ލަސް ވޭގަސް (4 އޭޕްރީލް) - ޔޫކްރެއިންއަށާއި އެގައުމުގެ ރައްޔިތުންނަށް ވެވުނު ގޮތަކުން އެހީ ވުމަށް ރޭ ބޭއްވި ގްރެމީ އެވޯޑްގެ ތެރެއިން ޔޫކްރެއިންގެ ރައީސް ވްލޮދިމީރް ޒެލެންސްކީ އެދިވަޑައިގެންފި އެވެ.

އެވޯޑް ހަފުލާގެ ތެރެއިން ދުރަށް ދެއްކި ވީޑިއޯއެއްގައި ޒެލެންސްކީ ވަނީ ހަމަހިމޭން ވެފައިވާ ޔޫކްރެއިންގެ ސަރަހައްދުތަކަށް ވެވުނު ވަރަކުން އެހީވުމަށް ހަފްލާގެ ބައިވެރިންނާއި ބެލުންތެރިންގެ ކިބައިން އެދިވަޑައިގެންފަ އެވެ.

"މިތަން ވަނީ ވީރާނާވެ ހަމަހިމޭން ވެފައި. މި ހަމަހިމޭންކަން މިއުޒިކުން ނައްތާލަދީ،" އެމެރިކާގެ ލަވަކިޔުންތެރިޔާ ޖޯން ލެޖެންޑްއާއި ޔޫކްރެއިންގެ ޅެންވެރިޔާ ޔުބާ ޔަކިންޗުކް ހުށަހަޅައިދިން ހުށައެޅުމުގެ ކުރިން ފޮނުވި ވީޑިއޯގައި ޒެލެންސްކީ ވިދާޅުވި އެވެ.

އިނގިރޭސި ބަހުން ޒެލެންސްކީ ދެއްކެވި ވާހަކަފުޅުގައި ހަނގުރާމައިގެ ސަބަބުން އެތައްހާސް ގެއެއް ހަލާކުވެ ގިނަ ބަޔަކު މަރުވަމުންދާ ކަން ފާހަގަ ކުރައްވާފައިވެ އެވެ.

ޒެލެންސްކީގެ މި ވީޑިއޯ ގްރެމީ އެވޯޑްގެ ތެރެއިން ދައްކާލިއިރު އެތައް މިލިއަން ބަޔަކު ވަނީ ވަގުތުން މި ހަފްލާ ބަލާފަ އެވެ.

ރަޝިއާއިން ޔޫކްރެއިންއަށް އަރައި ހަނގުރާމަ ފެށިތާ މިހާރު އެއްމަސް ވެފައިވާއިރު ހަނގުރާމައިގައި އެގައުމަށް ގިނަ ގެއްލުންތަކެއް ލިބިފައިވެ އެވެ. -- އަލް އަރަބިއްޔާ