ހުޅުމާލޭގެ ދެވަނަ ފިޔަވަހީގައި އޮންނަ ޑިންގީ ޖެޓީ ސަރަހައްދުގައި ކޮންޓެއިނަރުތަކެއްގެ ތެރޭގައި ހުރި މާބްލް ޝީޓްތަކެއްގެ ދަށުވެ އެކަކު މަރުވެއްޖެ އެވެ.

ފުލުހުން ބުނީ އެ ހާދިސާގެ މައުލޫމާތު ލިބިފައި ވަނީ މިއަދު މެންދުރު ފަހު 3:30 ހާއިރު ކަމަށެވެ. އެ ހާދިސާގައި މަރުވީ ބިދޭސީއެކެވެ.

އެ ހާދިސީ ހިނގީ އެ ކޮންޓެއިނަރުގެ ތެރޭގައި ހުރި މާބްލް ޝީޓްތަކެއް ހުސްކުރުމުގެ މަސައްކަތްކުރުމުގެ ތެރޭގައި ކަމަށް ވެސް ފުލުހުން ބުންޏެވެ. އަދި އެ ހާދިސާގައި ތާށިވި ދެ މީހުންގެ ތެރެއިން އެކަކު ވަގުތުން ނިޔާވި ކަމަށް ވެސް ފުލުހުން ބުންޏެވެ.

އެ ހާދިސާގައި ދެ މީހަކު މާބްލް ޝީޓްތަކުގެ ދަށުވެގެން މަރުވި ކަމަށް ހަބަރު ފެތުރު ނަމަވެސް ފުލުހުން ބުނީ އެ ހާދިސާގައި މަރުވީ އެކަކު ކަމަށެވެ. އަދި ދެވަނަ މީހާއަށް މިހާރު ހޮސްޕިޓަލުގައި ފަރުވާ ދެމުން އަންނަ ކަމަށް ވެސް ފުލުހުން ބުންޏެވެ.

ފުލުހުން ބުނީ އެ ހާދިސާއާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށެވެ.

ސޯޝަލް މީޑިއާގައި ދައުރުވަމުން އަންނަ ވީޑީއޯއެއްގައި އެ ހާދިސާގައި ތަށިވި އެކަކު ނެރުމަށް އެކްސްކަވޭޓަރެއް ބޭނުންކޮށްގެން މާބްލްތައް ނެގުމުގެ މަސައްކަތްކުރާ ތަން ފެނެ އެވެ. އަދި ތާށިވި އެކަކު އެ ވީޑިއޯގައި ފެނެ އެވެ.

"ހުރިހާ"އަށް އެނގިފައިވާ ގޮތުގައި އެ ކޮންޓެނަރަކީ ދަ ރެސިޑެންސް އެޓް ދިގުރަށުގެ މުދާ ހުރި ކޮންޓެއިނަރެކެވެ.

އެ ހާދިސީ ހިނގީ ކޮންޓެއިނަރު ބިންމައްޗަށް ތިރިކުރިއިރު، ލެވެލް ނުކޮށް ހުއްޓައި ކޮންޓެއިނަރު ހުޅުވައިގެން އޭގެ ތެރެއަށް ވަދެ ވަކިވަކިން މާބްލް ޝީޓްތައް ނެރެން އުޅެނިކޮށް ކަމަށްވެ އެވެ.