންނަ ކަމަށް ވެސް އޭނާ ވިދާޅުވި އެވެ.

ކުރިން ލަފާކުރި ގޮތާ ޚިލާފަށް ޓްރަމްޕް ވަނީ އެމެރިކާގެ ބޮޑެތި ސްޓޭޓްތަކެއް ކާމިޔާބުކުރައްވައިފަ އެވެ.

އެންމެފަހުގެ ނަތީޖާތައް ދައްކާގޮތުން މިހާތަނަށް ބައިޑަންވަނީ 238 އިލެކްޓޯރަލް ވޯޓު ޔަގީންކުރައްވާފަ އެވެ. ރައީސް ޓްރަމްޕަށް ޔަޤީންވެފައިވަނީ 213 ވޯޓެވެ. އިންތިޚާބުގައި މޮޅުވާން އިލެކްޓޯރަލް ކޮލެޖު ވޯޓުގެ 270 ވޯޓު ބޭނުންވެ އެވެ.

ޕޮޕިއުލާ ވޯޓުގެ ނަތީޖާ ދައްކާ ގޮތުން ބައިޑެން ވަނީ 68,145,796 ވޯޓު ހޯއްދަވައިފަ އެވެ. މިއީ 49.9 ޕަސެންޓެވެ. ޓްރަމްޕަށް ލިބިވަޑައިގެންނެވީ 66,093,546 ވޯޓެވެ. މިއީ 48.4 ޕަސެންޓެވެ.