ބޮލީވުޑްގެ އެންމެ ވަރުގަދަ އެއް ޑައިރެކްޓަރު ސަންޖޭ ލީލާ ބަންސާލީގެ ހޮލީވުޑް ފިލްމެއް ޑައިރެކްޓް ކުރުމަށް އެޖެންސީއަކާ އެކީ ސޮއިކޮށްފި އެވެ.

މުނިފޫހިފިލުވުންގެ ދާއިރާގެ ހަބަރުތައް ގެނެސްދޭ މީޑިއާތަކުގައި ރިޕޯޓްކޮށްފައިވާ ގޮތުގައި ބަންސާލީ ސޮއި ކޮށްފައިވަނީ ވިލިއަމް މޮރިސް އެންޑޭވާ (ޑަބްލިއުއެމްއީ) ގެ ފިލްމެއް ޑައިރެކްޓު ކުރާށެވެ. އެ އޭޖެންސީއަކީ މަޝްހޫރު އެކްޓަރުން ކަމަށްވާ ބެން އެފްލެކް، ޖެސިކާ އަލްބާ، ކްރިސްޓިއަން ބޭލް، ކޭޓް ބެކްއިންސޭލް އަދި މެޓް ޑޭމަން ފަދަ އެކްޓަރުން މަސައްކަތްކުރާ އޭޖެންސީ އެކެވެ.

ބަންސާލީ ހޮލީވުޑް ފިލްމެއް ޑައިރެކްޓު ކުރަން ސޮއިކޮށްފައި މިވަނީ އޭނާގެ އެންމެ ފަހުގެ ފިލްމު "ގަންގޫބާއީ ކަތިއަވަޑީ" ބާލިން ފިލްމު ފެސްޓިވަލްގައި ޕްރިމިއާ ކުރިތާ ކުޑަ ދުވަސްކޮޅެއް ފަހުންނެވެ. އެފިލްމަކީ ނެޓްފްލިކްސްގައި އެންމެ ގިނަ މީހުން ބެލި އިންޑިއާގެ ފިލްމެވެ.

އަދި މީގެ އިތުރުން ކާންސް ފިލްމް ފެސްޓިވަލްގައި ޕްރިމިއާ ކުރި އޭނާގެ ފިލްމު "ދޭވްދާސް" ވަނީ އެންމެ މޮޅު ބޭރު ބަހުގެ ފިލްމުގެ ކެޓަގަރީން ވަނީ ނޮމިނޭޓްވެފަ އެވެ.

އަދި އޭނަ މިހާރު އަންނަނީ ނެޓްފްލިކްސްއާ ގުޅިގެން "ހީރާމަންޑީ" ގެ ނަމުގައި ވެބް ސީރީޒެއް ވެސް ހަދަމުންނެވެ. އޭގެ މަސައްކަތް ނިންމައިލުމަށް ފަހު، ބަންސާލީ ޑައިރެކްޓްކުރަން އޮތް ފިލްމަކީ "ބައިޖޫ ބަވްރާ" އެވެ.

ބަންސާލީ މިފަދަ އެއްބަސްވުމެއްގެ ސޮއިކުރުމުގެ ކުރިން ކާމިޔާބު ފިލްމުތަކެއް ގެނެސްދީފައިވާ ޑައިރެކްޓަރު އެސްއެސް ރާޖަމޯލީ ވެސް ހޮލީވުޑްގެ އެޖެންސީއަކާ އެކީ ދާދި ފަހުން ސޮއިކޮށްފައިވެ އެވެ. އޭނަ އަކީ "އާރްއާރްއާރް" އާއި "ބާހްބަލީ" ގެނެސްދިން ޑައިރެކްޓަރެވެ.