އެމްޑީޕީގެ އެތެރޭގެ އެއްވެސް އިންތިހާބުގައި ވޯޓު އޮޅުވާލުމުގެ އެއްވެސް ކަމެއް ހިނގާފައި ނުވާނެ ކަމަށާއި މިފަހަރުވެސް އެފަދަ ކަމެއް ކުރިމަތި ނުވާނެ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

އެމްޑީޕީގެ ރިޔާސީ ޕްރައިމްރީގައި ވޯޓު ލެއްވުމަށްފަހު ނޫސްވެރިންނާ ބައްދަލުކުރައްވާ ރައީސް ސޯލިހު ވިދާޅުވީ އިންތިހހާބުގައި އެއްވެސް އޮޅުވާލުމެއް ނުހިނގާ ކަމަށެވެ. އަދި ޕާޓީގެ އެތޭރޭގެ އިންތިހާބުގެ އިންތިޒާމުތައް ހުރީ ވަރަށް ރަނގަޅަށް ކަމަށް ރައީސް ވިދާޅުވި އެވެ.

"އެމްޑީޕީގެ އެތެރޭގެ އިންތިޒާމުތައް ހަމަޖެހިފައި ހުރީ އެއަށް ވުރެން ރަނގަޅަށް. ކުރިންވެސް އެކަން ކޮށްފައި ތިއްބެވި ބޭފުޅުން އެތިއްބެވީ ހިންގަން. އެހެންވީމާ އެކަހަލަ އެއްވެސް ކަމެއް މި ވޯޓު ތެރޭގައި ހިނގާނެ ކަމަކަށް އަޅުގަނޑަކަށް ގަބޫލެއް ނުކުރެވޭ،" ރައީސް ވިދާޅުވި އެވެ.

ރައީސް ސޯލިހު ވިދާޅުވީ، މި އިންތިހާބަކީ ޑިމޮކްރަސީގެ ހަޔާތުގައި މުހިންމު މަންޒަރެއް ފެނިގެންދާނެ އިންތިހާބެއްކަމަށާއި، އުއްމީދަކީ ސުލްހަވެރިކަމާއެކު އިންތިހާބު ނިމިގެން ދިއުންކަމަށެވެ. އަދި ކުރިއަށް އޮތީ ރިޔާސީ އިންތިހާބަށް އެމްޑީޕީގެ ހުރިހާ މެންބަރުން ގުޅިގެން މަސައްކަތް ކުރުންކަމަށް ރައީސް ވިދާޅުވި އެވެ.

އެތެރޭގެ އިންތިހާބުގައި ވޯޓު އޮޅުވާލަން ރާވާފައިވާ ކަމަށް ރައީސް ނަޝީދުގެ ޓީމުންވަނީ ތުހުމަތު ކޮށްފަ އެވެ. އެވާހަކަތަކަށް ރައީސް ސޯލިހުގެ ޓީމުންވަނީ ރައްދު ދީފަ އެވެ.

އެމްޑީޕީގެ ޕްރައިމަރީގައި ވާދަކުރައްވާ ދެބޭފުޅުން ކަމަށްވާ ރައީސް ސޯލިހާއި ރައީސް ނަޝީދުވެސް މިހާރުވަނީ ވޯޓު ލައްވާފަ އެވެ.